ADESUA 15

Nwa Yeɛ Ole Yesu?

BƆ

Nwa Yeɛ Ole Yesu?

Yesu te bɛbɔ bale dumaa paa wɔ abakɔsɛm nu nanu kõ. Nakoso, sɛ ye dumaa ne la ahãmeɛ a, mmenia nze yenwo dwirɛ pẽe, na ɔsono adwene bɔ bele ye wɔ sonahorɛ deinn bɔ Yesu te nanwo. Nzu yeɛ Bible ne kã fa Yesu nwo ɔ?

1. Nwa yeɛ ole Yesu?

Yesu te honhom abɔdeɛ bɔ ole tumi bɔ ɔte anwuro ɔ. Yehowa limoa bɔle ye kora yeɛ ɔbɔ nikyee biala ɔ. Ye sɔ nati, bɛfrɛ ye “abɔdeɛ mukoraati nu bamuɛ baa.” (Kolosefoɛ 1:15) Bible ne kã Yesu nwo dwirɛ kyɛ ɔte Nyameɛpiri “awa bɔ ɔwole ye kõmaapɛ” ofikyɛ ye ngome yeɛ Yehowa bɔle ye tẽe. (Yohane 3:16) Yesu ne ye Baba Yehowa bɔle nu yɛle adwuma, na ɔbokale ye maa Ɔbɔle nningyein bɔ waha ne mukoraati. (Kenga Anyandera 8:30.) Yesu ne Yehowa hɔle so nyane abusuabɔ bɔ ɔyɛ anigye. Ofi nahorɛlilɛ nu sõ kyɛ ebie bɔ odwudwo ma Nyameɛpiri, kyire kyɛ “Edwirɛ ne”, na ɔkã Yehowa akwangyerɛ ne ye mmraa nwo dwirɛ.—Yohane 1:14.

2. Nzuati yeɛ Yesu wale aseɛ so ɔ?

Kɔyɛ afoɛ 2,000 bɔ w’apɛ nu ne, Yehowa nate nzɛngyerɛneɛ atẽe so fale ye honhom krongron ne yele Yesu ngõa fili anwuro oowurale ababunu bie bɔ bɛfrɛ Mary awodeɛ nu. Wɔ sɔ atẽe naso ne, bɛwole Yesu kyɛ sona. (Kenga Luka 1:34, 35.) Yesu wale aseɛ so kyɛ Mesia bɔ bahyɛ yenwo bɔ, anaa Kristo ne, na ye yeɛ né okole mmenia ngõa ɔ. a Bible nanu ngɔmhyɛ bɔ ɔfa Mesia nanwo ne mukoraati wale nu wɔ yeso, na ɔmaa mmenia nwuni kyɛ ye yeɛ “ɔte Kristo, Nyameɛpiri teasefoɛ ne Awa ne.”—Mateo 16:16.

3. Kesaalae, Yesu wɔ niswa?

Mmerɛ bɔ Yesu aseɛ so asetena wale ayieleɛ ne, betingyele ye kyɛ honhom abɔdeɛ maa ɔhɔle anwuro. Ɛdɔ́, yeɛ “Nyameɛpiri pagyale ye mane ye gyinabea bɔ ɔte piri ɔ.” (Filipifoɛ 2:9) Kesaalae, Yesu le tumi paa—na yé yeɛ Yehowa ne berɛ a, ɔwɔ berɛ ɔ.

SUA PẼE BOKASO

Sua edwirɛ pẽe fa sonahorɛ deinn bɔ Yesu te, ɔne bɔ yeti yeɛ odikyɛ esua yenwo nikye nanwo.

4. Yesu tte Nikyee Mukoraati So Tumvoɛ Nyameɛpiri

Bible ne kyirekyire kyɛ, ɔwɔ nu kyɛ Yesu te honhom abɔdeɛ bɔ ole tumi paa wɔ anwuro de, nakoso ɔbrɛ yenwo ase wura ye Nyameɛpiri ne ye Baba, Yehowa bo. Nzu yeɛ ɔmaa yɛkora yɛkãe sɔ ɔ? Bɔ VIDIO ne na nea bɔ Bible ne kã fa abusuabɔ bɔ ɔla Yesu ne Nyameɛpiri afĩa ɔ.

