BUE 5
Atirimbɔ Beni Yeɛ Nyameɛpiri Le Ma Aseɛ Ne? Ɔ?
1. Nzuati yeɛ Nyameɛpiri bɔle aseɛ ne ɔ?
Yehowa bɔle aseɛ ne mane mmienzua ne mmrasua. Ɔte y’awuro. Yeti, wammɔ mmenia nyɔ bɔ bɛlimoa ne, Adam ne Hawa kyɛ bɛwo begua anwuro—ofikyɛ na Nyameɛpiri alimoa wabɔ abɔfoɛ kyɛ bɛtena anwuro. (Hiob 38:4, 7) Mmom ne, Nyameɛpiri fale bienzua bɔ olimoa ne ɔɔtenane paradise bie bɔ enu yɛ anigye bɔ bɛfrɛ ye Eden turo nu. (Genesis 2:15-17) Yehowa mane Adam ne ye maamɔ bɔ na ɔkɔwo bɛ ne anyelasoɛ kyɛ bɛkɔtena ase anigye nu daa wɔ aseɛ so.—Kenga Edwein 37:29; 115:16.
Ahyaseɛ ne, na Eden turo ne ngome yeɛ na ɔte paradise ɔ. Ne bienzua ne brasua bɔ belimoa ne kɔwo maa aseɛ ne koyi. Afei mmerɛ kɔ so ne, na bekoli aseɛ mukoraati so maa ɔkɔkakyi paradise. (Genesis 1:28) Bɛngɔsɛkye aseɛ ne llé. Sona kɔtena so daa.—Kenga Edwein 104:5.
Nea vidio bɔ yeɛ ole Nzuati Yeɛ Nyameɛpiri Bɔle Aseɛ Ne Ɔ?
2. Nzuati yeɛ ɛnnɛ aseɛ ne tte paradise kõ ɔ?
Adam ne Hawa andie Nyameɛpiri, yeti Yehowa fõane bɛ fili gaden nanu berɛ. Paradise minine, na sona biala nne berɛ bɔ wahora wafa wawa biekũ ɔ. Bible ne kã kyɛ: “Aseɛ po wafa wawura ɔbɔnefoɛ ne sa.”—Hiob 9:24.—Kenga Genesis 3:23, 24.
Aso Yehowa asesa ye atirimbɔ wɔ nikyehorɛ tibɔ ɔbɔle sona guale aseɛ so nanwo anaa? Daabi! Ɔte nikyee mukoraati so tumvoɛ. Bɔ ɔkã biala ba nu. (Yesaia 45:18) Okosa kɔfa asetena bɔ na ahyaseɛ ne, ɔpena kyɛ sona nyae ne kɔwa biekũ.—Kenga Edwein 37:11, 34.
3. Ɔkɔyɛ sɛɛ na Paradise awa biekũ?
Paradise kosa kɔwa mmerɛ bɔ Yesu di aseɛ so kyɛ Ɔhene bɔ Nyameɛpiri aye ne. Wɔ Harmagedon kõɛ nanu ne, Yesu koli Nyameɛpiri abɔfoɛ nyunu maa bɛkɔsɛkye bɛbɔ bedwoso betia Ye ne mukoraati. Afei, Yesu kɔfa Satan kɔto prisaen afoɛ 1,000. Nyameɛpiri mmenia konya beti bekodidi nu wɔ sɔ sɛkyelɛ nanu, ofikyɛ Yesu kohyire b’atẽe na wabɔ bɛnwo waen. Ɔba sɔ a, bɛkɔtena ase daa wɔ paradise aseɛ so.—Kenga Nyekyire 20:1-3; 21:3, 4.
4. Mmerɛ beni yeɛ amaneɛnwunɛ bo kɔpɛ ɔ?
Mmerɛ beni yeɛ Nyameɛpiri kɔye bɔne kofi aseɛ so ɔ? Yesu fale ‘‘nzɛngyerɛneɛ’’ bie bɔ ɔkɔmaa yekonwu kyɛ mmerɛ bɔ yɛwɔ nu he ayieleɛ ne apingye mane. Nningyein tɛɛ bɔ ɔkɔ so wɔ ewiase he anu ne amaa adasa suro kyɛ bɛbo kɔyera, na ɛhe maa yenwu kyɛ yɛte ‘‘ayieleɛ mmerɛ nanu.”—Kenga Mateo 24:3, 7-14, 21, 22.
Mmerɛ bɔ Yesu fa afoɛ 1,000 fi anwuro di aseɛ so Hene ne, ɔkɔye amaneɛnwunɛ mukoraati kofi berɛ. (Yesaia 9:6, 7; 11:9) Yesu koli Hene, na wasa wasõ kyɛ Sɔfo Panyi, na okokyikyi bɔne bɔ ɔwɔ bɛbɔ bɛdɔ Nyameɛpiri nanwo ne mukoraati. Yeti Nyameɛpiri kɔfa Yesu so kɔye anwonyerɛ, mbanyiyɛlɛ ɔne ewue kofi berɛ.—Kenga Yesaia 25:8; 33:24.
5. Nwamɔ yeɛ bɛkɔtena Paradise bɔ ɔba nanu bie ɔ?
Sɛ ɛkɔ Ahennie Asa so a, ekonwu mmenia bɔ bɛdɔ Nyameɛpiri na bɛpena kyɛ bɛyɛ bɔ ɔsɔ ye nye ɔ
Mmenia bɔ bɛyɛ setie bɛma Nyameɛpiri ne yeɛ bɛkɔtena Paradise ɔ. (1 Yohane 2:17) Yesu somane yesĩlilɛfoɛ ne kyɛ bɛɛpena anwobrɛaseɛfoɛ na behyirehyire bɛ bɔ bɛyɛ a, bɛkɔhora bɛkɔsɔ Nyameɛpiri nye ɔ. Ɛnnɛ, Yehowa kyirekyire mmenia million pẽe kyɛbɔ ɔkɔyɛ a bekonya Paradise bɔ ɔba nanu bie bɛkɔtena ɔ. (Zefania 2:3) Wɔ Yehowa Adanzefoɛ Ahennie Asa so ne, mmenia sua bɔ bɛkɔyɛ na bahora bayɛ hũɛ ne baba páa, ɔne yeɛ ne mmaame páa ɔ. Ngwalaa ne awofoɛ mukoraati bɔ nu bɛsõ, na besua kyɛbɔ bekonya edwirɛ páa naso mvasoɛ ɔ.—Kenga Mika 4:1-4.
