ADESUA 11

Kyɛbɔ Ekonya Bible Kengalɛ So Mvasoɛ Paa Ɔ

BƆ

Aso ahyɛ adwuma pirikua bie bo, nakoso ɛtele ngã kyɛ ɛngɔhora ngɔyɛ ye llé anaa? Bɔ ɔkɔyɛ na wanyɛ se waama wɔ ne, ebia ɛkɔhyehyɛ nu kɔyɛ ye ngakã. Sɔ ala yeɛ ɔte wɔ Bible kengalɛ nwo ɔ. Ebia ekobisa kyɛ, ‘Nhyɛ yebo mvi ni?’ Adesua he anu ne, yekosusu atẽe tikaapẽ bie bɔ ɔkɔhora kɔboka wɔ maa wɔnye kɔgye Bible kengalɛ ɔne ye sualɛ nwo ɔ.

1. Nzuati yeɛ odikyɛ yɛkenga Bible ne daa ɔ?

Sona bɔ ɔkenga Bible anaa “Yehowa mmraa ne” daa ne, yenye kɔgye, na bɔ ɔkɔyɛ biala kɔyɛ yé. (Kenga Edwein 1:1-3.) Sɛ ɛhyɛ yebo a, bɔ mmɔden fa minit kaã kenga ye kyẽabiala. Dodoɔ bɔ enwu Nyameɛpiri Dwirɛ nanu yé ne, dodoɔ nala yeɛ wɔnye kɔgye Bible kengalɛ nanwo ɔ.

2. Nzu yeɛ ɔkɔboka wɔ maa ɛkonya Bible kengalɛ so mvasoɛ ɔ?

Sɛ yekonya Bible kengalɛ so mvasoɛ yé a, odikyɛ yegyina na yesusu bɔ yɛkenga nanwo. Odikyɛ yɛkenga na “yɛdwenedwene yenwo.” (Yoshua 1:8) Sɛ ɛkenga a, bisa wɔnwo nzɛmmisa tekyɛ: ‘Nzu yɛ ɛhe maa menwu mefa Yehowa Nyameɛpiri nwo ɔ? Ngɔyɛ sɛɛ na mahora mafa ɛhe mayɛ adwuma wɔ m’asetena nu? Ngɔyɛ sɛɛ na mahora mafa sɔ ngyerɛkyiremuɛ he maboka afoforɛ?’

3. Ɛkɔyɛ sɛɛ na anya mmerɛ akenga Bible ne?

Aso ɛbɔ wɔnwo mmɔden biala kyɛ ɛkonya mmerɛ kɔkenga Bible ne anaa? Yenu pẽe nala yɛ sɔ. Bɔ mmɔden “fa wɔ mmerɛ di dwumaa yé.” (Ɛfesofoɛ 5:16) Sɛ ɛkɔhora kɔyɛ ɛhe a, sana ɛye mmerɛ bie sie berɛ fa kenga Bible ne kyẽabiala. Ebiemɔ nya mmerɛ kenga Bible ne ngyerɛmɔ tutuutu. Afoforɛ yɛye ngyẽa ne ayieleɛ wɔ mmerɛ bɔ bɛ baadidi ɔ. Ebiemɔ koso kenga Bible ne nnɔsoa kora na bala. Enu beni yeɛ ɔkɔyɛ mmerɛ pá kɔma wɔ ɔ?

SUA PẼE BOKASO

Sua kyɛbɔ ɛkɔmaa wɔ Bible kengalɛ kɔyɛ anigye nanwo nikye. Nea kyɛbɔ ekosiesie wɔnwo yé, na ahora anya wɔ Bible adesua so mvasoɛ paa ɔ.

Kyɛbɔ yɛnye kora bagye aleɛ foforɛ lilɛ nwo ne, yɛnye kɔhora kɔgye Bible kengalɛ nwo

4. Sua kyɛbɔ ɛkɔma wɔ Bible kengalɛ kɔyɛ anigye ɔ

Ebia ɔlla ase kyɛ ɛkɔhyɛ yebo kɔkenga Bible ne. Nakoso, kyɛbɔ yɛkomvi kora ba aleɛ foforɛ bɔ ɔyɛ fɛ so ne, yɛkɔhora yekonya “atenga bie” yɛkɔma Bible ne kengalɛ. Kenga 1 Petro 2:2, na susu nzɛmmisa he anwo:

Sɛ ɛkenga Bible ne kyẽabiala a, ekonwui kyɛ wɔnye kɔgye yenwo, na ɛkɔnea atẽe kyɛ daa ɛkɔkenga.

