Nyameɛpiri to asaa frɛ mmenia bɔ bɛwɔ nekaa biala kyɛ bɛfa mbaebɔ so bepingye ye. (Edwein 65:2) Nakoso, ɛhene ngyire kyɛ otie mbaeɛ biala, anaa ode to nu. Kyɛ nneasoɛ ne, sɛ bienzua bie teetee ɔye a, ɛhene kɔhora kosi ye mbaeɛ nwo atẽe. (1 Petro 3:7) Afei koso, mmerɛ bɔ Israelfoɛ ne hɔle so yɛle bɔne ne, Nyameɛpiri andie bɛ mbaebɔ. Naholɛnu ne, mbaeɛ te yenwo atẽe paa bɔ yanyae ɔ. Nakoso, sɛ abɔnefoɛ bɔ bedi bɔne mbiri po sakra fi bɛ bɔne nwo, na sɛ bɛbɔ mbaeɛ a, Nyameɛpiri kotie bɛ.​—Kenga Yesaia 1:15; 55:7.

Nea vidio bɔ yeɛ ole Yeti Nyameɛpiri Tie Mbaeɛ Biala Anaa?

Mbaebɔ boka yɛ soen so, yeti Yehowa bɔ ɔte yɛ Bɔfoɛ ne ngome yeɛ odikyɛ yɛbɔ ye mbaeɛ ɔ. (Mateo 4:10; 6:9) Afei koso, ɔnate kyɛ bɔne wɔ yɛnwo nati, odikyɛ yɛbɔ mbaeɛ wɔ Yesu dumaa nu ofikyɛ ye yeɛ owu mane yɛ bɔne ɔ. (Yohane 14:6) Yehowa mbena kyɛ yɛkye mbaeɛ bie yegua yɛ tianu, anaa yɛtwerɔ yɛto berɛ na yanea so yabɔ ye daa. Ɔpena kyɛ yefi y’ahone nu yɛbɔ mbaeɛ.​—Kenga Mateo 6:7; Filipifoɛ 4:6, 7.

Sɛ yɛbɔ mbaeɛ na yammukye yɛnoa po a, yɛ Bɔfoɛ ne kɔhora kɔte. (1 Samuel 1:12, 13) Ɔkã kyire yɛ kyɛ yɛbɔ ye mbaeɛ mmerɛ biala, kyɛ ɔte ngyerɛmɔ anaa nnɔsoa, mmerɛ bɔ yɛbaadidi, ɔne mmerɛ bɔ yeyia ɔhaw ahoroɛ bie ne.​—Kenga Edwein 55:22; Mateo 15:36.

Ɔlla ase koraa kyɛ yekopingye Nyameɛpiri, ofikyɛ bɛbɔ yɛne bɛ te ne te mmenia bɔ belle gyidie, na bedi ɛbɔ bɔ  Nyameɛpiri ahyɛ kyɛ ɔkɔfa asomdwee kɔwa aseɛ so nanwo fɛw. (2 Timoteo 3:1, 4; 2 Petro 3:3, 13) Yeti yenwo hia kyɛ yɛne yɛ mvɛfoɛ gyidifoɛ yianu na yɛhyehyɛ yɛnwo ngunaen mmerɛ biala.​—Kenga Hebrifoɛ 10:24, 25.

Sɛ yɛne mmenia bɔ bɛdɔ Nyameɛpiri bɔ a, ɔboka maa yɛkora yepingye Nyameɛpiri. Nhyiamu ahoroɛ bɔ Yehowa Adanzefoɛ kɔ ne maa ebiala nya yenwo atẽe hyɛ ye mango gyidie serɛ.​—Kenga Romanfoɛ 1:11, 12.

Sɛ ɛdwendwene bɔ asua afi Yehowa Dwirɛ nu nanwo a, ɛkɔhora kopingye ye. Dwendwene ye nnwumaa, ye afotue, ɔne ye bɔhyɛ ahoroɛ nwo. Sɛ yɛbɔ mbaeɛ na yɛdwendwene nningyein nwo a, ɔmaa yekyire Nyameɛpiri dɔ ɔne nworɛ bɔ ole ye nanwo anisɔ.​—Kenga Yosua 1:8; Edwein 1:1-3.

Sɛ ɛfa wɔnwo to Nyameɛpiri so ná enya yenu gyidie ngome a, yeɛ ɛkɔhora kopingye ye ɔ. Nakoso, gyidie te kyɛ abɔdeɛ bɔ ngõa wɔ nu ɔ, daa ohia aleɛ ne nzue. Odikyɛ ɛkɔso dwendwene nikyeholɛ tibɔ ede nningyein biemɔ di nanwo, kyɛbɔ ɔkɔyɛ a wɔ gyidie kɔhɔ so kɔyɛ se ɔ.​—Kenga Mateo 4:4; Hebrifoɛ 11:1, 6.

Yehowa dwene bɛbɔ bɛdɔ ye nanwo. Ɔkɔhora kɔbɔ bɛnwo waen kofi nikyee biala bɔ ɔkɔhora kɔsɛkye bɛ gyidie ne daa ngõa nwo anyelasoɛ bɔ bele ye nanwo. (Edwein 91:1, 2, 7-10) Ɔbɔ yɛ kɔkɔ wɔ abrabɔ biala bɔ ɔkɔhora kɔfa y’akwanwosaen kɔto asiane nu, anaa ɔkɔsɛkye y’anigye nanwo. Yehowa yeɛ okyire yɛ atẽe bɔ ɔte páa tra biala bɔ yɛfa so yɛbɔ yɛ bra ɔ.​—Kenga Edwein 73:27, 28; Yakobo 4:4, 8.