Aso bato asaa bafrɛ wɔ maa ahɔ Yehowa Adanzefoɛ nhyiamu bo lé? Sɛ ɛhɔlle bie llé a, ebia mmerɛ bɔ olimoa bɔ ɛkɔhɔ bie ne, w’adwene nu kɔyɛ wɔ nãa kãa. Ebia ekobisa kyɛ: ‘Nzu yeɛ ɔkɔso wɔ nhyiamu he abo ɔ? Nzuati yeɛ yenwo hia ɔ? Nzuati yeɛ odikyɛ mekɔ bie ɔ? Adesua he anu ne, ekosua kyɛbɔ sɛ ɛne afoforɛ yia nu a, ɔkɔhora kɔhwẽ wɔ kopingye Nyameɛpiri, ɔne kyɛbɔ okosi kɔboka wɔ ɔ.

1. Nzuati yeɛ Yehowa Adanzefoɛ yia nu ɔ?

Nea bɔ Bible tworɔfoɛ bie hã fale nikyehorɛtibɔ yenwo hia kyɛ ɛne afoforɛ koyia nu nanwo dwirɛ ɔ: “Ngɔye Yehowa ayɛ wɔ Asafo pirikua nu.” (Edwein 26:12) Sɔ ala yeɛ ɛnnɛ koso sɛ Yehowa Adanzefoɛ ne bɛnwo yia nu a, ɔmaa bɛnye gye ɔ. Wɔ ewiase mukoraati ne, beyia nu dapɛen biala bɛye Nyameɛpiri ayɛ, bɛto dwein, na bɛbɔ mbaeɛ. Ɔtɔ mmerɛ bie a, wɔ afoɛ nanu ne, beyia nu kyɛ mmenikue pirikua bɛsõ.

2. Nzu yeɛ ekosua wɔ yɛ nhyiamu ahoroɛ bo ɔ?

Wɔ nhyiamu ahoroɛ bɔ ɔte sɔ bo ne, yɛfa y’adwene yesie Nyameɛpiri Dwirɛ bɔ “bekyirekyire nu yé maa ndeaseɛ ba nu” naso. (Kenga Nehemia 8:8.) Sɛ ekɔ bie a, ekosua Yehowa ne ye subaen bɔ ɔyɛ nyemene nanwo nikye. Mmerɛ bɔ enwu ɔdɔ bɔ ole ma wɔ nanwo dwirɛ pẽe ne, ekopingye ye. Ekosa konwu kyɛbɔ ɔkɔboka wɔ maa ekonya asetena bɔ asomdwee wɔ nu ɔ.​—Aizaya 48:17, 18.

3. Sɛɛ yeɛ mmenia bɔ ɛne bɛ kɔbɔ wɔ yɛ nhyiamu bo ne kɔboka wɔ ɔ?

Yehowa kã kyire yɛ kyɛ “ɛmɔma yɛpena atẽe bɔ yɛkɔfa so yɛkɔbokaboka yɛnwo bɔ ɔkɔmaa yekohyire ɔdɔ na y’ayɛ nnwumaa páa, na nnɛmɔmaa yɛyakyi kyɛ yɛne yɛnwo koyia nu lé.” (Hebrifoɛ 10:24, 25) Wɔ yɛ nhyiamu ahoroɛ bo ne, ekonwu mmenia bɔ bɛdodɔ bɛnwo, na bɛnye gye yenwo kyɛ bekosua pẽe bɛkɔfa Nyameɛpiri nwo te kyɛ wɔ ala. Ɛkɔte kyɛ bɛbɔ Bible nu dwirɛ bɔ ɔhyɛ ngunaen nwo ngɔmmɔ. (Kenga Romanfoɛ 1:​11, 12.) Ɛkɔhora koso ne bɛbɔ bagya ne asigyafoɛ bɔ bahora bagyina bɛ haw ahoroɛ noa ne kɔbɔ ngɔmmɔ. Ɛhemɔ ati yeɛ Yehowa pena kyɛ yeyia nu daa biala ne!

 SUA PẼE BOKASO

4. Yehowa Adanzefoɛ Nhyiamu Ahoroɛ

Wɔ afoɛ ɛyaa bɔ olimoa nanu ne, né Kristofoɛ taa yia nu sõ Yehowa. (Romanfoɛ 16:​3-5) Kenga Kolosefoɛ 3:​16, afei susu nzɛmmisa he anwo:

• Atẽe beni yeɛ né tete Kristofoɛ nemɔ fa so bɛsõ Yehowa ɔ?

1. Bɔ ɔboka yɛ nhyiamu ahoroɛ naso bie yeɛ olé dwudwolɛ, ɔyɛkyerɛ, ɔne vidio ahoroɛ. Yɛfa dwein ne mbaeɛ yɛhyɛ nhyiamu ahoroɛ nabo na yafa yayie

2. Wɔ dwumadié ne bue bie nu ne, bɛma atiefoɛ ne atẽe maa bɛma mmuaeɛ.

3.   Ebiala kora ba bie ​—mmusua, asigyafoɛ, mbanyi, ɔne ngwalaa

4. Benné hwee wɔ yɛ nhyiamu ahoroɛ nabo. Yehowa Adanzefoɛ mva kyɛnzee mva mmenia nyunu bennidé esikaa biala

5. Odé mmɔdenmɔ kora na ahora ahɔ nhyiamu ahoroɛ ne bie

• Nzuati yeɛ odikyɛ daa yɛkɔ nhyiamu ahoroɛ ne ɔ?

 YEMUABƆLƐ

Nhyiamu ahoroɛ bɔ ɛkɔhɔ ne kɔmaa ekosua Yehowa nwo dwirɛ pẽe, ɛne ye adamvoafalɛ nanu kɔyɛ se, na ɛne afoforɛ kɔbɔ nu kɔsõ ye.

Ndimu

• Nzuati yeɛ Yehowa hyɛ yɛ ngunaen kyɛ yɛbɔ nu yeyia nu ɔ?

• Sɛ ɛkɔ Yehowa Adanzefoɛ nhyiamu ahoroɛ ne bie a, nzu yeɛ ekosua ɔ?

• Atẽe foforɛ beni aso yeɛ ɛnea a, nhyiamu ahoroɛ ne kɔhora kɔboka wɔ ɔ?