VIDIO: Aso Yesu Kristo Te Nyameɛpiri? (3:22)

Tworɔnzɛm ahoroɛ bɔ olili so ne boka yɛ maa yɛte abusuabɔ bɔ ɔla Yehowa ne Yesu afĩa nabo. Kenga tworɔnzɛm biala, na susu nzɛmmisa ahoroɛ bɔ olili so nanwo.

Kenga Luka 1:30-32.

Sɛɛ yeɛ abɔfo ne hyirehyirele abusuabɔ bɔ ɔla Yesu ne Yehowa, “Anwuro-wuroniɛ” Nyameɛpiri ne afĩa ɔ?

Kenga Mateo 3:16, 17.

Mmerɛ bɔ bɛbɔ Yesu asu ne, edwirɛ beni yeɛ komviɛ bɔ ɔfi anwuro ne hãne ɔ?
Esusu kyɛ nwa yeɛ odwudwole ne?

Kenga Yohane 14:28.

Baba ne baa,nwa yeɛ ɔte panyi na ole tumi paa ɔ?
Mmerɛ bɔ Yesu frɛle Yehowa kyɛ ye Baba ne, nzu yeɛ ne ɔpena kyire ɔ?

Kenga Yohane 12:49.

Aso Yesu adwene yɛye kyɛ ɔne ye Baba te sona kõ anaa? Esusu yenwo sɛ́?

5. Yesu hyirɛle kyɛ ye yeɛ ɔte Mesia ne

Ngɔmhyɛ ahoroɛ pẽe wɔ Bible nanu bɔ ɔkɔboka mmenia maa bekonwu Mesia—Bɔ Nyameɛpiri aye ye kyɛ oolé mmenia ngõa ne. Bɔ VIDIO ne, na nea ngɔmhyɛ ahoroɛ bɔ ɔwale nu wɔ Yesu so mmerɛ bɔ ne ɔwɔ aseɛ so ne.

VIDIO: Yesu Maa Ngɔmhyɛ Ba Nu (3:03)

Kenga Bible nu ngɔmhyɛ ahoroɛ hemɔ, na susu nzɛmmisa bɔ olili so hemɔ nwo:

Kenga Mika 5:2 na nea nekaa bɔ né bɛkɔwo Mesia ne ɔ. b

Aso Yesu aworɛ mane sɔ ngɔmhyɛ ne wale nu anaa? —Mateo 2:1.

Kenga Edwein 34:20 ɔne Zakaria 12:10 na nea ngɔm ahoroɛ bɔ bɛhyɛ bɛfale Mesia ne wue nwo ɔ.

Aso sɔ ngɔmhyɛ ahoroɛ he wale nu anaa? —Yohane 19:33-37.
Esusu kyɛ Yesu bɔbɔ deinn yeɛ ɔmane sɔ ngɔmhyɛ ahoroɛ ne wale nu wɔ yeso anaa?
Nzu yeɛ ɛhe ma enwui fa Yesu nwo ɔ?

6. Sɛ yesua Yesu nwo dwirɛ a, yenya so mvasoɛ

Bible ne maa yenwu nikyehorɛtibɔ yenwo hia kyɛ yesua Yesu ne dwumaa bɔ odi nanwo nikye ɔ. Kenga Yohane 14:6 ɔne 17:3, na susu nzɛmmisa he anwo:

Nzuati yeɛ yenwo hia kyɛ esua Yesu nwo nikye ɔ?

Yesu abukye atẽe bɔ ɔkɔmaa ɛkɔhora kɔɔyɛ Nyameɛpiri damvo ɔ. Oohyirehyirɛle nahorɛ bɔ ɔfa Yehowa nwo ɔ, na ɔnate ye so ne, yɛkɔhora yekonya daa ngõa

EBIEMƆ KÃ KYƐ: “Yehowa Adanzefoɛ nné Yesu nni.”