1. Kyɛbɔ Hebrifoɛ 12:1 kã ne, nzu yeɛ ɔkɔboka yɛ maa yekotu ngõa nwo amirika ne yekoyie ɔ?

 BIBLE ne fa Kristofoɛ toto mmenia bɔ betu amirika nwo. Kristoniɛ biala bɔ okotu sɔ amirika ne koyie ne, okonya daa ngõa. (2 Tim. 4:7, 8) Ɔnate kyɛ waha kãa maa yetu ngõa nwo amirika ne yeyie nati, odikyɛ yɛyere yɛnwo kyɛ yɛkɔhɔ so yekotu amirika ne. Somafoɛ Pɔɔlo hora tuli sɔ amirika he yiele, na ɔhãne bɔ ɔkɔhora kɔboka yɛ maa yɛ koso yekotu yɛ deɛ ne yekoyie ɔ. Ɔhãne kyɛ, “yɛgyi nikyee biala bɔ osi yɛ ngɔsoɛ nwo atẽ . . . ne yɛgua, ná yɛ́mia yɛnye yɛtu amirika bɔ ɔla yɛ nyunu ne.”—Kenga Hebrifoɛ 12:1.

2. Sɛ bɛkã kyɛ “yɛgyi nikyee biala bɔ osi yɛ ngɔsoɛ nwo atẽ ne yɛgua” a, okyire sɛɛ?

² Mmerɛ bɔ Pɔɔlo hãne kyɛ “yɛgyi nikyee biala bɔ osi yɛ ngɔsoɛ nwo atẽ ne yɛgua” ne, nzu yeɛ né ɔpena kyɛ okyire ɔ? Bɔ né ɔpena kyɛ okyire yeɛ ole kyɛ, nikyee biala bɔ ɔkɔmaa ɔkɔyɛ se kyɛ yɛkɔhɔ so yɛkɔsõ Yehowa ne, odikyɛ yegyi yegua. Sɛ yangyi sɔ nningyein nemɔ yangua a, ɔkɔmaa yɛkɔfɛ, na ɔkɔyɛ se kyɛ yɛkɔhɔ so yekotu ngõa nwo amirika ne ɔ. Yeti, yenwo hia kyɛ yenwu sɔ nningyein nemɔ ndɛ, na yegyi yegua. Nakoso, ɛhẽne ngyire kyɛ nningyein biemɔ bɔ ɔte y’asɛdeɛ bɔ odikyɛ yɛyɛ ne, yɛkɔyakyi. Ofikyɛ sɛ yɛyakyi sɔ nningyein nemɔ a, yɛngɔhora yengotu ngõa nwo amirika ne yengoyie. (2 Tim. 2:5) Sɔ nningyein bɔ yɛkã yenwo dwirɛ ne, ebie yeɛ ole beni?

3. (a) Kyɛbɔ Galatiafoɛ 6:5 kã ne, nzu yeɛ odikyɛ yɛ bɔbɔ yɛyɛ ɔ? (b)  Nzu yeɛ yekosusu yenwo wɔ adesũa he anu ɔ, na nzuati ɔ?

³ Kenga Galatiafoɛ 6:5. Pɔɔlo hãne nikyeebie bɔ odikyɛ yenu biala bɔ mmɔden kyɛ ɔkɔyɛ ɔ. Ɔhãne kyɛ, “Ebiala kɔsoa ye bɔbɔ  ye adesoa.” Sɔ dwirɛ bɔ Pɔɔlo hãne ne, bɔ okyire yeɛ ole kyɛ, yele nningyein biemɔ bɔ odikyɛ yɛ bɔbɔ yɛyɛ yɛfa yɛsõ Nyameɛ ɔ. Sɔ nningyein ne de, ebiala ngɔhora ngɔyɛ ngɔma yɛ. Yeti, wɔ adesũa he anu ne, yekosusu sɔ nningyein bɔ odikyɛ yɛyɛ ne bie nwo, na yɛkɔnea atẽe bɔ odikyɛ yɛfa so yɛyɛ ɔ. Afei koso, yekonwu nningyein biemɔ bɔ ɔkɔhora kosi y’atẽe, bɔ ɔngɔma yɛngɔsõ Yehowa yé, ɔne atẽe bɔ yɛkɔfa so yekogyi yekogua ɔ. Sɛ yɛyɛ bɔ Yehowa kuro, na yegyi nningyein bɔ osi yɛ ngɔsoɛ nwo atẽe ne yegua a, ɔkɔboka yɛ maa yekotu ngõa nwo amirika ne yekoyie.

