Yehowa ama yɛ akyɛdeɛ bɔ ɔte sorongo​—Nwomaa 66 yeɛ ɔkã bonu yɛ Bible ne ɔ. Nakoso ebie a, ekosusu yenwo kyɛ: ‘Niswa yeɛ Bible ne fi wale ɔ? Na nwa yeɛ ɔte ye tworɔfoɛ ɔ?’ Bɔ ɔkɔmaa yekonya nzɛmmisa hemɔ nwo mmuaeɛ ne, má yesusu kyɛbɔ yɛsa hãne Nyameɛpiri dwirɛ bɔ ɔwɔ Bible nanu nanwo.

1. Sɛ mmenia yeɛ bɛhworɔle Bible ne a, yede nzuati yeɛ Nyameɛpiri yeɛ ɔte ye Tworɔfoɛ ɔ?

Mmenia kɔyɛ 40 yeɛ bɛhworɔle Bible ne ɔ, na olili kɔbo afoɛ 1,600 kora yeɛ beyie ɔ, bɛhyɛle yebo befili afoɛ 1513 K.Y.B. kodwu kɔyɛ afoɛ 98 Y.B nu. Né ɔsonõ nekaa bɔ atworɔfoɛ nanu biala fi ɔ. Nakoso, Bible nanu dwirɛ ne mukoraati yia. Yede ɔyɛle sɛɛ yeɛ ɛhe hora yɛle yé ɔ? Ofikyɛ Nyameɛpiri yeɛ ɔte Bible ne Tworɔfoɛ ɔ. (Kenga 1 Tɛsalonikafoɛ 2:​13.) Bɛbɔ bɛhworɔle ne ammɔ bɛtianu bandworɔ edwirɛ biala. Na mmom, “Nyameɛpiri honhom krongron yeɛ ɔhãne bɛ maa bedwudwole ɔ.” a (2 Petro 1:​21) Nyameɛpiri yeɛ ɔfale ye honhom krongron hãne mmenia ne maa bɛhworɔle ye nzusueɛ ɔ.​—2 Timoteo 3:​16.

2. Nwa yeɛ ɔkɔhora konya Bible ne bie ɔ?

“Maen biala ne abusua ne edwudwolɛ ɔne mmenia” kɔhora konya edwirɛ páa bɔ ɔwɔ Bible nanu naso mvasoɛ. (Kenga Nyekyire 14:6.) Nyameɛpiri hãne kyɛ, ɔkɔmaa dwudwolɛ biala sa kɔhã Bible ne bie kɔtra nwomaa foforɛ biala wɔ abakɔsɛm nu. Kesaalae ebiala sa kora kã Bible ne bie. Ɔmva yenwo ne nekaa bɔ bɛ te anaa dwudwolɛ horɛ bɔ bɛkã ne.

3. Sɛɛ yeɛ Nyameɛpiri akora Bible naso ɔ?

Bɛhworɔle Bible ne beguale nningyein bɔ ne ɔkora sɛkye ndɛ tekyɛ, kaka nwomaa ɔne tete Egyptfoɛ nwomaa (papyrus) so. Nakoso mmenia bɔ ne bele ɔdɔ bɛma Bible ne, bɛfale bɛsa bɛhworɔ beguale nekaa biemɔ. Ɔmva yenwo kyɛ né mmenia bɔ bele tumi ne pena kyɛ bɛsɛkye Bible ne, né afoforɛ koso fa bɛ ngõa to asane nu bɔ yenwo waen. Ebiala anaa nikyeefee biala nne berɛ bɔ wasi Yehowa atẽe kyɛ, nnɛmaa odwudwo kyire yɛ llé. Bible ne kã kyɛ: “Nyameɛpiri dwirɛ de, ɔwɔ berɛ daa.”​—Aizaya 40:8.

SUA PẼE BOKASO

5. Bangora Banzɛkye Bible Ne

 6. Mmenia mukoraati nwomaa

Bible ne te nwomaa bɔ bahyire yebo bahɔ dwudwolɛ pẽe nu, na bakyekyɛ ye pẽe batra nwomaa biala wɔ abakɔsɛm nu. Kenga Asomafoɛ Ne Nnwumaa 10:34, 35, na susu nzɛmmisa hemɔ anwo:

• Nzuati yeɛ Nyameɛpiri pena kyɛ bekyire ye Dwirɛ nabo nea bɛkyekyɛ ye pẽe sɔ?

• Nzu yeɛ ɔmaa wɔnye gye Bible nanwo ɔ?

 YEMUABƆLƐ

Bible ne te Nyameɛpiri Dwirɛ, yeti ɔpena kyɛ, sona biala sa kã bie.

Ndimu

• Sɛ yɛkã kyɛ Nyameɛpiri fale ye honhom hãne mmenia maa bɛhworɔle Bible nea, okyire sɛɛ?

• Nzu yeɛ wɔnye gye yenwo fa kyɛbɔ bakora Bible naso, bahyire yebo, ná bakyekyɛ nanwo ɔ?

• Mmɔden bɔ Nyameɛpiri abɔ kyɛ, ɔne wɔ kodwudwo he anwo ne, sɛɛ yeɛ ɔmaa ɛte ngã ɔ?