KYƐBƆ ƐNE EBIE KƆHYƐ YEBO KƆBƆ NGƆMMƆ Ɔ
ADESŨA 4
Ɛyɛ A Brɛ Wɔnwo Ase
Bɔ Adesũa Ne Gyi So Ɔ: “Ɛmɔfa anwobrɛaseɛ adwene bebu ɛmɔ mmangomɔ bɛtra ɛmɔ bɔbɔ ɛmɔ nwo.”—Flp. 2:3.
Bɔ Pɔɔlo Yɛle Ɔ
1. Nea VIDIO ne, anaa kenga Asomafoɛ 26:2, 3. Eyie a susu nzɛmmisa hemɔ nwo:
-
Sɛ ɛnea kyɛbɔ Pɔɔlo ne Ɔhene Agripa dwudwole ne a, nzu yeɛ ɔmaa enwu kyɛ né ɔbrɛ yenwo ase ɔ?
-
Atẽe beni aso yeɛ Pɔɔlo maa mmenia nemɔ nwuni kyɛ edwirɛ bɔ ɔkã ne, ofi Yehowa berɛ, na ogyĩ tworɔnzɛm naso ɔ?—Nea Asomafoɛ 26:22.
Bɔ Pɔɔlo Yɛle Ne, Nzu Yeɛ Yesũa Yefi Nu Ɔ?
2. Sɛ yɛne mmenia bɔ Bible nu ngɔmmɔ, na yɛmaa benwu kyɛ yɛbrɛ yɛnwo ase, na yebu bɛ a, ɔmaa bɛnye gye edwirɛ bɔ yɛkã yekyire bɛ nanwo.
Suesũa Bɔ Pɔɔlo Yɛle Ne
3. Má sona ne nwu ye kyɛ ebu ye. Sɛ ɛne ebie bɔ ngɔmmɔ a, ɛyɛ a nnɛmaa onya adwene llé kyɛ ɛse nikyee tra ye, na ye de wabɔnõ.
4. Maa sona ne nwu ye kyɛ edwirɛ bɔ ɛkã ne, ofi Bible nanu. Edwirɛ bɔ ɔwɔ Bible nanu ne, ofi Nyameɛ berɛ, na ɔboka mmenia maa bɛyɛ nzakrayɛɛ wɔ b’asetena nu. Yeti sɛ yɛfa Bible ne yɛboka bɛ a, ɔkɔmaa bekonya gyidie wɔ Nyameɛ dwirɛ nanu.
5. Ɛyɛ a nnésu aporowaa. Yenguro kyɛ yɛne mmenia kosu aporowaa wɔ asɛnga nu. Yeti sɛ ebie ne wɔ su aporowaa a, ɛyɛ a nnɛha wɔnwo kyɛ, ɛkɔyɛ alaa maa okonwu kyɛ bɔ ɛkã ne yeɛ ɔte nahorɛ ɔ, na mmom pɛ so na kɔ. Sɛ ɛyɛ sɔ a, okyire kyɛ ɛbrɛ wɔnwo ase. (Any. 17:14; Tito 3:2) Afei koso, ɔkɔmaa sona ne kotie nzɛmba ne kyẽa foforɛ.