4. Ɛbɔ bɔ yahyɛ Yehowa kyɛ yɛkɔsõ ye ne, nzuati yeɛ ɔnyɛ se kyɛ yekoli so ɔ? (Nea foto ne koso.)

⁴ Ɛbɔ bɔ yahyɛ Yehowa ne. Yahyɛ Yehowa bɔ kyɛ yɛkɔsõ ye, ná yayɛ bɔ okuro ɔ. Yeti odikyɛ yedi ɛbɔ bɔ yahyɛ ye naso. Ɛbɔ bɔ yahyɛ Yehowa kyɛ yɛkɔsõ ye ne, ɔte anyeborolɛ dwirɛ, nakoso ɔnyɛ se kyɛ yekoli so, ofikyɛ Yehowa bɔle yɛ kyɛ yɛɛsõ ye. (Nye. 4:11) Ɔnate kyɛ Yehowa bɔle yɛ kyɛ ye sɛso nati, ɔmaa yenwu ye kyɛ yehia ye akwangyerɛ wɔ y’asetena nu. Ɔnate ɛhe ati, yɛkora yɛfa ye adamvoa, na yɛnye gye  yenwo kyɛ yɛkɔyɛ bɔ okuro ɔ. (Edw. 40:8) Afei koso sɛ yɛyɛ bɔ Nyameɛ kuro, na yesuesũa Ɔwa Yesu a, ɔmaa yenya ‘nwomeɛ yɛma yɛ kra,’ kyire kyɛ, ɔmaa yɛnwo tɔ yɛ.—Mat. 11:28-30.

5. Nzu yeɛ ɔkɔboka wɔ maa ekoli ɛbɔ bɔ ahyɛ Nyameɛ naso ɔ? (1 Yohane 5:3)

⁵ Ɛkɔyɛ sɛɛ né ahora ali ɛbɔ bɔ ahyɛ naso? Nningyein nyɔ he kɔboka wɔ. Bɔ olimoa, kɔso nya ɔdɔ ma Yehowa. Sɛ ɛdwenedwene nningyein pá bɔ Yehowa ayɛ ama wɔ, ɔne nhyiraa bɔ ɔkɔfa kɔma wɔ kyẽabie nanwo a, ɔkɔboka wɔ maa ɛkɔyɛ sɔ. Sɛ ɛkɔso nya ɔdɔ ma Nyameɛ a, ɛhẽne kɔboka wɔ maa ekotie ye dwirɛ mmerɛ biala. (Kenga 1 Yohane 5:3.) Bɔ ɔtɔ so nyɔ, suesũa bɔ Yesu yɛle ne. Yesu bɔle Nyameɛ mbaeɛ daa. Afei koso, ɔfale yenye siele akatuaa bɔ né ɔla ye nyunu naso, na ɛhẽne yeɛ ɔbokale ye maa ɔhora yɛle bɔ Yehowa kuro ɔ. (Heb. 5:7; 12:2) Kyɛbɔ Yesu yɛle ne, wɔ koso bɔ mbaeɛ srɛ Yehowa kyɛ ɔma wɔ anwoserɛ ma ɛyɛ bɔ okuro ɔ. Afei koso, fa w’adwene sie daa ngõa bɔ ɔla wɔ nyunu naso. Sɛ ɛkɔso nya ɔdɔ ma Nyameɛ, na esuesũa bɔ Ɔwa Yesu yɛle ne a, ɔkɔboka wɔ maa ekoli ɛbɔ bɔ ahyɛ Nyameɛ kyɛ ɛkɔsõ ye naso.

