ADESUA 03
Aso Ɛkɔhora Kɔfa Wɔnwo Kɔto Bible Naso?
Bible ne hyɛ bɔ ahoroɛ, na ɔma afutue pẽe koso. Ebie a yɛkãe, ele ɔpɛ kyɛ ekonwu bɔ Bible ne kyirekyire ɔ, nakoso, w’adwene nzi wɔ pi. Bɔhyɛ ne afutue bɔ ɔwɔ nwomaa bɔ wahyɛ he anu ne, odikyɛ ɛfa wɔnwo to so anaa? Aso ɛkɔhora kolé bɔ Bible ne kã fa anigye bɔ ekonyae ɛnnɛ, ɔne kyẽabie nwo ne koli anaa? Mmeni pẽe dé tonu. Yɛnea kyɛ wɔ koso ɛkɔhora kɔyɛ sɔ anaa.
1. Aso edwirɛ bɔ ɔwɔ Bible nanu ne te nahorɛ?
Bible nanu ne, “edwirɛ bɔ ɔte nahorɛ” yeɛ ɔwɔ nu ɔ. (Ɔsɛngafoɛ 12:10) Ɔkã bɔ osisili bɔ ɔfa mmenia bɔ bɛtenane ase nwo dwirɛ. (Kenga Luka 1:3; 3:1, 2.) Mmerɛ, mmenia, nekaa ahoroɛ, ɔne dwumadié ahoroɛ bɔ yenwo dwirɛ wɔ Bible nu ne, bɛbɔ bɛkã abakɔsɛm ɔne bɛbɔ betutu aseɛ nwo ne kã kyɛ, ɔte nahorɛ.
2. Nzuati yeɛ yɛkɔhora yɛkɔhã kyɛ Bible ne pɛlle nu ɔ?
Bible ne ala yenwo ali atẽe pẽe so kyɛ, enu dwirɛ ne té yɛ adwuma. Kyɛ nneasoɛ ne, ɔkã nyanzanwu nwo dwirɛ. Nyanzanwu nwo dwirɛ bɔ Bible ne kã ne, né mmeni pẽe nné nni kyɛ ɔte nahorɛ. Nakoso ɛnnɛ, nyanzanwufoɛ aalé ato nu kyɛ bɔ Bible ne kã ne te nahorɛ. Na “yɛkɔhora yɛkɔfa yɛnwo yɛkɔto so ɛnnɛ, ɔne daa.”—Edwein 111:8.
3. Nzuati yeɛ yɛkɔhora yekole bɔ Bible ne kã fa kyẽabie nwo ne yɛkɔtonu ɔ?
Ngɔmhyɛ ahoroɛ pẽe yeɛ ɔwɔ Bible nanu a bɔ ɔkã “nningyein bɔ onya sisili nwo dwirɛ ɔ.” (Aizaya 46:10) Ɔhãne nningyein ahoroɛ nwo dwirɛ tole berɛ pɛpɛɛpɛ afoɛ pẽe kora yeɛ ɔbaasisi ɔ. Osa hãne nningyein pẽe bɔ okosisi ɛnnɛ nanwo dwirɛ hɔle sĩɛ. Adesua he anu ne, yekosusu Bible nu ngɔmhyɛ ahoroɛ biemɔ nwo. Na enwu kyɛbɔ bɛwale nu ne a, ɔkɔyɛ wɔ nwanwa!
SUA PẼE BOKASO
Nea kyɛbɔ nyanzanwu bɔ ɔwɔ berɛ ɛnnɛ ne, ɔne Bible ne yia ɔ, ná yɛ Bible nu ngɔmhyɛ ahoroɛ bɔ ɔyɛ nwanwa nanu nhwehwɛmuɛ.
4. Nyanzanwu ne Bible ne yia
Tete mmerɛ nu ne, né mmeni pẽe dé tonu kyɛ aseɛ sinzé nikyee bie so. Bɔ VIDIO ne.
Hyɛ bɔ bahã ye wɔ Yob nwomaa nanu kobo afoɛ 3,500 ɛhe ne nzorɛ. Kenga Yob 26:7, na susu nzɛmmisa he anwo:
-
Nzuati yeɛ edwirɛ, aseɛ ne, “osinnzé hwee so” ne yɛ nwanwa ɔ?
Afoɛ 1800 mmerɛ nanu, yeɛ nyanzanwufoɛ bɛɛtele kyɛbɔ nzue di kyinhyia nabo ɔ. Nakoso, né Bible ne alimoa ahã yenwo dwirɛ ato berɛ kɔyɛ afoɛ 3,500 ɛhe. Kenga Yob 36:27, 28, na susu nzɛmmisa hemɔ nwo:
-
Nzu yeɛ ɔmaa kyɛbɔ nzue di kyinhyia ne kã w’ahõne ɔ?
