Sona biala nne berɛ bɔ ɔte kyɛ Yesu ɔ, ofikyɛ olimoa tenane ase kyɛ honhom abɔdeɛ kora yeɛ bɛwo ye wɔ aseɛ so kyɛ sona ɔ. (Yohane 8:23) Yesu te Nyameɛpiri abɔdeɛ bɔ olimoa, na ɔboka so bie yeɛ bɛbɔle nningyein bɔ waha mukoraati ɔ. Ye ngome yeɛ Yehowa bɔle ye tẽe, yeti ɔfata kyɛ befrɛ ye Nyameɛpiri “Awa bɔ ɔwole ye kõmaapɛ” ne. (Yohane 1:14) Besa bɛfrɛ Yesu “Edwirɛ Ne” ofikyɛ odwudwo ma Nyameɛpiri.​—Kenga Anyandera 8:22, 23, 30; Kolosefoɛ 1:15, 16.

Nyameɛpiri yele Ɔwa ne ngõa file anwuro wale aseɛ so oowurale Yudaniɛ bie bɔ ɔte ɔbabunu bɔ bɛfrɛ ye Mary kunu. Yeti Yesu annya baba bɔ ɔte sona ɔ. (Luka 1:30-35) Nikyehorɛ tibɔ Yesu wale aseɛ so yeɛ ole kyɛ, (1) ɔɔhãne Nyameɛpiri nwo naholɛ dwirɛ (2) ɔɔyɛle nneasoɛ maa yenwuni kyɛbɔ yɛkɔyɛ Nyameɛpiri apɛdeɛ ɔmva yenwo kyɛ yeyia ɔhaw ahoroɛ bɔ enu yɛ se ne, afei (3) ɔɔfale ye ngõa bɔ ɔte pɛ ne mane yɛ kyɛ “agyedeɛ.”​—Kenga Mateo 20:28.

Agyedeɛ te esikaa anaa nikyeebie bɔ betua bɛfa bede ebie befi ewue nu ɔ. (Exodus 21:29, 30) Ahyaseɛ ne, na mbanyiyɛlɛ ɔne ewue ɔbboka Yehowa atirimbɔ bɔ ole ma sona naso. Nzu yeɛ ɔmaa yenwu ye sɔ ɔ? Nyameɛpiri hã hyirɛle sona bɔ olimoa ne, Adam kyɛ, sɛ ɔyɛ bɔ Bible frɛ ye “bɔne” a, okowu. Yeti sɛ  Adam anyɛ bɔne a, ahãa ongowu. (Genesis 2:16, 17; 5:5) Kyɛbɔ Bible maa yenwui ne, ɔnate Adam so yeɛ bɔne “wale” ewiase mukoraati ɔ. Yeti Adam maa bɔne bɔ ɛso akatua yeɛ ole ewue ne hãne ye bosofoɛ mukoraati. Ɛhene ati yeɛ yehia agyedeɛ bɔ ɔkɔhora kole yɛ kofi bɔne, ɔne ewue bɔ yenya yefili Adam berɛ nanu ne ɔ.​—Kenga Romanfoɛ 5:12; 6:23.

Nwa yeɛ né ɔkɔhora kotua agyedeɛ ne kɔfa kole yɛ kofi ewue nu ɔ? Sɛ yewu a, yetua yɛ ngome yɛ bɔne nwo kerɛ. Sona biala nne berɛ bɔ ɔkɔhora kotua ebie bɔne nwo kerɛ kɔma ye ɔ.​—Kenga Edwein 49:7-9.

Né Yesu tte kyɛ yɛ, ná ɔte pɛ. Yeti ná ɔnzɛkyɛ owu fa tua ye bɔne nwo kerɛ—ofikyɛ waanyɛ bɔne biala. Yesu wule fa tuale afoforɛ bɔne nwo kerɛ. Nyameɛpiri somane Ɔwa ne maa oowule lɛle yɛ ngõa fa hyirɛle kyɛ ole ɔdɔ paa ma sona. Yesu tiele ye Baba, na ɔfale ye ngõa bɔle afɔleɛ mane yɛ fa hyirɛle kyɛ ɔdɔ yɛ.​—Kenga Yohane 3:16; Romanfoɛ 5:18, 19.

Nea vidio bɔ yeɛ ole Nzuati Yeɛ Yesu Wule Ɔ?

Mmerɛ bɔ né Yesu wɔ aseɛ so ne, ɔsale anwonyerɛ, otingyele awufoɛ, na olɛle mmeni pẽe fili amaneɛnwunɛ nu. Ɔyɛle sɔ fa hyirɛle bɔ ɔkɔyɛ ye kyẽabie kɔma mmenia bɔ bɛkɔyɛ setie bɛkɔma ye ne. (Mateo 15:30, 31; Yohane 5:28) Yesu wue sĩ ne, Nyameɛpiri tingyele ye wale ngõa nu biekũ kyɛ honhom abɔdeɛ. (1 Petro 3:18) Yesu tenane Nyameɛpiri sa famaa so wondɛle oodwule kyɛ Yehowa mane ye tumi kyɛ oli aseɛ mukoraati so ɔ. (Hebrifoɛ 10:12, 13) Kesaalae Yesu di hene wɔ anwuro, na bɛbɔ beli ye si ne kã edwirɛ páa ne wɔ aseɛ mukoraati so.​—Kenga Daniel 7:13, 14; Mateo 24:14.

Ɔngɔhyɛ, Yesu kɔfa tumi bɔ wanyae kyɛ ɔhene ne kɔye amaneɛnwunɛ ɔne bɛbɔ bɛfa bɛba ne mukoraati kofi berɛ. Ebiala bɔ onya Yesu nu gyidie na otie ye ne konya daa ngõa wɔ paradise aseɛ so.​—Kenga Edwein 37:9-11.