6. Asɛdeɛ bɔ yele ye wɔ y’abusũa nu ne, nzuati yeɛ odikyɛ yɛyɛ yenwo adwuma ɔ? (Nea foto ne koso.)

⁶ Asɛdeɛ bɔ yele ye wɔ y’abusũa nu ɔ. Sɛ yɛkɔhora yekotu ngõa nwo amirika ne a, odikyɛ yɛdɔ Yehowa ne Yesu yɛtra y’abusũafoɛ po. (Mat. 10:37) Nakoso ɛhẽne ngyire kyɛ yɛkɔyakyi asɛdeɛ bɔ yele ye wɔ y’abusũa nu ne yekogua berɛ, ofikyɛ sɛ yɛkɔhora yɛkɔsɔ Nyameɛ ɔne Kristo nye a, sana yɛnea y’abusũa. (1 Tim. 5:4, 8) Sɛ yɛyɛ sɔ a, ɔkɔmaa yɛnye kɔgye paa. Bɔ yeti yeɛ ɔte sɔ yeɛ ole kyɛ, sɛ bɛbɔ bagya ne kɔso nya ɔdɔ ne obuo ma bɛnwo a, ɔmaa bɛnye gye. Afei koso, sɛ awofoɛ dɔ bɛ mmaamɔ na bɛtete bɛ, na ngwalaa nemɔ koso tie b’awofoɛ dwirɛ a, ɔmaa anigye ba abusũa nanu.—Ɛfe. 5:33; 6:1, 4.

7. Asɛdeɛ bɔ ele ye wɔ abusũa nanu ne, nzu yeɛ ɔkɔboka wɔ maa ɛkɔyɛ yenwo adwuma ɔ?

⁷ Ɛkɔyɛ sɛɛ na ayɛ w’asɛdeɛ nanwo adwuma? Odikyɛ ebiala bɔ ɔwɔ abusũa nanu ne bɔ mmɔden kyɛ ɔkɔfa Bible nu afutue kɔbɔ ye bra. (Any. 24:3, 4) Ɛhẽne te pá tra kyɛ yɛkɔmaa yɛ amammerɛ, bɔ yekuro, ɔne bɔ mmenia kã ne kohyire yɛ bɔ yɛyɛ ɔ. Nwomaa biemɔ wɔ berɛ bɔ asafo ne ayɛ bɔ ɔboka mmusũa maa benwu bɔ odikyɛ bɛyɛ ɔ. Sɛ esũa nwomaa ahoroɛ bɔ ɔte sɔ ne, na ɛfa enu afutue ne bɔ wɔ bra a, ɔkɔboka wɔ paa. Ebie yeɛ ole edwirɛ bɔ ɔba ndoɔtoasoɛ bɔ dwirɛti yeɛ ole, “Mmoa a Wɔde Ma Abusua No.” Bahyɛ da bayɛ sɔ dwirɛ he bama awofoɛ, bɛbɔ bagya, ɔne mmrandeɛ ne ndaluwa, kyɛbɔ ɔkɔyɛ a, bɛkɔhora bekogyina ɔhaw ahoroɛ bɔ bɛfa nu ne noa ɔ. b Sɛ bɛbɔ bɛwɔ abusũa nanu ne, bɛmva Bible nu afutue bɛnyɛ adwuma po a, odikyɛ wɔde, ɛbɔ mmɔden kyɛ ɛkɔfa kɔyɛ adwuma. Sɛ ɛyɛ sɔ a, ɔkɔboka mmenia bɔ bɛwɔ w’abusũa nu ne maa bɛ koso bɛkɔsesã bɛ subaen, na Yehowa koso koyira wɔ paa.—1 Pet. 3:1, 2.

8. Sɛ yési gyinayɛɛ bie a, nzuati yeɛ odikyɛ yɛdwene yenwo yé ɔ?

⁸ Sɛ esi gyinayɛɛ bie a, bɔ okofi nu kɔwa ne, dé tonu. Yehowa afa yenwo atẽe ne ama yɛ kyɛ yɛ bɔbɔ yɛkɔhora yekosi yɛ gyinayɛɛ. Yeti sɛ yesi gyinayɛɛ pá a, ɔmaa yɛnye gye. Nakoso sɛ yanzi gyinayɛɛ pá a, ɔhaw bɔ okofi nu kɔwa ne, Yehowa ngɔye ngofi yɛ so. (Gal. 6:7, 8) Ɛhẽne ati, sɛ yesi gyinayɛɛ bie bɔ ɔttemayé, yɛkã edwirɛ maa ɔha ebie, anaa yɛpere yɛnwo yɛyɛ nikyeebie a, bɔ okofi nu kɔwa ne, odikyɛ yedé yɛto nu.  Ofikyɛ bɔ ekolua ne, ɛhẽne ala yeɛ ɛkɔpɛ ɔ. Ebia bɔ yayɛ nati, wamaa yɛ tiboa bua yɛ fɔ. Nakoso, sɛ yedé yɛto nu kyɛ bɔ yayɛ ne, yɛ bɔbɔ yeɛ odikyɛ yɛsoa bɔ wafi nu wawa ne a, ɔkɔboka yɛ maa yɛkɔpena mmokalɛ, na yayere yɛnwo kyɛ yɛngɔyɛ sɔ nikyee ne kõ. Sɛ yɛyɛ sɔ a, ɔkɔmaa yɛkɔhɔ so yekotu ngõa nwo amirika ne.