-
Twerɔnzɛm bɔ ɛkengale ne, sɛɛ yeɛ wahyɛ anwotɔsoɛ bɔ ele ye wɔ Bible nanu ne serɛ ɔ?
5. Bible ne hyɛle edwirɛ titire bɔ ɔkosisi nwo ngɔm tole berɛ
Kenga Aizaya 44:27–45:2, na susu nzɛmmisa he anwo:
-
Edwirɛ benimɔ yeɛ Bible ne hyɛle yenwo ngɔm tole berɛ, afoɛ 200 kora yeɛ bɛsɛkye Babilɔn ɔ?
Abakɔsɛm kyire kyɛ, Persia Hene Kores ne y’asraafoɛ lili Babilɔn kuro naso ngunim kɔyɛ afoɛ 539 K.Y.B. b Bɛkakyile Nzue bɔ ne ɔbɔ kuro nanwo waen ne nye. Bewurale kuro nanu bɔ né ye anoa ne la so ɔ, na belili bɛso ngunim bɔ baangõ ɔ. Ɛnnɛ, kɔbo afoɛ 2,500 ɛhe ne, Babilɔn kuro ne akakyi kurofõe. Hyɛ bɔ Bible ne hã tole berɛ ne nzorɛ.
Kenga Aizaya 13:19, 20, na susu nzɛmmisa he anwo:
-
Sɛɛ yeɛ bɔ ɔtole Babilɔn ne maa ngɔmhyɛ he ba nu ɔ?
Babilɔn kurofõe wɔ ɛnnɛ mmerɛ nu Iraq
6. Bible ne hyɛle ngɔm fale nningyein ahoroɛ bɔ yenwui ɛnnɛ nanwo
Bible ne kã kyɛ, yɛte “ayieleɛ mmerɛ” nu. (2 Timoteo 3:1) Hyɛ bɔ Bible ne hã fale ayieleɛ mmerɛ he anwo ne nzorɛ.
Kenga Mateo 24:6, 7, na susu nzɛmmisa he anwo:
-
Nningyein titire benimɔ yeɛ Bible ne hãne kyɛ okosisi, wɔ ayieleɛ mmerɛ nanu ɔ?
Kenga 2 Timoteo 3:1-5, na susu nzɛmmisa hemɔ nwo:
-
Subaen benimɔ yeɛ Bible ne hãne kyɛ, mmenia kɔla yali wɔ ayieleɛ mmerɛ nanu ɔ?
-
Subaen hemɔ anu beni, yeɛ ahyɛ ye nzorɛ kyɛ mmenia da yali ɔ?
EBIEMƆ KÃ KYƐ: “Bible ne te nwomaa bɔ ɛhoaa ngome yeɛ ɔwɔ nu ɔ.”
-
Esusu yenwo sɛ́, nzu yeɛ ɔmaa edé di kyɛ yɛkɔhora yɛkɔfa yɛnwo yɛkɔto Bible naso ɔ?
YEMUABƆLƐ
Abakɔsɛm, nyanzanwu, ɔne ngɔmhyɛ mukoraati da yali kyɛ, yɛkɔhora yɛkɔfa yɛnwo yɛkɔto Bible naso.
Ndimu
-
Aso Bible nanu dwirɛ ne te nahorɛ anaakyɛ ɔte ɛhoaa?
-
Nningyein benimɔ anu yeɛ nyanzanwu ne Bible ne yia ɔ?
-
Edé di kyɛ Bible ne kã bɔ okosi kyẽabie nwo dwirɛ anaa? Nzuati ɔ, anaa nzuati yeɛ enné nni ɔ?
NEA ƐHE KOSO
Aso nyanzanwu nwo dwirɛ bɔ ɔtte nahorɛ wɔ Bible nanu anaa?
Nahorɛ dwirɛ beni yeɛ ɔfa “ayieleɛ mmerɛ” nanwo ɔ?
“Bible Nu Ngɔmhyɛ 6 Bɔ Onya Mmamuɛ Ɔ” (The Watchtower, May 1, 2011)
Sua Bible nu ngɔmhyɛ ahoroɛ bɔ ɔfa Hela Ahennie nanwo nikye.
Nea kyɛbɔ Bible ngɔmhyɛ ahoroɛ sesãne biãa bie adwene wɔ Bible nanwo ɔ.
“Né Menné Menni Kyɛ Nyameɛpiri Wɔ Berɛ” (The Watchtower No. 5 2017)
