Edwirɛ páa bɔ yeɛ ole kyɛ mmenia kɔtena aseɛ so daa ne, bahwerɔ ye wɔ Bible nu. (Edwein 37:29) Nwomaa mmaammaa 66 yeɛ ɔkã bɔ nu yɛ Bible ne ɔ. Mmienzua naholɛfoɛ 40 yeɛ Nyameɛpiri maa bɛhwerɔle Bible ne ɔ. Mose yeɛ ɔhwerɔle nwomaa nnu bɔ olimoa ne kɔyɛ kyɛ afoɛ 3,500 ɛhe. Somafoɛ Yohane koso yeɛ ɔhwerɔle nwomaa bɔ ɔpɛ yebo ne kɔyɛ afoɛ 1,900 ɛhe. Nwa tianu dwirɛ yeɛ Bible ahwerɔlɛfoɛ ne hwerɔle ɔ? Nyameɛpiri nate ye honhom krongron naso ne Bible ahwerɔlɛfoɛ ne dwudwole. (2 Samuel 23:2) Nyameɛpiri tianu dwirɛ yeɛ bɛhwerɔle ɔ, na ɔtte bɛbɔbɔ bɛtianu dwirɛ. Yeti Yehowa yeɛ ɔhwerɔle Bible ne ɔ.​—Kenga 2 Timoteo 3:16; 2 Petro 1:20, 21.

Nea vidio bɔ yeɛ ole Nwa Yeɛ Ɔhwerɔle Bible Ne Ɔ?

Yɛse kyɛ Bible ne fi Nyameɛpiri berɛ, ofikyɛ ɔkã kyẽabie nwo dwirɛ maa ɔba nu pɛpɛɛpɛ. Sona biala nne berɛ bɔ ɔkɔhora kɔyɛ sɔ ɔ. (Yosua 23:14) Nikyee Mukoraati So Tumvoɛ Nyameɛpiri ne ngome yeɛ ɔkɔhora konwu bɔ okosi wɔ sona asetena nu kyẽabie ɔ.​—Kenga Yesaia 42:9; 46:10.

Yɛnea atẽe kyɛ nwomaa bɔ ofi Nyameɛpiri berɛ ne kɔla nzorɛ, na sɔ pɛpɛɛpɛ koso yeɛ ɔte ɔ. Bakyekyɛ Bible ne million pẽe wɔ dwudwolɛ ahoroɛ pẽe nu. Ɔwɔ nu kyɛ bɛhwerɔle Bible ne ahyɛ paa de, nakoso enu dwirɛ ne ne bɔ nyanzanwufoɛ pẽe nala de to nu ne yia. Afei koso edwirɛ bɔ Bible ahwerɔlɛfoɛ 40 ne hãne ne, ye mukoraati yia pɛpɛɛpɛ. * Biekũ koso ne, Nyameɛpiri bɔ ole ɔdɔ ne ngome yeɛ ɔkɔhora kɔla ɔdɔ bɔ Bible ne kã yenwo dwirɛ ne ali ɔ, na waadwu bekye ne, Bible ne té lé tumi bɔ ɔkora sakra  mmenia maa bɛ suban yɛ paa ɔ. Sɔ naholɛ dwirɛ he amaa mmeni pẽe ale ali kyɛ Bible ne te Nyameɛpiri Dwirɛ.​—Kenga 1 Tɛsalonikafoɛ 2:13.

Nea vidio bɔ yeɛ ole Yɛkɔyɛ Sɛɛ Na Yanwu Kyɛ Bible Ne Te Nahorɛ?

Nikyee titire bɔ Bibe ne kã yenwo dwirɛ biekũ yeɛ ole kyɛ Nyameɛpiri lé atirimbɔ bɔ ɔdɔ wɔ nu ma adasa. Twerɔnzɛm ne kã kyɛbɔ ahyaseɛ pɛɛ ne paradise aseɛ ne bɔle sona, ɔne kyɛbɔ ayieleɛ koraa ne paradise aseɛ ne kosa kɔwa biekũ nwo dwirɛ.​—Kenga Nyekyire 21:4, 5.

Mmaraa, nnyinasoɛdwirɛ, ɔne afutue koso wɔ Bible nanu. Biekũ koso ne, wasa wayɛ kyɛbɔ Nyameɛpiri ne sona si lili nwo twerɔtohɔ wɔ Bible nanu, na edwirɛ bɔ ɔte sɔ maa yenwu kyɛbɔ Nyameɛpiri suban si te ɔ. Yeti, Bible ne kɔhora kɔboka wɔ maa ekonwu Nyameɛpiri yé. Okyire bɔ ɛyɛ a, ɛkɔhora kɔyɛ ye damvo ɔ.​—Kenga Edwein 19:7, 11; Yakobo 2:23; 4:8.

Sɔ nwomaa he kɔboka wɔ maa ɛkɔfa atẽe bɔ Yesu fale so hyirehyirɛle naso kɔte Bible ne bo. Yesu hwẽne adwene siele Bible naso ngokõngokõ, ‘‘na ohyirehyirɛle twerɔnzɛm nanu.”​—Kenga Luka 24:27, 45.

Nikyee biala nne berɛ bɔ ɔmaa yɛnye gye tra edwirɛ páa bɔ ofi Nyameɛpiri berɛ ɔ. Nakoso, mmenia biemɔ nye ngye yenwo, afoforɛ koso fɛ yaa wɔ yenwo. Nnɛmaa bɛbu w’aba nu. Daa ngõa bɔ ekonya ye ne gyi Nyameɛpiri bɔ ekonwui yé naso.​—Kenga Yohane 17:3.