9. Sɛ asi gyinayɛɛ bie bɔ ɔttemayé a, nzu yeɛ odikyɛ ɛyɛ ɔ? (Nea foto ne koso.)

⁹ Yɛ nikyeebie fa bɔ wasi nanwo. Sɛ asi gyinayɛɛ bie bɔ ɔttemayé a, nzu yeɛ odikyɛ ɛyɛ ɔ? Bɛnwa bɔ ngaka ali ne, ma beli bɛhɔ. Yeti bɔ wasi ne, nnɛfa yenwo somoɛ kɔbɔ ebiala, na nnɛbɔ mmɔden kyɛ ekobua wɔnwo bẽ. Afei koso, nnɛdwenedwene bɔ wasi nanwo fa ha wɔnwo, na mmom dé wɔ mvomsoɛ tonu, na yɛ bɔ ɛkɔhora ɔ. Sɛ wɔ tiboa bua wɔ fɔ wɔ bɔ ayɛ nanwo a, brɛ wɔnwo ase, na kã bɔne bɔ ayɛ nanwo dwirɛ kyire Yehowa wɔ mbaeɛ nu, na srɛ ye kyɛ ɔfa hyɛ wɔ. (Edw. 25:11; 51:3, 4) Bɛbɔ ayɛ bɛ bɔne ne, pa bɛ kyerɛ. Afei koso, sɛ odikyɛ mbanyi nemɔ boka wɔ a, kã yenwo dwirɛ kyire bɛ ma bɛboka wɔ. (Yak. 5:14, 15) Sũa nikyeebie fi bɔ wato wɔ nanu, na bɔ mmɔden kyɛ engosa ngɔyɛ sɔ bɔne ne kõ. Sɛ ɛyɛ sɔ a, ɛkɔhora konya gyidie kyɛ Yehowa konwu wɔ anwumvoin, na waboka wɔ maa ahora agyina bɔ wato wɔ ne noa.—Edw. 103:8-13.

10. Sɛ yɛfa nningyein bɔ yɛngɔhora ye yɛ yesie yɛnye so a, né yɛha yɛnwo. Nzuati ɔ? (Galatiafoɛ 6:4)

¹⁰ Bɔ ɛngɔhora ye yɛ ne, nnɛfa ha wɔnwo. Sɛ yɛfa yɛnwo yɛtoto mmenia nwo a, ɔkɔmaa daa yɛkɔfa bɔ yɛngɔhora ye yɛ yekosie yɛnye so, na ɛhẽne kɔmaa y’abanu kobu. (Kenga Galatiafoɛ 6:4.) Afei koso, ɔkɔmaa daa yɛkɔfɛ mmenia so yaa, na yɛnye kɔboro bɛ. (Gal. 5:26) Sɛ yɛfa yɛnwo yɛtoto ebie a, ɔkɔmaa yɛkɔyɛ nningyein biemɔ bɔ ɔbo y’anwoserɛ so ɔ, na sɛ yɛyɛ sɔ koso a, né yɛha yɛnwo. Tworɔnzɛm ne kã kyɛ: “Sɛ w’anyelasoɛ wɔ nikyeebie anwo ɔkyɛ a, ɔmaa ɛboto.” Yeti, sɛ yɛfa nikyeebie bɔ yɛngɔhora yengodwu yenwo yesie yɛnye so a, ɔkɔmaa y’abanu kobu paa! (Any. 13:12) Sɛ ɔba sɔ a, ɔkɔmaa yɛkɔfɛ, na yɛngɔhora yengotu ngõa nwo amirika ne yengoyie.—Any. 24:10.

