ADESUA 04
Nwa Yeɛ Ole Nyameɛpiri?
Ofi mmerɛ bɔ sona tenane ase ne, basõ nyameɛ ne ahoni ahoroɛ pẽe. Nakoso, Bible ne kã Nyameɛpiri kõmaapɛ bɔ ɔte “piri tra nyameɛ ahoroɛ ne mukoraati” nwo dwirɛ. (2 Beresosɛm 2:5) Ye yeɛ ole nwa? Na nzu yeɛ ɔmaa ɔte piri tra nyameɛ ahoroɛ bɔ mmenia sõ bɛ ne mukoraati ɔ? Adesua he anu ne, ekonwu kyɛbɔ Nyameɛpiri da yenwo ali kyire wɔ ɔ.
1. Nyameɛpiri dumaa li sɛɛ, na yɛyɛ sɛɛ yeɛ yenwu kyɛ ɔpena kyɛ yenwu ye dumaa ne ɔ?
Wɔ Bible nu ne, Nyameɛpiri bɔbɔ da yenwo ali kyire yɛ. Yenwa: “Me yeɛ nné Yehowa. Me dumaa ɛne.” (Kenga Aizaya 42:5, 8.) Dumaa “Yehowa” ne te Hebri ngyerɛaseɛ bɔ okyire kyɛ “Ɔkɔhora Kɔyɛ Yenwo Bɔ Okuro Biala.” Yehowa pena kyɛ yenwu ye dumaa. (Ɛzadɔs 3:15) Yɛyɛ sɛɛ yeɛ yenwui ɔ? Bible nu ne, ye dumaa ne fité kɔbo 7,000! a Dumaa Yehowa ne te “nahorɛ Nyameɛpiri bɔ ɔbɔle anwuro ne aseɛ” ne deɛ.—Deuteronomi 4:39.
2. Nzu yeɛ Bible ne kã fa Yehowa nwo ɔ?
Bible ne kã kyɛ nyameɛ ahoroɛ bɔ mmenia sõ bɛ ne mukoraati ne, Yehowa ngõme yeɛ ɔte nahorɛ Nyameɛpiri ne ɔ. Nzuati ɔ? Ogyĩ ngyirekyiremuɛ pẽe so. Yehowa lé tumi tra ebiala, na ye ngõme yeɛ ɔte “Piri wɔ anwuro ne aseɛ mukoraati so ɔ.” (Kenga Edwein 83:18.) Ye yeɛ ɔte “Otumvoɛ,” na bɔ okyire yeɛ olé kyɛ, ye yeɛ olé tumi bɔ ɔkora fa yɛ nikyee biala bɔ okuro ɔ. Ye yeɛ “ɔbɔle nikyee biala”—nningyein bɔ ɔwɔ amanzaen he anu, ɔne ngõa bɔ ɔwɔ aseɛ so mukoraati. (Nyekyire 4:8, 11) Yehowa ngõme yeɛ w’atena ase fi teteete, na ɔkɔhɔso alaa kɔtena berɛ daa.—Edwein 90:2.
SUA PẼE BOKASO
Nea nzonzoneɛ bɔ ɔla Nyameɛpiri dumaa ne nzamranoa bɔ olé ye nanu. Na sua kyɛbɔ wamaa anwu ye dumaa na wala yali wahyire wɔ nanwo nikye.
3. Nyameɛpiri lé nzamranoa pẽe, nakoso ye dumaa te kõ pɛ
Sɛ ɛpena kyɛ enwu nzonzoneɛ bɔ ɔla nzamranoa bɔ ɔla ebie so, ɔne ye dumaa nu a, bɔ VIDIO ne, na susu nzɛmmisa bɔ oliso he anwo.
-
Nzonzoneɛ beni yeɛ ɔla nzamranoa, tekyɛ “Awurade,” ɔne dumaa afĩa ɔ?
Bible ne kã kyɛ mmenia sõ nyameɛ ne meneɛ ahoroɛ pẽe. Kenga Edwein 136:1-3, na susu nzɛmmisa he anwo:
-
Nwa yeɛ ole “nyameɛmɔ nu Nyameɛpiri” ɔne “meneɛmɔ nu Meneɛ ne”?
4. Yehowa pena kyɛ enwu ye dumaa na ɛfa yɛ adwuma
Nzu yeɛ okyire kyɛ, Yehowa pena kyɛ enwu ye dumaa ɔ? Bɔ VIDIO ne, na susu nzɛmmisa bɔ oliso hemɔ anwo.