Bɔ VIDIO ne, na nea kyɛbɔ mmenia biemɔ hyɛle yebo nyane anigye wɔ Bible kengalɛ nwo ɔ. na susu nzɛmmisa bɔ olili so hemɔ anwo.

VIDIO: Mmabunu Sua Kyɛbɔ Bekonya Ɔdɔ Bɛkɔma Nyameɛpiri Dwirɛ Ne (5:33)

Wɔ vidio nanu ne, ɔhaw beni yeɛ mmabunu nemɔ hora lili so ɔ?
Nzu yeɛ ɔbokale bɛ maa bɛhora bɛkengale Bible ne daa ɔ?
Nzu yeɛ bɛyɛle bɔ ɔmaa bɛ Bible kengalɛ yɛle anigye ɔ?

Bɔ ɔkɔboka wɔ maa ɛkɔhyɛ yebo ɔ:

Ye ɛnnɛ mmerɛ nu ngyerɛaseɛ bɔ ye kengalɛ nu la berɛ ɔ. Sɔ New World Translation ne nea sɛ ebie wɔ wɔ dwudwolɛ nu a.
Bɔ olimoa ne, kenga ye bue ahoroɛ bɔ wɔnye kɔgye yenwo paa ɔ. Bɔ ɔboka so ne, nea mmerɛ bɔ dwirɛ bie sisile bue berɛ na “Hyɛ Yebo Kenga Bible Ne.”
Kae na tworɔ bɔ ɛkenga ne to berɛ. Fa “Tworɔ Wɔ Bible Kengalɛ Ne To Berɛ” nwo nhyehyɛeɛ bɔ ɔwɔ nwomaa he anu ne di dwumaa.
Fa JW Library^®app ne di dwumaa. Ɛberɛ de, ɛkɔhora kɔfa wɔ fon anaa ngaen foforɛ biala kɔkenga na atie Bible nanu dwirɛ wɔ nekaa biala.
Fa appendix bɔ ɔwɔ New World Translation nanu ne di dwumaa. Bɔ ɔboka so yeɛ ole map, mmerɛ bɔ edwirɛ biemɔ sisile, ɔne edwirɛ bɔ bahyehyɛ, bɔ ɔkɔboka wɔ maa wɔ Bible kengalɛ kɔyɛ wɔ fɛ ɔ.

5. Siesie wɔnwo ma wɔ Bible adesua

Kenga Edwein 119:34, na afei susu nzɛmmisa hemɔ anwo:

Nzuati yeɛ ɔte pá kyɛ ɛkɔbɔ mbaeɛ kora na ahyɛ Bible kengalɛ bo anaa asiesie wɔnwo ama wɔ Bible adesua ɔ?

Ɛkɔyɛ sɛɛ na anya adesua ne bue biala so mvasoɛ? Mmerɛ bɔ esiesie wɔnwo ma adesua bɔ ɔwɔ sɔ nwomaa he anu ne, sɔ bɔ olili so he nea:

Kenga ngyekyemuɛ ahoroɛ bɔ bɛfa bɛhyɛ adesua nabo ne.
Nea na kenga tworɔnzɛm ahoroɛ ne, na nea kyɛ ɔne edwirɛ bɔ ɔwɔ nwomaa nanu ne yia anaa.
Pepɛ edwirɛ titire ahoroɛ bɔ ɔma wɔ nzɛmmisa nanwo mmuaeɛ nabo; ɛhẽne kɔboka wɔ maa ɛne wɔ kyirekyireniɛ ne kosusu yenwo wɔ adesua nanu.

Ɛse?

Yehowa Adanzefoɛ afa Bible ngyeraseɛ ahoroɛ pẽe ali dwumaa. Nakoso, yɛnye gye New World Translation of the Holy Scriptures nanwo, ofikyɛ enu nyɛ se, enu la berɛ, na ɔfa Nyameɛpiri dumaa ne di dwumaa.—Nea edwirɛ bɔ ɔwɔ intanɛt so ne “Aso Yehowa Adanzefoɛ lé Bɛbɔbɔ Bɛ Bible Anaa?”

EBIEMƆ KÃ KYƐ: “Bible ne sualɛ yɛ se sõma. Mengɔnya alagyé mengosua.”