11. Nzu yeɛ ɔkɔboka wɔ, na amva bɔ ɛngɔhora ye yɛ anzie wɔnye so?

¹¹ Bɔ ɛngɔhora ye yɛ ne, ɛkɔyɛ sɛɛ na aye w’adwene afi so? Yehowa mbena kyɛ yɛyɛ nikyee bɔ ɔbo y’anwoserɛ so ɔ. Yeti wɔ koso, nnɛfa bɔ ɛngɔhora ye yɛ sie wɔnye so. (2 Kor. 8:12) Nya gyidie kyɛ, bɔ ɛkora yɛ ye wɔ asafo nanu ne, Yehowa mva ndoto bɔ ebiemɔ kora yɛ nanwo. (Mat. 25:20-23) Yeti nahorɛ bɔ efi w’ahõne mukoraati nu edi ma Yehowa, ɔne animia bɔ ɛfa sõ ye ne, yenye gye yenwo paa. Ebia né w’afoɛ ahɔ anyunu, anwonyerɛ teetee wɔ, anaa ɔhaw foforɛ bie ato wɔ. Ɛhẽne ati, ɛngora nyɛ nningyein biemɔ bɔ ahãa ɛpena kyɛ ɛyɛ ye wɔ Yehowa sõen nu ne. Sɛ ɔba sɔ a, brɛ wɔnwo ase na dé bɔ wasi ne tonu. Sɛ bɛfa yenwo atẽe bie bɛma wɔ, na sɛ enwu ye kyɛ ɔbo w’anwoserɛ so a, ɛkɔhora kɔhã kyɛ ɛngɔhora ye yɛ. Sɛ ɛyɛ sɔ a, né esuesũa bɔ Basilae yɛle ne. (2 Sam. 19:35, 36) Afei koso, sɛ bɛfa dwumadie bie bewura wɔsa a, ma mmenia boka wɔ kyɛbɔ Mose yɛle ne. (Ɛks. 18:21, 22) Ebiekũ koso, sɛ ɛbrɛ wɔnwo ase a, ɛngɔfa nningyein biemɔ bɔ ɛngɔhora ye yɛ ne ngosie wɔnye so. Sɛ ɛyɛ sɔ a, ɔkɔboka wɔ maa ɛkɔhɔ so kotu ngõa nwo amirika ne.

12. Sɛ ebie si gyinayɛɛ bie bɔ ɔttemayé a, odikyɛ yɛbɔ yɛnwo somoɛ anaa? Kyirekyire nu.

¹² Mmerɛ bɔ ebie asi gyinayɛɛ bie bɔ ɔttemayé, na ɛbɔ wɔnwo somoɛ ɔ. Yɛngɔhora yengosi gyinayɛɛ yɛngɔma ebie. Afei koso, sɛ ebie si gyinayɛɛ bie bɔ ɔttemayé a, bɔ okofi nu kɔwa ne, yɛngɔhora yɛngɔyɛ yenwo hwee. Yɛfa ye kyɛ abrandeɛ anaa taluwa bie asi gyinayɛɛ kyɛ ɔngɔsõ Yehowa kõ. Ɛhẽne kɔhora kɔmaa y’awofoɛ  wora kɔbɔ paa. Sɛ ɔba sɔ a, ɔnzɛkyɛ awofoɛ nemɔ bɔ bɛnwo somoɛ kyɛ bandete bɛwa ne yé. Sɛ bɛyɛ sɔ a, né bɛfa adesoa bɛto bɛnwo so. Nakoso, Yehowa mbena kyɛ awofoɛ nemɔ konya adwene bɔ ɔte sɔ koraa.—Rom. 14:12.

