KYƐBƆ ƐNE EBIE KƆHYƐ YEBO KƆBƆ NGƆMMƆ Ɔ
ADESŨA 2
Ɛyɛ A Nnɛpere Wɔnwo
Bɔ Adesũa Ne Gyi So Ɔ: ‘Sɛ ɛkã edwirɛ pá wɔ mmerɛ bɔ odikyɛ ɛkã nu a, ɔte pá paa!’—Any. 15:23.
Bɔ Filipo Yɛle Ɔ
1. Nea VIDIO ne, anaa kenga Asomafoɛ 8:30, 31. Eyie a, susu nzɛmmisa hemɔ nwo:
Bɔ Filipo Yɛle Ne, Nzu Yeɛ Yesũa Yefi Nu Ɔ?
2. Sɛ yɛne ebie bɔ ngɔmmɔ a, odikyɛ yɛto yɛ boase, na ɔnzɛkyɛ yɛpere yɛnwo. Sɛ yɛyɛ sɔ a, sona ne nye kɔgye yenwo kyɛ okotie yɛ.
Suesũa Bɔ Filipo Yɛle Ne
3. Fa wɔnye to ase. Ɛnea a, sona ne nye gye yenwo kyɛ ɔne wɔ kɔbɔ ngɔmmɔ anaa? Sɛ ɛnea sona ne nyunu, ɔne kyɛbɔ ɔyɛ yenwo ne a, ɛhẽne yeɛ ɔkɔmaa ekonwu ye ɔ. Sɛ ɛpena kyɛ ɛkã Bible nu dwirɛ bie kyire ye a, ɛkɔhora kobisa ye kyɛ, “Aso ɛse kyɛ . . . ?” Sɛ ebisa sona ne dwirɛ na ɔndɛ wɔ so a, ɛyɛ a nnɛhyɛ ye.
4. Ɛyɛ a nya aboterɛ. Sɛ ɛne sona ne bɔ ngɔmmɔ a, nnɛpere wɔnwo kyɛ ɛkɔhã Bible nu dwirɛ kohyire ye. Sɛ ɛto wɔ boase, ná ɛne ye bɔ ngɔmmɔ a, edwirɛ ne bɔbɔ kɔfa yenwo kɔwa. Ɔtɔ mmerɛ bie a, ɛkɔhora ne ye kɔbɔ asetena nu ngɔmmɔ, na sɛ ɛmɔyia kyẽa foforɛ a, na ɛne ye abɔ Bible nu ngɔmmɔ.
5. Nwu bɔ sona ne nye gye yenwo ɔ. Ebia na asiesie edwirɛ bie bɔ ɛfa kɔ asɛnga, nakoso ɛkɔnea ne, na sona ne afa edwirɛ foforɛ bie awa. Sɛ enwu ye kyɛ ɛhẽne yeɛ yenye gye yenwo a, fa wɔ deɛ ne to ahãmeɛ, na ɛne ye besusu ye dwirɛ nanwo.
