ADESUA 06
Ɔyɛle Sɛɛ Yeɛ Ngõa Wale Ɔ?
“[Nyameɛpiri] berɛ yeɛ ngõa fi ɔ.” (Edwein 36:9) Aso edé di? Ebiemɔ kã kyɛ ngõa wale mbaen, na ná ebie yeɛ ɔbɔle ɔ. Sɛ sɔ yeɛ ɔte de a, yede yemu yɛwale mbaen. Nakoso sɛ Yehowa Nyameɛpiri yeɛ ɔbɔle ngõa de a, yede né asetena lé atirimbɔ, anaa ɔtte sɔ? a Susu edwirɛ bɔ Bible ne kã fa nekaa bɔ ngõa fi wale nanwo, na nea bɔ yeti yeɛ ndeaseɛ wɔ sɔ dwirɛ nanu ɔ.
1. Ɔyɛle sɛɛ yeɛ amanzaen ne wale ɔ?
Bible ne kã kyɛ: “Mvitiaseɛ ne Nyameɛpiri bɔle anwuro ne aseɛ.” (Gyenɛsis 1:1) Nyanzanwufoɛ pẽe dé to nu kyɛ, amanzaen ne lé ahyɛaseɛ. Sɛɛ yeɛ Nyameɛpiri bɔle ye ɔ? Ɔfale ye “tumi bɔ ɔfa yɛ nikye”—ye honhom krongron—yeɛ ɔbɔle nzramaa kue, nzramaa bɔ bekyini, ɔne aseɛ ahoroɛ bɔ bɛwɔ amanzaen he anu ne mukoraati ɔ.—Gyenɛsis 1:2.
2. Nzuati yeɛ Nyameɛpiri bɔle aseɛ ne ɔ?
Yehowa “ammɔ [aseɛ ne] mbaen, na mmom ɔbɔle kyɛ bɛtenaso.” (Aizaya 45:18) Ɔyɛle yɛ aseɛ he kyɛ ɔyɛ awuro bɔ enu yɛ ahomekã, nekaa bɔ sona kɔtena daa ɔ. (Kenga Aizaya 40:28; 42:5.) Nyanzanwu da ye ali kyɛ aseɛ ne te sorongo. Aseɛ ne ngõme yeɛ sona ngõa kora tenaso ɔ.
3. Nzu yeɛ ɔmaa sona da nzorɛ fi ngaka nwo ɔ?
Yehowa bɔle aseɛ ne yiele ne, ɔbɔle nningyein bɔ ngõa wɔ nu guale so. Olimoa bɔle mmakaa ne ngaka. Afei, “Nyameɛpiri bɔle sona wɔ ye subaen so.” (Kenga Gyenɛsis 1:27.) Nzu yeɛ ɔmaa sona da nzorɛ ɔ? Ɔnate kyɛ bɛbɔle yɛ wɔ Nyameɛpiri subaen so nati, yɛkora yɛda ye subaen tekyɛ ɔdɔ ne atɛntreene ali. Osa koso bɔle yɛ wɔ atẽe bie so bɔ ɔmaa yɛkora yesua dwudwolɛ ahoroɛ, yenye gye nningyein bɔ badrɔdrɔ nwo, na yetie dwein. Yesa yɛda nzorɛ yefi ngaka nwo ofikyɛ yɛkora yɛsõ yɛ Bɔfoɛ ne.
SUA PẼE BOKASO
Susu adanzeɛ bɔ okyire kyɛ ebie yeɛ ɔbɔle ngõa nanwo, na ekonwui kyɛ ndeaseɛ wɔ Bible nu dwirɛ bɔ ɔfa abɔdeɛ nwo nanu. Sua kyɛbɔ sona subaen maa yenwu Nyameɛpiri yé nanwo nikye.
4. Bɛbɔle ngõa
Mmeni pẽe dé animnyam wɔ abɔdeɛ bɔ bɛnea so bɛyɛ nikyee foforɛ nanwo. Yede, nwa yeɛ odikyɛ yɛfa animnyam yɛma ye wɔ abɔdeɛ mukoraati nwo ɔ? Bɔ VIDIO ne na afei susu nzɛmmisa bɔ olili so he anwo.
-
Nzu yeɛ mmenia bɔ bɛyɛ nningyein ahoroɛ ne asua afi abɔdeɛ nu ɔ?
Sua biala ebie yeɛ osi ɔ. Yede, nwa yeɛ ɔbɔle nningyein mukoraati ɔ? Kenga Hebrifoɛ 3:4, na susu nzɛmmisa hemɔ anwo:
-
Abɔdeɛ bɔ ɔwɔ ewiase he anu beni yeɛ wɔnye gye yenwo ɔ?
-
Aso ndeaseɛ wɔ nu kyɛ ekole koli kyɛ, bɛbɔle amanzaen he anu nningyein mukoraati anaa? Nzuati ɔ?
Ɛse?
