ADESUA 01

Sɛɛ Yeɛ Bible Ne Kɔhora Kɔboka Wɔ Ɔ?

BƆ

Yenu biala lé nzɛmmisa bɔ ɔfa abrabɔ, amaneɛnwunnɛ, ewue, ɔne kyẽabie nwo. Yesa koso yɛdwene bɔ yɛyɛe kyẽa biala wɔ y’asetena nu nanwo te kyɛ adwuma páa bɔ yekonya yɛkɔyɛ ɔne kyɛbɔ yekonya abusua nu anigye ɔ. Sɛ ɛhene la ahãmeɛ a, mmeni pẽe anwui kyɛ Bible nu afutuo boka bɛ maa besi gyinaeɛ páa wɔ bɛ asetena nu. Aso, edé di kyɛ Bible ne kɔhora kɔboka ebiala anaa?

1. Nzɛmmisa benimɔ yeɛ Bible ne ma yenwo mmuaeɛ ɔ?

Bible ne ma nzɛmmisa bɔ yenwo hia hemɔ nwo mmuaeɛ: Ɔyɛle sɛɛ yeɛ ngõa wale ɔ? Nzuati yeɛ yɛwɔ wa ɔ? Nzuati yeɛ mmeni páa nwu amaneɛ ɔ? Sɛ ebie wu a, nzu yeɛ ɔto ye ɔ? Sɛ ebiala kuro asomdwee a, yede nzuati yeɛ kõɛ té kɔso ɔ? Nzu yeɛ ɔkɔto aseɛ ne kyẽabie ɔ? Ɔtte mvomsoɛ kyɛ ebie kobisa edwirɛ hemɔ anu biala ɔ, nakoso Bible ne kɔhora kɔboka wɔ maa ekonya enu biala nwo mmuaeɛ maa w’ahõne kɔtɔ wɔ kunu.

2. Sɛɛ yeɛ Bible ne kɔhora kɔboka yɛ maa yekonya asetena nu anigye ɔ?

Bible ne ma yɛ afutuo páa. Kyɛ nneasoɛ ne, okyirekyire mmusua kyɛbɔ bekonya anigye bɔ odi mũ ɔ. Ɔma yɛ afutuo bɔ ɔfa ɛfɛɛ ɔne kyɛbɔ yɛkɔmaa yenye kɔgye y’adwuma nwo. Ekosua kyɛbɔ Bible ne kyirekyire edwirɛti ahoroɛ hemɔ ɔne pẽe bɔ ɔbokaso nu, mmerɛ bɔ yebonu yesusu yenwo ne. Ekoole kotu nu kyɛ “twerɔnzɛm ne mukoraati anaa [nikye biala bɔ ɔwɔ Bible nanu] ne . . . mvasoɛ wɔ so.”—2 Timoteo 3:16.

Nnwomaa he nzi Bible ne gyanu. Na mmom, ɔhyɛ wɔ ngunaen maa wɔ bɔbɔ ɛneanea Bible nanu. Yeti, ɛyaa bɔ mmɔden kenga twerɔnzɛm bɔ ɔwɔ adesua nanu ne, na fa toto bɔ esua nanwo.

SUA PẼE BOKASO

Susu kyɛbɔ Bible ne asi aboka mmenia, kyɛbɔ wɔnye kɔhora kɔgye mmerɛ bɔ ɛkenga ne, ɔne bɔ yeti yeɛ ɔte páa kyɛ ebie kɔboka wɔ maa ɛkɔte yebo nanwo.

3. Bible ne kɔhora kohyire yɛ atẽe

Bible ne tekyɛ kanea bie bɔ ɔtá hyireen. Ɔkɔhora kɔboka yɛ kohyire yɛ atẽe maa yekosisi gyinaeɛ ahoroɛ bɔ ɔte páa na ɔkɔmaa yekonwu bɔ ɔla ye nyunu kyẽabie koso.

Kenga Edwein 119:105, na susu nzɛmmisa ahoroɛ he anwo:

Sɛɛ yeɛ bɔ ɔhworɔle sɔ dwein he ne bu Bible ne ɔ?
Sɛɛ yeɛ ebu Bible ne ɔ?

4. Bible ne kɔhora kɔye yɛ nzɛmmisa ahoroɛ noa

Brasua bie nwuni kyɛ Bible ne ama nzɛmmisa ahoroɛ bɔ watetee afoɛ pẽe ɛhe nanwo mmueɛ. Bɔ VIDIO ne, na afei susu nzɛmmisa ahoroɛ bɔ ɔtoa so nanwo.

VIDIO: Nnɛyakyi Wɔ Anyelasoɛ Nu! (1:48)

Vidio nanu ne, nzɛmmisa ahoroɛ beni yeɛ ne brasua ne le ye ɔ?
Sɛɛ yeɛ Bible né bɔ osuane ne bokale ye ɔ?

Bible ne hyɛ yɛ ngunaen kyɛ yebisa edwirɛ. Kenga Mateo 7:7, na afei susu bɔ oli so he anwo:

Nzɛmmisa beni yeɛ ele ye bɔ Bible ne kɔhora kɔmaa ekonya yenwo mmuaeɛ ɔ?

5. Wɔnye kɔhora kɔgye Bible ne kengalɛ nwo

Mmeni pẽe nye agye kyɛ bɛkenga Bible ne, na benya so mvasoɛ ɔ. Bɔ VIDIO ne, na afei susu nzɛmmisa ahoroɛ bɔ ɔtoa so nanwo.

VIDIO: Bible Kengalɛ (2:05)

Vidio nanu ne, sɛɛ yeɛ mmabunu nemɔ tele ngã wɔ ɛkengalɛ nwo ɔ?
Ɔwɔ nu bɛnye ngye ɛkengalɛ nwo de, nakoso nzuati yeɛ Bible ne kengalɛ yɛ bɛ fɛ ɔ?

Bible ne kã kyɛ ɔkɔhora kɔma yɛ akwangyerɛ bɔ awerɛkyekyerɛ wonu na wama yanya anyelasoɛ. Kenga Romanfoɛ 15:4, na afei susu nzɛmmisa he anwo:

Aso wɔnye gye Bible nu bɔhyɛ bɔ ɔte awerɛkyekyerɛ na ɔma anyelasoɛ nanwo anaa?

6. Ebiemɔ kɔhora kɔboka yɛ maa yɛkɔte Bible nabo

Kyɛ ahãa bɛngome bɛkɔkenga Bible ne, mmeni pẽe anwu kyɛ sɛ bɛne afoforɛ susu yenwo a ɔboka. Kenga Asomafoɛ Ne Nnwumaa 8:26-31, na afei susu nzɛmmisa he anwo:

Yɛkɔyɛ sɛɛ na yahora yate Bible nabo? —Nea ngyekyɛmuɛ 30 ne 31.

Né Ethiopianiɛ abrandeɛ ne hia mmokalɛ na wahora wate twerɔnzɛm nabo. Mmeni pẽe bɔ bɛwɔ berɛ ɛnnɛ anwui kyɛ, sɛ bɛne afoforɛ bonu susu Bible nanwo a, mvasoɛ wɔ so

EBIEMƆ KÃ KYƐ: “Sɛ esua Bible ne a, né ɛsɛkye wɔ mmerɛ mbaen.”