BUE 7
Nzu yeɛ ole Nyameɛpiri Ahennie?
1. Nzu yeɛ ole Nyameɛpiri Ahennie?
Nzuati yeɛ Yesu te Ɔhene bɔ ɔfata ɔ?—MARKO 1:40-42.
Nyameɛpiri Ahennie ne te awaen bɔ ɔwɔ anwuro ɔ. Ɔkɔwa koosi sona awaen mukoraati gya nu, na ɔkɔmaa Nyamepiri apɛdeɛ kɔyɛ berɛ wɔ anwuro ɔne aseɛ so. Ɔte anigye dwirɛ paa kyɛ Nyameɛpiri kɔfa ye Ahennie ne kɔyɛ nikyee bɔ ɔte sɔ ɔ. Ɔngɔhyɛ Nyameɛpiri kɔfa Ahennie bɔ sona hia ye paa ne kɔwa. Ɔkɔmaa mmenia bɔ bɛte aseɛ so mukoraati kɔyɛ kõ.—Kenga Daniel 2:44; Mateo 6:9, 10; 24:14.
Ahennie biala le sona bɔ odi so ɔ. Yeti, Yehowa aye Yesu Kristo kyɛ ɔyɛ Ye Ahennie naso Hene.—Kenga Nyekyire 11:15.
Nea vidio bɔ yeɛ ole Nzu Yeɛ Ole Nyameɛpiri Ahennie?
2. Nzuati yeɛ Yesu te Ɔhene bɔ ɔfata ɔ?
Nyameɛpiri Awa ne te Ɔhene bɔ ɔfata paa, ofikyɛ ye kunu te páa, na mmerɛ biala ɔyɛ bɔ ɔte páa koso. (Mateo 11:28-30) Biekũ ne, ole tumi bɔ ɔkɔfa kɔboka sona ɔ, ofikyɛ anwuro yeɛ ɔkɔtena koli aseɛ so ɔ. Mmerɛ bɔ otingye fili ewue nu ne, bɛfale ye bɛhɔle anwuro, na ɔɔtenane Yehowa sa famaa so wondɛle. (Hebrifoɛ 10:12, 13) Ayieleɛ koraa ne, Nyameɛpiri mane ye tumi maa ɔhyɛle yebo lili hene.—Kenga Daniel 7:13, 14.
3. Nwamɔ yeɛ bɛne Yesu kɔbɔ nu koli Hene ɔ?
Mmeni kue bie bɔ bɛfrɛ bɛ “akrongronfoɛ” ne Yesu kɔbɔ nu koli hene wɔ anwuro. (Daniel 7:27) Akrongronfoɛ bɔ belimoa bɔ bɛyele bɛ yeɛ ole Yesu asomafoɛ naholɛfoɛ ne. Yehowa ahɔ so aye akrongronfoɛ mmienzua ne mmrasua waadwu ɛnnɛ. Kyɛbɔ betingyele Yesu maa onyane honhom nipadua ne, sɔ ala yeɛ bɛkoso betingye bɛ ɔ.—Kenga Yohane 14:1-3; 1 Korintofoɛ 15:42-44.
Mmenia nyɛɛ yeɛ bɛkɔhɔ anwuro ɔ? Yesu frɛle sɔ mmenia ne “mmoaen kue kãaba.” (Luka12:32) Ayieleɛ koraa ne, bɛ pembe koodwu 144,000. Bɛne Yesu kɔbɔ nu koli aseɛ so hene.—Kenga Nyekyire 14:1.
4. Mmerɛ bɔ Yesu hyɛle ye bo lili Hene ne, nzu yeɛ osile ɔ?
Nyameɛpiri Ahennie ne hyɛle yebo lili tumi wɔ afoɛ 1914 nu. * Mmerɛ bɔ Yesu ɔɔyɛle Ɔhene ne, nikyee bɔ olimoa yɛle yeɛ ole kyɛ ɔtole Satan ne ye abɔfo tɛɛ ne guale aseɛ so. Satan fɛle yaa paa, na ɔhyɛle yebo fale amaneɛnwunɛ wale aseɛ mukoraati so. (Nyekyire 12:7-10, 12) Ofi sɔ mmerɛ ne, sona ahɔ amaneɛnwunɛ bɔ enu yɛ se nu. Kõɛ, ɛhɔɛn, anwonyerɛ ahoroɛ, ɔne aseɛwosolɛ bɔ ɔkɔ so ne mukoraati te nzɛngyerɛneɛ bɔ okyire kyɛ ɔngɔhyɛ Nyameɛpiri Ahennie ne koli aseɛ so.—Kenga Luka 21:7, 10, 11, 31.
5. Nzu yeɛ Nyameɛpiri Ahennie ne yɛ ɔ?
Ɔnate asɛnga adwuma bɔ bɛyɛ ye wɔ ewiase mukoraati so ne, Nyameɛpiri Ahennie ne boaboa mmeni kue pirikua bie bɔ befi maenmaen mukoraati noa maa bɛbɔnu bɛyɛ kõ. Mmenia anwobrɛaseɛfoɛ million pẽe yeɛ bɛde Yesu bɛto nu kyɛ bɛ hene ɔ. Sɛ Nyameɛpiri Ahennie ne baasɛkye sɔ wiase nhyehyɛeɛ tɛɛ bɔ ɔwɔ berɛ kesalae ne a, ɔkɔbɔ sɔ mmenia nanwo waen. Yeti odikyɛ bɛbɔ bɛpena kyɛ benya Nyameɛpiri Ahennie nanu bie bɛtena ne mukoraati bɔ mmɔden kyɛ bɛkɔyɛ mmenia bɔ bɛso yɛ mmerɛ bɛkɔma Yesu.—Kenga Nyekyire 7:9, 14, 16, 17.
Wɔ afoɛ 1,000 nnisoɛ nanu ne, Ahennie ne kɔmaa atirimbɔ bɔ na ahyaseɛ ne Nyameɛpiri le ma sona ne kɔwa nu. Aseɛ ne mukoraati kɔkakyi paradise. Ayieleɛ koraa ne, Yesu kɔkakyi Ahennie ne kɔma ye Baba. (1 Korintofoɛ 15:24-26) Ɛse ebie bɔ ɛpena kyɛ ɛkã Nyameɛpiri Ahennie nanwo dwirɛ kyire ye anaa?—Kenga Edwein 37:10, 11, 29.
^ ngy. 6 Sɛ ɛpena ngyerɛkyiremuɛ pẽe bɔ ɔfa Bible nu ngɔmhyɛ bɔ ɔkã 1914 nwo dwirɛ a, nea Dɛn na Yebetumi Asua Afi Bible Mu? nwomaa ne ngrataabue 215-218.
