ADESUA 16

Mmerɛ Bɔ Yesu Wɔ Aseɛ So Ne, Nzu Yeɛ Ɔyɛle Ɔ?

BƆ

Mmeni pẽe adwene yɛ bɛ kyɛ Yesu tɛ te adɔma bɔ ɔngora nyɛ hwee, afoforɛ susu kyɛ ɔte diyifoɛ bɔ ɔse nworɛ, anaa biãa bie bɔ owuo ɔ. Nakoso ɛnea a, nzu yeɛ yɛkɔhora yekosua yɛkɔfa ye aseɛ so asetena nwo ɔ? Wɔ adesua he anu ne, yɛkɔnea nningyein ahoroɛ bɔ yenwo hia bɔ Yesu yɛle, ɔne kyɛbɔ ɔkɔhora kɔboka wɔ ɔ.

1. Adwuma titire beni yeɛ né Yesu yɛ ɔ?

Né Yesu adwuma titire yeɛ ole kyɛ “ɔkɔhã Nyameɛpiri ahennie nanwo dwirɛ pá ne.” (Kenga Luka 4:43.) Ɔhãne edwirɛ pá bɔ yeɛ ole kyɛ, Nyameɛpiri kɔfa ahennie anaa awaen bɔ okoli adasamma haw mukoraati nwo dwumaa kɔwa. a Yesu fale afoɛ nza ne bue yɛle adwuma serɛ hãne ahennie nanwo dwirɛ pá hyirɛle mmenia.—Mateo 9:35.

2. Atirimbɔ beni ati yeɛ Yesu yɛle nzɛngyerɛneɛ ahoroɛ ne ɔ

Bible ne kyire ‘anwanwadeɛ ne nzɛngyerɛneɛ pẽe bɔ Nyameɛpiri nate [Yesu] so yɛle ɔ.’ (Asomafoɛ Ne Nnwumaa 2:22) Ɔnate Nyameɛpiri tumi so ne, Yesu hora lili ewienu nzakraeɛ so, ɔmane mmeni pẽe aleɛ, ɔsale anwonyerɛ, na otingyele awufoɛ. (Mateo 8:23-27; 14:15-21; Marko 6:56; Luka 7:11-17) Nzɛngyerɛneɛ ahoroɛ bɔ Yesu yɛle ne kyire kyɛ Nyameɛpiri yeɛ ɔsomane ye ɔ. Na osa maa yenwu kyɛ, Yehowa le tumi bɔ ɔkɔfa koli yɛ haw ahoroɛ nwo dwumaa ɔ.

3. Nzu yeɛ yɛkɔhora yekosua yekofi Yesu asetena nu ɔ?

Yesu tiele Yehowa wɔ tebea biala nu. (Kenga Yohane 8:29.) Ɔmva yenwo ne ɛpɔen bɔ Yesu yiale ne, olili nahorɛ mane ye baba oodwuli ewue nu. Ɔmaa ɔlale ali kyɛ mmenia kɔhora kɔsõ Nyameɛpiri, mmerɛ pó bɔ bɛfa ɔhaw nu ne. Yesu nate ɛhe aso “yakyili [yɛ] nneasoɛ kyɛ yɛli ye gyasi pɛɛ.”—1 Petro 2:21.

SUA PẼE BOKASO

Susu kyɛbɔ Yesu hãne edwirɛ pá ne, ná ɔyɛle nzɛngyerɛneɛ ahoroɛ nanwo nea.

4. Yesu hãne edwirɛ pá ne

Yesu pɛle kwanzin pẽe fale mvuture nu hãne edwirɛ pá ne hyirɛle mmeni dodoɔ biala bɔ né ɔkɔhora ɔ. Kenga Luka 8:1, na susu nzɛmmisa hemɔ nwo:

Aso Yesu hãne edwirɛ ne hyirɛle mmenia bɔ né bɛboa bɛnoa betie ye ne ngome anaa?
Mmɔden beni yeɛ Yesu bɔle fa penane mmenia ɔ?

Nyameɛpiri hã tole berɛ kyɛ né Mesia ne kɔhã edwirɛ pá. Kenga Aizaya 61:1, 2, na susu nzɛmmisa hemɔ nwo:

Sɛɛ yeɛ Yesu mane sɔ ngɔmhyɛ he wale nu ɔ?
Esusu kyɛ yenwo hia kyɛ mmenia bɔ bɛwɔ berɛ ɛnnɛ ne kɔte sɔ edwirɛ pá ne anaa?

5. Yesu hyirehyirɛle edwirɛ bɔ yenwo hia ɔ

Nná Nyameɛpiri Ahennie nanwo dwirɛ ngome yeɛ Yesu hãne ɔ, na mmom osa hyirehyirɛle abrabɔ nu dwirɛ koso. Nea yenwo nneasoɛ biemɔ wɔ ye Bokaa so Asɛnga bɔ wale dumaa nanu. Kenga Mateo 6:14, 34 ɔne 7:12, na susu nzɛmmisa hemɔ nwo:

Abrabɔ nu afutue beni yeɛ Yesu fa mane wɔ sɔ ngyekyɛmuɛ hemɔ anu ɔ?
Esusu kyɛ sɔ afutue hemɔ nwo té hia anaa?

6. Yesu yɛle nzɛngyerɛneɛ ahoroɛ

Yehowa mane Yesu tumi maa ɔyɛle nzɛngyerɛneɛ pẽe. Sɛ ɛpena yenwo nneasoɛ kõ a, kenga Marko 5:25-34 anaa bɔ VIDIO ne. Na susu nzɛmmisa bɔ olili so hemɔ nwo.

VIDIO: Maame Bie Nyane Ayaresa (5:10)

Wɔ vidio nanu ne, nzu yeɛ né maame bɔ wafokyɛ ne dédi ɔ?
Nzu yeɛ wɔnye gye yenwo wɔ nzɛngyerɛneɛ he anwo ɔ?

Kenga Yohane 5:36, na susu nzɛmmisa he anwo:

Nzu yeɛ Yesu nzɛngyerɛneɛ ne “di yenwo adanzeɛ”, anaa ɔkã fa yenwo ɔ?

Ɛse?

Edwirɛ ahoroɛ pẽe bɔ yɛse yɛfa Yesu nwo ne fi Bible nu nwomaa nnã bɔ bɛfrɛ ye Nzɛmba nanu—Mateo, Marko, Luka, ne Yohane. Nzɛmba hworɔlɛfoɛ nanu biala hãne edwirɛ sorongõ bɔ ɔkɔ sĩɛ fale Yesu nwo. Sɔ dwirɛ hemɔ mukoraati kã bonu maa yenya ye asetena nu dwirɛ bɔ odimũ ɔ.

MATEO

yeɛ olimoa hworɔle nzɛmba ne ɔ. Ɔkã Yesu ngyerɛkyerɛ nwo dwirɛ, ye titire ne bɔ Yesu hã fale Nyameɛpiri ahennie nanwo ne.
MARKO

yeɛ ɔhworɔle nzɛmba bɔ né ɔte tika ɔ. Ɔkã dwumadié-ahoroɛ bɔ ɔkã ahõne nwo dwirɛ.
LUKA

fale ye adwene siele mbaebɔ ɔne kyɛbɔ né Yesu ne mmrasua di dwirɛ naso.
YOHANE

hãne Yesu subaen ɔne kyɛbɔ ɔne ye nnamvomɔ bɔ bɛpingye ye ne afoforɛ bɔle ngɔmmɔ hɔle sĩɛ nanwo dwirɛ.