ADESUA 17

Yesu Te Sona Beni?

BƆ

Yesu Te Sona Beni?

Sɛ yesua nningyein bɔ Yesu hãne yenwo dwirɛ ná ɔyɛle wɔ aseɛ so ne a, yekonwu subaen ahoroɛ bɔ ɔkɔmaa yɛkɔhwẽ yekopingye ye Baba, Yehowa ɔ. Ye subaen bɔ ɔyɛ nyemene ne bie yeɛ ole beni? Na sɛɛ yeɛ yɛkɔhora yekosuesua Yesu wɔ y’asetena nu ɔ?

1. Atẽe beni aso yeɛ Yesu tekyɛ ye Baba ɔ?

Mmerɛ bɔ né Yesu wɔ anwuro ne, ɔneane ye Baba bɔ ole ɔdɔ ne, na osuane nikyee bie fili ye berɛ afoɛ pẽe. Ɔnate sɔ ti, kyɛbɔ osi dwene, atengã bɔ ole ye, ɔne kyɛbɔ osi yɛ ye nikyee ne tekyɛ ye Baba. (Kenga Yohane 5:19.) Nahorɛ nu ne, Yesu hora lale ye Baba subaen ne bie ali paa maa ɔhora hãne kyɛ: “Ebiala bɔ wanwu me ne anwu ne Baba koso.” (Yohane 14:9) Sɛ esua Yesu subaen nanwo nikyee a, ɛkɔwa koonwu Yehowa yé. Kyɛ nneasoɛ ne, kyɛbɔ né Yesu dwene mmenia nwo ne maa yenwu kyɛbɔ Yehowa te ngã ma wɔ ɔ.

2. Sɛɛ yeɛ Yesu ahyire kyɛ ɔdɔ Yehowa ɔ?

Yesu hãne kyɛ: “Meyɛ bɔ Baba ne ahyɛ me ne, Kyɛbɔ ewiase ne konwu kyɛ mekuro Baba ne dwirɛ ɔ.” (Yohane 14:31) Mmerɛ bɔ né Yesu wɔ aseɛ so ne, ɔlale ɔdɔ pirikua ali hyirɛle ye Baba nate setie bɔ ɔyɛ mane ye, ɔmva yenwo pó kyɛ ne ɔyɛ se ne. Ne Yesu kuro kyɛ ɔkã ye Baba nwo dwirɛ kyire afoforɛ na waboka bɛ maa bɛne ye afa adamvoa.—Yohane 14:23.

3. Sɛɛ yeɛ Yesu ahyire kyɛ ɔdɔ mmenia ɔ?

Bible ne kã kyɛ Yesu “kuro sona dwirɛ paa.” (Anyandera 8:31) Ɔlale sɔ ɔdɔ he ali nate nguraenhyɛ ɔne ye ahõne nu bɔ ofi bokale mmenia naso. Waanyɛ anwanwadeɛ waamva waangyire kyɛ ole tumi ngome, na mmom ohyirɛle kyɛ ole ahunundetelɛ koso. (Marko 1:40-42) Ɔne mmenia lili ye yé bɔ waanyɛ nyiyimuɛ ɔ. Ne ye dwirɛ te awerɛkyekyerɛ ne anyelasoɛ ma bɛbɔ ne bele ahõne pá bɔ betiele ye ne mukoraati. Ne Yesu lé ɔpɛ kyɛ okonwu amaneɛ na wawu ɔnate ɔdɔ bɔ ole ma mmenia nati. Nakoso bɛbɔ bedi ye ngyerɛkyerɛ so ne yeɛ okuro bɛ dwirɛ paa ɔ.—Kenga Yohane 15:13, 14.

SUA PẼE BOKASO

Sua pẽe fa Yesu subaen nwo. Na susu kyɛbɔ ɛkɔla ɔdɔ ne páyɛlɛ ali kyɛbɔ ɔyɛle ne

4. Yesu dɔ ye Baba

Yesu nneasoɛ ne kyire yɛ kyɛbɔ yɛkɔla ɔdɔ ali yekohyire Nyameɛpiri. Kenga Luka 6:12 ɔne Yohane 15:10; 17:26. Sɛ ɛkenga tworɔnzɛm nanu biala yie a, susu nzɛmmisa he anwo:

Sɛ yesuasua Yesu a, yɛkɔyɛ sɛɛ ne yahyire kyɛ yɛdɔ Yehowa?

Ne Yesu dɔ ye anwuro Baba ne, yeti ne ɔtaa ne ye dwudwo wɔ mbaeɛ nu

5. Ne Yesu te ngã ma bɛbɔ belle bie ne

Ne Yesu dwene mmenia nwo tra ye bɔbɔ. Sɛ wafɛ po a, ɔfa ye mmerɛ ne ye anwoserɛ boka mmenia. Kenga Marko 6:30-44, na susu nzɛmmisa hemɔ nwo:

Wɔ sɔ dwirɛ he anu ne, atẽe beni aso yeɛ Yesu hyirɛle kyɛ ɔdwene afoforɛ nwo ɔ?—Nea ngyekyemuɛ 31, 34, 41, ɔne 42.
Nzu yeɛ ɔhãne Yesu maa ɔbokale mmenia ɔ?—Nea ngyekyemuɛ 34.
Ɔnate kyɛ Yesu lale Yehowa subaen ali nati, nzu yeɛ ɛhe maa enwui fa Yehowa nwo ɔ?
Kyɛbɔ Yesu dwene afoforɛ nwo ne, Atẽe benimɔ aso yeɛ yɛkɔhora yekosuasua ye ɔ?

6. Yesu te ebie bɔ ye kunu te páa

Ne Yesu kunu te pá ɔmva yenwo kyɛ ne olle nningyein pẽe ne, ɔyɛle mmenia pá, na ɔhyɛle yɛ ngunaen kyɛ yɛkoso yɛyɛ afoforɛ pá. Kenga Asomafoɛ Ne Nnwumaa 20:35, na susu nzɛmmisa he anwo:

Kyɛbɔ Yesu hãne ne, yɛkɔyɛ sɛɛ ne yɛnye agye?

Bɔ VIDIO ne, na susu nzɛmmisa bɔ olili so hemɔ nwo.

VIDIO: “Anigye Pẽe Wɔ Ɛmanɛ Nu”—Ye Bue Bie (4:00)

Atẽe beni aso yeɛ yɛkɔhora yɛkɔhyɛ nikye, ɔmva yenwo kyɛ yelle pẽe ne?

Ɛse?

Bible ne kyire yɛ kyɛ yɛbɔ Yehowa mbaeɛ wɔ Yesu dumaa nu. (Kenga Yohane 16:23, 24.) Sɛ yɛbɔ mbaeɛ wɔ sɔ atẽe naso a, yehyire kyɛ yɛnye sɔ bɔ Yesu ayɛ aboka yɛ kyɛbɔ ɔkɔyɛ a, yɛkɔyɛ Yehowa nnamvoa ɔ.

EBIEMƆ KÃ KYƐ: “Nyameɛpiri ndwene amaneɛ bɔ yenwui nanwo.”