ADESUA 18

Kyɛbɔ Ekonwu Nahorɛ Kristofoɛ Ɔ

BƆ

Mmeni pẽe yeɛ bekyire kyɛ bɛte Kristofoɛ ɔ. Nakoso sɛ ɛnea b’abrabɔ ne bɛ gyidie a, ɔte sorongõ koraa. Yede yɛkɔyɛ sɛɛ ná yanwu nahorɛ Kristofoɛ?

1. Kristoniɛ yeɛ ole nwa?

Kristofoɛ te Yesu Kristo asuafoɛ anaa ye sĩlilɛfoɛ. (Kenga Asomafoɛ Ne Nnwumaa 11:26.) Nzu yeɛ bɛyɛ bɛfa bekyire kyɛ bɛte Yesu asuafoɛ ɔ? Yesu hãne kyɛ: “Sɛ ɛmɔtena me dwirɛ nu a, né ɛmɔte m’asuafoɛ amba.” (Yohane 8:31) Ɛhe kyire kyɛ, odikyɛ nahorɛ Kristofoɛ tie Yesu ngyerɛkyerɛ. Na kyɛbɔ Yesu fale ye ngyerɛkyerɛ gyinane Twerɔnzɛm naso ne, sɔ ala koso yeɛ odikyɛ nahorɛ Kristofoɛ fa bɛ gyidie gyina Bible naso ɔ.—Kenga Luka 24:27.

2. Sɛɛ yeɛ nahorɛ Kristofoɛ da ɔdɔ ali ɔ?

Yesu hã hyirɛle ye sĩlilɛfoɛ ne kyɛ: “Ɛmɔdodɔ ɛmɔ nwo, kyɛbɔ mala ɔdɔ ali mahyire ɛmɔ nala.” (Yohane 15:12) Sɛɛ yeɛ Yesu hyirɛle kyɛ ɔdɔ ye asuafoɛ nemɔ ɔ? Onyane mmerɛ mane bɛ, ɔhyɛle bɛ ngunaen, na ɔbokale bɛ koso. Ɔfale ye ngõa pó tole brɛ mane bɛ. (1 Yohane 3:16) Sɔ ala yeɛ nahorɛ Kristofoɛ koso, na bɛnoa yeɛ bɛfa bɛdɔ ɔ. Na mmom bɛfa bɛ subaen ne bɛ nneyɛe bekyire kyɛ bɛdodɔ bɛnwo.

3. Adwuma bɔ yenwo hia beni yeɛ nahorɛ Kristofoɛ yɛ ɔ?

Yesu mane ye asuafoɛ nemɔ adwuma. “Ɔsomane bɛ maa bɛɛhãne Nyameɛpiri Ahennie nanwo edwirɛ.” (Luka 9:2) Nná asɔneyɛ sua nu ngome yeɛ tete Kristofoɛ hãne dwirɛ pá ne ɔ, mmom dwaaso ne mmenia awuro koso. (Kenga Asomafoɛ Ne Nnwumaa 5:42; 17:17.) Sɔ ala, yeɛ ɛnnɛ, nahorɛ Kristofoɛ koso kyirekyire Bible nu nahorɛ kyire mmenia wɔ nekaa biala ɔ. Ɔnate kyɛ bɛdɔ bɛ mangõ mɔ nati, bɛfa bɛ mmerɛ ne b’anwoserɛ bɛkã awerɛkyekyerɛ, ɔne anyelasoɛ nwo dwirɛ bɔ ɔwɔ Bible nanu ne bekyire bɛ.—Marko 12:31.

SUA PẼE BOKASO

Susu kyɛbɔ ɛkɔhora konwu nzonzoneɛ bɔ ɔla nahorɛ Kristofoɛ ne bɛbɔ benni Yesu ngyerɛkyerɛ ne ye nneasoɛ sĩ nanwo ɔ.

4. Bɛpena nahorɛ bɔ ɔwɔ Bible nu ne

Né Bible ne sombo ma tete Kristofoɛ ne

Nná bɛbɔ bɛkã kyɛ bɛte Kristofoɛ ne mukoraati yeɛ Bible nanu nahorɛ ne sombo ma bɛ ɔ. Bɔ VIDIO ne, na susu nzɛmmisa bɔ oliso he anwo.

