Edwirɛ páa ne fi Yehowa, bɔ ɔte anigye Nyameɛpiri bɔ ɔpena kyɛ mmusua mukoraati nye gye ne berɛ. (1 Timoteo 1:11) Ye yeɛ ɔhyehyɛle agyaa ɔ. Agyaa bɔ bede bɛto nu wɔ mmaraa atẽe so ne, ɔmaa anigye ba abusua nu, ofikyɛ ɔmaa agyaafoɛ ne ne bɛ mmaamɔ ahone tɔ bɛ kunu. Odikyɛ Kristofoɛ di maen bɔ bɛwɔ nu ne mmaraa bɔ ɔfa agyaa nwo, kyɛ bɛfa b’agyaa bewura mmaraa bo naso.​—Kenga Luka 2:1, 4, 5.

Sɛɛ yeɛ Nyameɛpiri bu agyaa ɔ? Ɔpena kyɛ bienzua ne brasua bɔ bagya ne bɔnu tena daa. Yehowa pena kyɛ hũɛmɔ ne yeɛmɔ fa naholɛlilɛ tena ase (Hebrifoɛ 13:4) Okyi agyaa yiralɛ. (Malaki 2:16) Nakoso sɛ Kristoniɛ bie nwokãfoɛ sɛkye agyaa a, Nyameɛpiri ma atẽe maa bɔ edwirɛ nne yenwo ne kora yira na ogya foforɛ.​—Kenga Mateo 19:3-6, 9.

Yehowa bɔle brasua ne bienzua kyɛ bɛboka bɛnwo ne bɛnwo wɔ agyaa nu. (Genesis 2:18) Ɔnate kyɛ hũɛ yeɛ ɔte abusua ti nati, odikyɛ ɔfa abusua ne anwoɔnaen nu ahiadeɛ ma bɛ, na okyirekyire bɛ Nyameɛpiri nwo nikye. Odikyɛ ɔfa yenwo bɔ afɔleɛ fa kyire kyɛ ɔdɔ ɔye. Odikyɛ hũɛ ne yeɛ da ɔdɔ ne obuo adi bekyire bɛnwo ne bɛnwo. Ɔnate kyɛ hũɛ ɔne yeɛ mukoraati tte pɛ nati, odikyɛ besua kyɛ bɛkɔfa bɛ mvomsoɛ bɛkɔhyɛ bɛnwo, ɔba sɔ a, ɔkɔmaa anigye kɔwa agyaa nanu.​—Kenga Ɛfesofoɛ 4:31, 32; 5:22-25, 33; 1 Petro 3:7.

Sɛ emɔyia ɔhaw ahoroɛ wɔ ɛmɔ agyaa nu a, odikyɛ ebiala bɔ mmɔden kyɛ ɔkɔla ɔdɔ ali kohyire ye mango.  (1 Korintofoɛ 13:4, 5) Nyameɛpiri Dwirɛ mma atẽe kyɛ agyaafoɛ fa ndetemuɛ besiesie edwudwolɛ bɔ ɔtaa ba agyaa nu ne.​—Kenga 1 Korintofoɛ 7:10-13.

Yehowa pena kyɛ ɛmɔ nye gye. Ɔfa afutue bɔ ɔkɔmaa ɛmɔ nye kɔgye wɔ ɛmɔ mmabunu mmerɛ nu ma ɛmɔ. Nworɛ ne suanwu bɔ ɛmɔ awofoɛ le ye ne, ɔpena kyɛ ɛmɔnya so mvasoɛ. (Kolosefoɛ 3:20) Yehowa sa pena kyɛ ɛmɔ yɛ ɛmɔ Bɔfoɛ ne, ɔne Ɔwa ne apɛdeɛ kyɛbɔ ɔkɔyɛ a, ɛmɔnye kɔgye ɔ.​—Kenga Ɔsɛngafoɛ 11:9–12:1; Mateo 19:13-15; 21:15, 16.

Odikyɛ ɛmɔyɛ adwuma serɛ kyɛbɔ ɔkɔyɛ a, ɛmɔmmamɔ konya aleɛ bɔ bekoli, nekaa bɔ bɛkɔla, ɔne ndaadeɛ bɔ bekowura ɔ. (1 Timoteo 5:8) Nakoso sɛ ɛmɔmmamɔ konya anigye paa a, sana ɛmɔ kyirekyire bɛ maa bɛdɔ Nyameɛpiri na besua yenwo nikye. (Ɛfesofoɛ 6:4) Sɛ ɛmɔda ɔdɔ adi bekyire Nyameɛpiri fa yɛ nneasoɛ páa a, ɔkɔhora kɔhã ɛmɔmmamɔ ahõne páa. Sɛ ɛmɔnate Nyameɛpiri Dwirɛ naso fa akwangyerɛ ma ɛmɔmma nemɔ a, ɔkɔhora kɔmaa bekonya adwene páa.​—Kenga Deuteronomium 6:4-7; Anyandera 22:6.

Sɛ ɛmɔhyɛ ngwalaa ne ngunaen na ɛmɔ kamvo bɛ a, ɔboka bɛ páa. Odikyɛ yɛtengyɛ bɛ na yɛma bɛ ndeɛsoɛ koso. Sɔ ndeteɛ ne boka bɛ maa bɛnyɛ nikyee bɔ ɔkɔhora kɔsɛkye b’anigye ɔ. (Anyandera 22:15) Nakoso, ɔnzɛkyɛ ɛmɔfa atianuserɛ so bɛfa ndeɛsoɛ bɛma bɛ lé.​—Kenga Kolosefoɛ 3:21.

Yehowa Adanzefoɛ tindim nwomaa ahoroɛ pẽe bɔ atirimbɔ ne yeɛ ole kyɛ bɛkɔfa bɛkɔboka awofoɛ ne ngwalaa ɔ. Sɔ nwomaa ahoroɛ nanu dwirɛ ne gyi Bible naso.​—Kenga Edwein 19:7, 11.