Ɛkɔhora konya nwomaa ne vidio ahoroɛ bɔ ɔkã ɛhe anwo dwirɛ wɔ jw.org so, edwirɛ bɔ ɔba ndoatoasoɛ wɔ “Aso Bɛbɔle?” ɔne “Ngyirekyiremuɛ Bɔ Ɔfa Kyɛbɔ Ngõa Wale Nanwo.”
“Ɔwɔ nu, sua biala, kuro sona yeɛ osi ɔ, nakoso bɔ ɔyɛle nningyein mukoraati yeɛ ole Nyameɛpiri”
5. Ndeaseɛ wɔ Bible nu dwirɛ bɔ ɔfa abɔdeɛ nwo nanu
Gyenɛsis yeti 1 nanu ne, Bible ne maa yenwu kyɛbɔ aseɛ, ɔne ngõa wale nanwo dwirɛ. Aso sɔ dwirɛ ne te nahorɛ, anaa ɔte ɛhoaa bie? Bɔ VIDIO ne na susu nzɛmmisa bɔ olili so he anwo.
-
Aso Bible ne kyire kyɛ bɛfale ɛlɛ-sĩa bɔ ɔte nnɔnhwere 24 pɛ, yeɛ bɛbɔle aseɛ ne ngõa bɔ ɔwɔ so ne anaa?
-
Aso esusu kyɛ Bible nu dwirɛ bɔ ɔfa abɔdeɛ nwo ne te nahorɛ na ndeaseɛ wɔ nu anaa? Nzuati ɔ, anaa nzuati yeɛ ɛnné nni ɔ?
Kenga Gyenɛsis 1:1, na susu nzɛmmisa he anwo:
-
Nyanzanwufoɛ kã kyɛ amanzaen he lé ahyɛaseɛ. Sɛɛ yeɛ ɛkɔhora kɔfa bɔ bɛkã ne kɔtoto bɔ ɛkenga fili Bible nanu nanwo ɔ?
Ebiemɔ susu kyɛ Nyameɛpiri nate nningyein bɔ ɔkakyikakyi so yeɛ ɔbɔle ngõa ɔ. Kenga Gyenɛsis 1:21, 25, 27, na susu nzɛmmisa hemɔ anwo:
-
Aso Bible ne kyirekyire kyɛ, Nyameɛpiri bɔle ngõa bie yeɛ ɔmaa ɔkakyili ɔɔyɛle ngõa ahoroɛ tekyɛ egyein, ngaka ne sona anaa? Anaakyɛ ɔbɔle ngõa bɔ ogua “ahoroɛ” ne? b
6. Sona te Nyameɛpiri abɔdeɛ bɔ ɔda nzorɛ ɔ
Yɛtte kyɛ ngaka bɔ Yehowa bɔle ne. Kenga Gyenɛsis 1:26, na susu nzɛmmisa he anwo:
-
Ɔnate kyɛ Nyameɛpiri bɔle yɛ wɔ ye subaen so nati, nzu yeɛ ɔdɔ ne anwumvoinnwunɛ bɔ yɛda yali ne maa yenwui wɔ Nyameɛpiri subaen nwo ɔ?
EBIEMƆ KÃ KYƐ: “Edwirɛ bɔ Bible ne kã fa abɔdeɛ nwo ne te ɛhoaa.”
-
Esusu yenwo sɛ́? Nzuati ɔ?
YEMUABƆLƐ
Yehowa yeɛ ɔbɔle amanzaen he, ɔne ngõa mukoraati ɔ.
Ndimu
-
Nzu yeɛ Bible ne kã fa nekaa bɔ amanzaen ne fi wale nanwo ɔ?
-
Aso Nyameɛpiri bɔle ngõa anaa ngõa ahoroɛ ne mukoraati nate nningyein bɔ ɔkakyikakyi so yeɛ bɛwale ɔ?
-
Nzu yeɛ ɔmaa sona da nzorɛ ɔ?
NEA ƐHE KOSO
Sua abɔdeɛ nu nningyein bɔ ɔyɛ nyemene nanwo nikye.
Nea kyɛbɔ baba bie kɔhora kohyirehyire abɔdeɛ nwo dwirɛ bɔ ɔwɔ Bible nanu ne kohyire ɔwa abɛmaa ɔ.
Susu yenwo nea kyɛ aso, nningyein bɔ ɔkakyikakyi ne Bible ne yia anaa.
Susu yenwo nea kyɛ aso ngaka bɔ bawuwu ne mmowue bɔ nyanzanwufoɛ anwui, ɔne nhwehwɛmuɛ bɔ bayɛ ne foa so kyɛ ebie yeɛ ɔbɔle ngõa, anaakyɛ ɔwale mbaen.
Kyɛbɔ Ngõa Wale Ɔ—Nzɛmmisa Nnu Bɔ Yenwo Hia Kyɛ Ebisa Ɔ (brohyeɔ)
