BUE 2
Nyameɛpiri Yeɛ Ole Nwa?
1. Nzuati yeɛ odikyɛ yɛsõ Nyameɛpiri ɔ?
Naholɛ Nyameɛpiri ne yeɛ ɔbɔle nikyee biala ɔ. Olle ahyaseɛ na ongonya ayieleɛ koso llé. (Edwein 90:2) Ye yeɛ ɔmaa bɛhwerɔle edwirɛ páa bɔ ɔwɔ Bible nanu ne ɔ. (1 Timoteo 1:11) Ɔnate kyɛ Nyameɛpiri yeɛ ɔmane yɛ ngõa nati, ye ngome yeɛ odikyɛ yɛsõ ye ɔ.—Kenga Nyekyire 4:11.
2. Sɛɛ yeɛ Nyameɛpiri te ɔ?
Sona biala nne berɛ bɔ wanwu Nyameɛpiri lé ɔ, ofikyɛ ɔte honhom, ɔkorɔn tra mmenia bɔ bɛte anwoɔnaen bɔ bɛwɔ aseɛ so ne koraa. (Yohane 1:18; 4:24) Nakoso, yɛkɔhora yɛkɔfa nningyein bɔ Nyameɛpiri abɔ so yekonwu ye su ahoroɛ ne. Kyɛ nneasoɛ ne, nnuaba ne flawɛs ahoroɛ bɔ wabɔ ne maa yenwu kyɛ ole ɔdɔ na ɔse nworɛ koso. Kyɛbɔ amanzaen he piri te ne maa yenwui kyɛ ole tumi paa.—Kenga Romanfoɛ 1:20.
Sɛ yɛkenga Bible ne a, yekɔhora yekosua Nyameɛpiri suban nwo nikyee pẽe. Kyɛ nneasoɛ ne, Bible ne maa yenwu bɔ Nyameɛpiri kuro, ɔne bɔ onguro, kyɛbɔ ɔne sona di, ɔne kyɛbɔ odi tebea biala nwo dwumaa.—Kenga Edwein 103:7-10.
3. Aso Nyameɛpiri le dumaa?
Yesu hãne kyɛ: “Yɛ Baba bɔ ɛwɔ anwuro, wɔ dumaa nwo te.” (Mateo 6:9) Ɔwɔ nu kyɛ Nyameɛpiri lé nzamranoa pẽe de, nakoso ye dumaa te kõmaapɛ. Ɔsono kyɛbɔ bɛbɔ dumaa ne wɔ dwudwolɛ biala nu ɔ. Wɔ Sehwi nu ne, bɛtaa bɛbɔ ye “Yehowa.” Nakoso ebiemɔ bɔ ye “Yahwe.”—Kenga Edwein 83:18.
Baye Nyameɛpiri dumaa ne bafi Bible ngyeraseɛ pẽe nala nu, na bafa nzamranoa bie te kyɛ Awurade ɔne Nyameɛpiri basi ye gya nu. Nakoso mmerɛ bɔ bɛhwerɔle Bible ne, Nyameɛpiri dumaa ne fitele nu kɔyɛ kyɛ mbɛen 7,000. Mmerɛ bɔ né Yesu kã Nyameɛpiri nwo dwirɛ kyire mmenia ne, ɔmaa benwuni ye dumaa.—Kenga Yohane 17:26.
Nea vidio bɔ yeɛ ole Aso Nyameɛpiri Le Dumaa?
4. Yeti Nyameɛpiri dwene yɛnwo anaa?
Tekyɛ baba bie bɔ ole ɔdɔ ne, Nyameɛpiri gu so ɔyɛ nikyeebie bɔ yekonya so mvasoɛ daa ɔ
Aso amaneɛnwunɛ bɔ ɔkɔ so ne kyire kyɛ Yehowa te Nyameɛpiri bɔ ɔnnwene yɛnwo anaa? Ebiemɔ susu kyɛ Nyameɛpiri fa amaneɛnwunɛ ba yɛ so fa sɔ yɛ nea, nakoso sɔ dwirɛ ne tte naholɛ.—Kenga Yakobo 1:13.
Nyameɛpiri ali yɛ ni, ofikyɛ wamaa yanya yenwo atẽe maa yɛkora yɛyɛ bɔ yekuro ɔ. Aso ɔnyɛ yɛ fɛ kyɛ yɛbɔbɔ yɛkora yefi yɛ pɛ nu yɛsi gyinaeɛ kyɛ yɛkɔsõ Nyameɛpiri anaa? (Yosua 24:15) Nakoso mmeni pẽe hyɛ da yɛ afoforɛ bɔne na ɛhe amaa amaneɛnwunɛ pẽe abu so. Sɛ Yehowa nwu sɔ nningyein tɛɛ ne a, odi yalɛ.—Kenga Genesis 6:5, 6.
Yehowa te Nyameɛpiri bɔ ɔdwene yɛnwo. Ɔpena kyɛ yɛnye gye wɔ y’asetena nu. Ɔngɔhyɛ ɔkɔye amaneɛnwunɛ ne bɛbɔ bɛfa bɛba ne kofi berɛ. Nakoso, nikyee páa bie ti yeɛ wama atẽe maa amaneɛnwunɛ kɔso ne. Yekosua bɔ ɔmaa wayɛ sɔ nanwo nikye wɔ Adesua bɔ ɔtɔ so 8 nanu.—Kenga 2 Petro 2:9; 3:7, 13.
5. Yɛkɔyɛ sɛɛ na yahora yapingye Nyameɛpiri?
Yehowa to asaa frɛ yɛ kyɛ yɛfa mbaebɔ so yepingye ye. Odwene yenu biala nwo kyɛ angorangora. (Edwein 65:2; 145:18) Wayɛ krado kyɛ ɔkɔfa yɛ bɔne kɔhyɛ yɛ. Onwu mmɔden bɔ yɛbɔ kyɛ yɛkɔyɛ bɔ ɔsɔ yenye ne, ɔmva yenwo kyɛ ɔtɔ mmerɛ bie a yɛyɛ bɔne ne. Ɔwɔ nu kyɛ yɛtɔ sĩ de, nakoso yɛkɔhora ne Nyameɛpiri konya abusuabɔ bɔ enu yɛ se paa.—Kenga Edwein 103:12-14; Yakobo 4:8.
Ɔnate kyɛ Yehowa yeɛ wama yɛ ngõa nati, odikyɛ yɛdɔ ye yɛtra ebiala. (Marko 12:30) Sɛ esua Nyameɛpiri nwo nikyee pẽe na ɛyɛ ye apɛdeɛ a, ɛfa kyire kyɛ ɛdɔ ye, na ɛhene kɔmaa ekopingye ye mmerɛ biala.—Kenga 1 Timoteo 2:4; 1 Yohane 5:3.