13. Sɛ ɛwa kã kyɛ ɔngɔsõ Yehowa kõ a, sɛɛ yeɛ odikyɛ ɛyɛ wɔ nikyee ɔ?

¹³ Bɔ wayɛ adesoa wama wɔ ne, ɛkɔyɛ sɛɛ na agyi agua? Kae kyɛ, Yehowa ama yɛ mukoraati atẽe kyɛ yɛkɔhora yekosi gyinayɛɛ bɔ yekuro ɔ. Ɛhẽne ati, sɛ ebie kɔsõ Yehowa oo, sɛ ɔngɔsõ ye oo, ɔte sona ne bɔbɔ ye dwirɛ. Sɛ ɛte awofoɛ a, Yehowa se kyɛ ɛngɔhora ngɔyɛ nikyee biala pɛpɛɛpɛ. Yeti, ɔpena kyɛ ɛyɛ bɔ w’anwoserɛ kɔhora fa boka wɔ mmaa nemɔ. Nakoso, kyɛ ɛwa ne kɔsõ Yehowa anaa ɔngɔsõ ye ne, odikyɛ ye bɔbɔ osi yenwo gyinayɛɛ, na ɛngɔhora ngosi sɔ gyinayɛɛ ne ngɔma ye. (Any. 20:11) Sɛ ɛwa yakyi Yehowa sõen a, ebia ekonya adwene kyɛ, né odikyɛ ahãa ɛyɛ nningyein biemɔ fa boka ɛwa ne, nakoso annyɛ. Sɛ ɔba sɔ a, kã yenwo dwirɛ kyire Yehowa wɔ mbaeɛ nu, na srɛ ye kyɛ ɔfa wɔ mvomsoɛ hyɛ wɔ. Yehowa se kyɛ bɔ wasi ne, ɛngɔhora ngɔyɛ yenwo hwee. Afei koso, sɛ gyinayɛɛ bɔ ɛwa ne sili ne, wamaa onwu amaneɛ a, Yehowa mbena kyɛ ɛkɔyɛ nikyeebie kɔfa kole ye kofi nu. Kae kyɛ sɛ akwalaa ne yɛ nzakrayɛɛ na osa ba Yehowa berɛ a, Yehowa kole ye kɔto nu.—Luka 15:18-20.

14. Mmerɛ bie bɔ wapɛ nu ne, sɛ yɛyɛle bɔne bie a, nzuati yeɛ ɔnzɛkyɛ yɛmaa yɛ tiboa bua yɛ fɔ ɔ?

¹⁴ Mmerɛ bɔ bɔne bie bɔ yayɛ yapɛ nu nati, yɛ tiboa yɛ fɔ ɔ. Sɛ yɛyɛ bɔne bie na yɛ tiboa bua yɛ fɔ a, ndeaseɛ wɔ nu. Nakoso Yehowa se kyɛ, sɛ yɛkɔso yɛdwenedwene bɔne bɔ yɛyɛle nanwo a, y’abanu nu kobu. Yeti, odikyɛ yegyi sɔ adesoa ne yegua. Yede, ɔkɔyɛ sɛɛ né yanwu kyɛ bɔne bɔ yɛyɛle ne, Yehowa afa ahyɛ yɛ, yeti ɔnzɛkyɛ yɛdwenedwene yenwo? Sɛ yɛsrɛ Yehowa kyɛ ɔfa bɔne bɔ yayɛ ne hyɛ yɛ, yɛkã yenwo dwirɛ yekyire mbanyi nemɔ, na afei yɛyere yɛnwo kyɛ yɛngɔyɛ sɔ bɔne ne kõ a, yɛkɔhora yekonya gyidie kyɛ Yehowa afa ahyɛ yɛ. (Aso. 3:19) Sɛ yɛyɛ sɔ nningyein hemɔ mukoraati yeyie a, Yehowa mbena kyɛ yɛdwenedwene sɔ bɔne nanwo kõ.  Ofikyɛ Yehowa se kyɛ yɛyɛ sɔ a, ɔkɔmaa y’abanu kobu. (Edw. 31:10) Afei koso, sɛ yɛkɔso yɛdwenedwene bɔne bɔ yɛyɛle nanwo a, ɔkɔmaa yɛkɔyakyi ngõa nwo amirika bɔ yetu ne.—2 Kor. 2:7.

15. Mmerɛ bie bɔ wapɛ nu ne, sɛ ɛyɛle bɔne bie a, nzu yeɛ ɔkɔboka wɔ maa ɛkɔye w’adwene kofi so ɔ? (1 Yohane 3:19, 20) (Nea foto ne koso.)