-
Esusu kyɛ Yehowa pena kyɛ benwu ye dumaa ne anaa? Nzuati ɔ?
Yehowa pena kyɛ mmenia fa ye dumaa ne di dwumaa. Kenga Romanfoɛ 10:13, na susu nzɛmmisa hemɔ anwo:
-
Nzuati yeɛ yenwo hia kyɛ, yɛfa Nyameɛpiri dumaa Yehowa ne yedi dwumaa ɔ?
-
Sɛ ebie kae wɔ dumaa na ɔfa frɛ wɔ a, sɛɛ yeɛ ɛte ngã ɔ?
-
Sɛ ɛfa Yehowa dumaa ne di dwumaa a, sɛɛ yeɛ ɔte ngã ɔ?
5. Yehowa pena kyɛ epingye ye
Maame bie bɔ ofi Cambodia bɔ ye dumaa li Soten hãne kyɛ, Nyameɛpiri dumaa bɔ mma nwuni ne bokale me maa nyane “anigye bɔ odi mũ” paa. Bɔ VIDIO ne, na susu nzɛmmisa bɔ oliso he anwo:
-
Vidio nanu ne, sɛɛ yeɛ Nyameɛpiri dumaa bɔ Soten nwuni ye ne, hãne ye ɔ?
Kora bɔ ɛkɔɔyɛ ebie damvo ne, odikyɛ enwu ye dumaa. Kenga Yakobo 4:8a, na susu nzɛmmisa hemɔ anwo:
-
Nzu yeɛ Yehowa pena kyɛ ɛyɛ ɔ?
-
Sɛɛ yeɛ Nyameɛpiri dumaa bɔ ekonwui ne kɔboka wɔ maa ɛkɔhwẽ kopingye ye ɔ?
EBIEMƆ KÃ KYƐ: “Nyameɛpiri kõmaapɛ yeɛ ɔwɔ berɛ ɔ, yeti kyɛbɔ ɛkɔfrɛ ye biala odé to nu.”
-
Aso edé di kyɛ Yehowa te Nyameɛpiri dumaa?
-
Sɛɛ yeɛ ekohyirehyire kyɛbɔ Nyameɛpiri pena kyɛ yɛfa ye dumaa ne yedi dwumaa nanu ɔ?
YEMUABƆLƐ
Yehowa te nahorɛ Nyameɛpiri kõmaapɛ ne dumaa. Ɔpena kyɛ yenwu sɔ dumaa ne, na yɛfa yedi dwumaa, na wamaa yahwẽ y’apingye ye.
Ndimu
-
Sɛɛ yeɛ Yehowa da nzorɛ wɔ nyameɛ ahoroɛ bɔ mmenia sõ bɛ ne mukoraati nwo ɔ?
-
Nzuati yeɛ odikyɛ yɛfa Nyameɛpiri dumaa ne yedi dwumaa ɔ?
-
Nzu yeɛ okyire kyɛ Yehowa pena kyɛ ɛtwẽ pingye ye ɔ?
NEA ƐHE KOSO
Susu atẽe nnu bɔ ɔmaa yenwui kyɛ, Nyameɛpiri wɔ berɛ nanwo nea wɔ.
Wɔde susu bɔ yeti yeɛ Nyameɛpiri bɔ yekole yekoli kyɛ ɔwɔ berɛ ne tɔ asoɛ nu nanwo nea.
“Nwa Yeɛ Ɔbɔle Nyameɛpiri Ɔ?” (The Watchtower, August 1, 2014)
Nea bɔ yeti yeɛ odikyɛ yɛfa Nyameɛpiri dumaa ne yedi dwumaa, ɔmva yenwo kyɛ yɛnze kyɛbɔ né bɛbɔ dumaa ne wɔ tete mmerɛ nu ne.
Dumaa biala bɔ yɛfa yɛfrɛ Nyameɛpiri ne te páa anaa? Nea bɔ yeti yeɛ yɛkã kyɛ ole dumaa kõmaapɛ ne wɔ.
“Dumaa Nyɛɛ Yeɛ Nyameɛpiri Lé Ɔ?” (Edwirɛ bɔ ɔwɔ intanɛt so)
a Sɛ ɛpena Nyameɛpiri dumaa ne ngyerɛaseɛ, ɔne bɔ yeti yeɛ Bible ngyerɛaseɛ ahoroɛ biemɔ mva nni dwumaa nanwo dwirɛ pẽe a, nea Appendix A4 wɔ New World Translation of the Holy Scriptures nanu.