VIDIO: Kyɛbɔ Bɛsɛkyele Kristosom Ɔ (5:11)

Atẽe beni aso yeɛ asɔre ahoroɛ bɔ besé kyɛ, bɛte Kristofoɛ ne asɛkye Yesu ngyerɛkyerɛ ne ɔ?

Yesu hyirehyirɛle nahorɛ bɔ ɔwɔ Nyameɛpiri Dwirɛ nanu ne. Kenga Yohane 18:37, na afei susu nzɛmmisa he anwo:

Kyɛbɔ Yesu hãne ne, atẽe beni aso yeɛ yɛkɔhora yekonwu Kristofoɛ bɔ “begyi nahorɛ ne sĩ” ɔ?

5. Bekyirekyire Bible nanu nahorɛ ne

Tete Kristofoɛ ne, bɛhãne nzɛmba ne behyirɛle mmenia

Koraka Yesu baahɔ anwuro ne, ɔfale adwuma bie wurale ye asuafoɛ nemɔ sa, na sɔ adwuma ne ahɔ so alaa waadwu ɛnnɛ. Kenga Mateo 28:19, 20 ɔne Asomafoɛ Ne Nnwumaa 1:8, na susu nzɛmmisa he anwo:

Niswa yeɛ bɛkɔhã nzɛmba ne bekoodwu ɔ?

6. Bɛfa bɔ bɛkã ne bɛbɔ bɛbra

Nzu yeɛ ɔmaa biãa bie bɔ bɛfrɛ ye Tom lelili kyɛ wanwu nahorɛ sõen ɔ? Bɔ VIDIO ne, na susu nzɛmmisa bɔ olili so hemɔ nwo.

VIDIO: Maba Nu Buli Wɔ Nyamesom Nwo (5:20)

Wɔ vidio nanu ne, nzu yeɛ ɔmaa Tom pale aba wɔ nyamesom nwo ɔ?
Nzu yeɛ ɔmaa ole lili kyɛ wanwu nahorɛ ne ɔ?

Yɛ nneyɛe kã pẽe fa yɛnwo tra edwirɛ bɔ yɛkã ɔ. Kenga Mateo 7:21, na susu nzɛmmisa he anwo:

Nzu yeɛ yenwo hia Yesu paa ɔ—bɔ yɛfa yɛnoa mbaen yɛkã kyɛ yedé yedi, anaa bɔ yɛfa yɛ nneyɛe yekyire ɔ?

7. Bɛdodɔ bɛnwo

Tete Kristofoɛ ne, né bɛdodɔ bɛnwo

Aso Kristofoɛ biemɔ afa bɛ ngõa ato berɛ ama beliemaamɔ Kristofoɛ lé anaa? Bɔ VIDIO ne, na susu nzɛmmisa bɔ olili so hemɔ nwo.

VIDIO: Ofili Ye Pɛ Nu Fale Ye Ngõa Mane (2:55)

Wɔ vidio nanu ne, nzu yeɛ ɔmaa Lloyd fale ye ngõa tole berɛ mane Aliemaa Johansson ɔ?
Aso esusu kyɛ ɔyɛle yenwo kyɛ nahorɛ Kristoniɛ anaa?

Kenga Yohane 13:34, 35, na afei susu nzɛmmisa hemɔ nwo:

Sɛɛ yeɛ Yesu sĩlilɛfoɛ bɔ bɛte (nahorɛ Kristofoɛ) ne ne mmenia bɔ ɔsono bɛ amammerɛ anaa befi maen foforɛ so ne di ɔ?
Sɛ kõɛ si a, sɛɛ yeɛ bɛyɛ bɛ nikye ɔ?

EBIEMƆ KÃ KYƐ: “Kristofoɛ ayɛ nningyein tɛɛ pẽe—yeti ɔkɔyɛ sɛɛ ná bahora bayɛ nahorɛ sõen?”