¹⁵ Ɛkɔyɛ sɛɛ né agyi sɔ adesoa ne agua? Sɛ mmerɛ bie bɔ wapɛ nu ne, ɛyɛle bɔne bie, na ɛhẽne ati wɔ tiboa bua wɔ fɔ a, fa w’adwene sie kyɛbɔ Nyameɛ fa bɔne kyɛ naso. (Edw. 130:4) Bɛbɔ bayɛ bɔne bɔ bayɛ nzakrayɛɛ ne, Yehowa ahyɛ bɛ bɔ kyɛ, ɔngɔkae “bɛ bɔne kõ.” (Yer. 31:34) Ɛhe kyire kyɛ, sɛ ayɛ bɔne bie na anu wɔnwo a, Yehowa ngae sɔ bɔne ne kõ. Yeti sɛ mmerɛ bie bɔ wapɛ nu ne, ɛyɛle bɔne bie, na ɛhẽne ati, enwu amaneɛ a, nnɛnya adwene kyɛ Yehowa fa hyɛlle wɔ. Afei koso, ebia bɔ ɛyɛle nati, yenwo atẽe bie bɔ né ele ye wɔ asafo nanu ne, wafi wɔsa. Sɛ ɔba sɔ a nnɛmaa w’abanu bu. Bɔ ɛyɛle ne, Yehowa ngae ye kõ, yeti ɔnzɛkyɛ ɛdwenedwene yenwo ha wɔnwo.—Kenga 1 Yohane 3:19, 20.

16. Mmerɛ bɔ yetu ngõa nwo amirika ne, nzu yeɛ odikyɛ yenwu ye ɔ?

¹⁶ Ngõa nwo amirika bɔ yetu ne, odikyɛ ‘yetu ye kyɛbɔ yekonya abasobɔdeɛ ne ɔ.’ (1 Kor. 9:24) Sɛ yɛkɔhora yɛkɔyɛ sɔ a, odikyɛ yenwu nningyein bɔ ɔte y’asɛdeɛ bɔ odikyɛ yɛyɛ, ɔne nningyein bɔ ɔte adesoa bɔ odikyɛ yegyi yegua ɔ. Wɔ adesũa he anu ne, yanwu nningyein biemɔ bɔ ɔte y’asɛdeɛ bɔ odikyɛ yɛyere yɛnwo yɛyɛ ɔ. Afei koso, yanwu nningyein biemɔ bɔ ɔte adesoa bɔ odikyɛ yegyi yegua ɔ. Nningyein bɔ ɔte adesoa bɔ odikyɛ yegyi yegua ne, pẽe wɔ berɛ bɔ yangã yenwo dwirɛ wɔ adesũa he anu ɔ. Yesu hãne ebie nwo dwirɛ. Ɔhãne kyɛ: “Ɛ́mɔnea ɛmɔ nwo yé, ná poentolɛ ndrasoɛ ne nzaabolɛ ne asetena nu dadwene wanni ɛmɔ ti.” (Luka 21:34) Bɔ Yesu hãne ne la ahãmeɛ a, tworɔnzɛm foforɛ pẽe wɔ berɛ bɔ sɛ ɛdwenedwene yenwo a, ɔkɔboka wɔ maa ɛkɔhɔ so kotu ngõa nwo amirika ne ɔ.

17. Nzu yeɛ ɔmaa yedé yedi paa kyɛ yɛkɔhora yekotu ngõa nwo amirika ne yekoyie ɔ?

¹⁷ Yele gyidie kyɛ Yehowa kɔma yɛ anwoserɛ bɔ yɛkɔfa yekotu ngõa nwo amirika ne yekoyie ɔ. (Yes. 40:29-31) Yeti, nnɛmaa w’abanu bu, na mmom, yere wɔnwo suesũa bɔ somafoɛ Pɔɔlo yɛle ne. Omiane yenye kyɛ okotu ngõa nwo amirika ne, kyɛbɔ ɔkɔyɛ a, yesa kɔha abasobɔdeɛ ne ɔ. (Flp. 3:13, 14) Ebiala ngɔhora ngotu sɔ amirika he ngɔma wɔ. Nakoso sɛ ɛfa wɔnwo to Yehowa so a, ɔkɔboka wɔ maa ekogyi nningyein bɔ ɔte adesoa ne kogua, kyɛbɔ ɔkɔyɛ a ɛkɔhɔ so kotu amirika ne ɔ. (Edw. 68:19) Nya gyidie kyɛ, Yehowa kɔboka wɔ maa ɛkɔhɔ so kotu ngõa nwo amirika ne, kyɛbɔ ɔkɔyɛ a ekonya daa ngõa ɔ.