Yehowa te asomdwee Nyameɛpiri. (1 Korintofoɛ 14:​33) Yeti yɛnea atẽe kyɛ, ye mmenia kɔfa nhyehyɛeɛ kɔyɛ adwuma. Sɛɛ yeɛ bahyehyɛ Kristofoɛ asafo ne ɔ? Yɛkɔyɛ sɛɛ ne yaboka maa sɔ nhyehyɛeɛ he ahɔ so?

1. Nwa yeɛ ɔte asafo ne ti ɔ?

“Kristo yeɛ ɔte asafo ne ti ɔ.” (Ɛfesofoɛ 5:​23) Yehowa ngoaa bɔ bɛwɔ ewiase mukoraati ne, Kristo fi anwuro yeɛ odi benyunu ɔ. Yesu aye “akoaa nahorɛfoɛ ne badwemma ne”​—bɛte mbanyi kue kãa bɔ bele suanwu bɔ besa bɛfrɛ bɛ Akwangerɛ Kue. (Kenga Mateo 24:​45-​47.) Tekyɛ asomafoɛ ne, ne mbanyi bɔ né bɛwɔ Yerusalɛm ne, Akwangyerɛ Kue ne yeɛ ɔma asafo ahoroɛ bɔ bɛwɔ ewiase mukoraati ne akwangyerɛ ɔ. (Asomafoɛ Ne Nnwumaa 15:2) Nakoso y’ahyehyɛdeɛ ne, ɔtte sɔ mmienzua hemɔ deɛ. Bɛpena akwangyerɛ befi Yehowa, ɔne ye Dwirɛ nanu, na bɛberɛ bɛnwo ase bewura Yesu tiyɛ bo.

2. Dwumaa beni yeɛ asafo nu mbanyi di ɔ?

Asafo nu mbanyi te Kristofoɛ mmienzua bɔ bele suanwu, na befi Tworɔnzɛm nanu bekyirekyire Yehowa mmenia, bɛboka bɛ, na bɛhyɛ bɛ ngunaen koso. Bendua bɛ kerɛ wɔ adwuma bɔ bɛyɛ nanwo. Mmom, befĩa bɛkunu ‘bɛnea bɛso yé kyɛbɔ Nyameɛpiri pena ɔ, benni yenwo akatuaa sĩ, na mmom befi b’ahõne nu.’ (1 Petro 5:​1, 2) Asafo nu asomvoɛ boka mbanyi nemɔ, na sɛ bɛtete bɛ maa bedwu Bible nu ahwehwɛdeɛ nanwo a, bɛba fata kyɛ asafo nu mbanyi.

Akwangyerɛ Kue ne ye mbanyi ne bie maa bɛsõ kyɛ manzin soneafoɛ. Bɛsrasra asafo ahoroɛ ne, bɛhyɛ bɛ ngunaen, na bɛma bɛ akwangyerɛ. Manzin soneafoɛ gyina tworɔnzɛm nanu ahwehwɛdeɛ so ye mmienzua maa bɛsõ kyɛ asafo nu mbanyi ne asomvoɛ.​—1 Timoteo 3:​1-​10, 12; Tito 1:​5-9.

3. Asɛyɛdeɛ beni yeɛ Yehowa Danzeniɛ biala le ye ɔ?

Asafo nanufoɛ mukoraati “ye Yehowa dumaa ne ayɛ” nate bɛnwo bɔ bɛfa bewura asafo nhyiamu dwumadié ne asɛnga adwuma nanu, kyɛbɔ bɛ tebea kɔma b’atẽe ɔ.​—Kenga Edwein 148:​12, 13.

 SUA PẼE BOKASO

4. Yesu te kanifoɛ pá

Yesu fa anigye to asaa frɛ yɛ. Kenga Mateo 11:​28-​30, ná susu nzɛmmisa he anwo:

• Sɛɛ yeɛ Yesu penakyɛ yɛte ngã wɔ kyɛbɔ odi asafo ne nyunu nanwo ɔ?

5. Asafo nu mbanyi yɛ nneasoɛ ma afoforɛ

1. Asafo nu mbanyi hyɛ bɛne Yehowa afĩa abusuabɔ nu serɛ, na bɛboka bɛ mmusua maa bɛyɛ sɔ

2. Asafo nu mbanyi dwene asafo nanuniɛ biala nwo

3.   Asafo nu mbanyi kɔ asɛnga daa

4. Asafo nu mbanyi te akyerɛkyerɛfoɛ. Bɛboka maa yesiesie nekaa bɔ yɛsõ ne, na bɛyɛ nnwumaa foforɛ koso

6. Yɛkɔhora ne asafo nu mbanyi kɔbɔ nu kɔyɛ adwuma

Bible maa yenwu nikyee titire bɔ yeɛ odikyɛ yɛne asafo nu mbanyi bonu yɛ adwuma ɔ. Kenga Hebrifoɛ 13:​17, ná susu nzɛmmisa hemɔ nwo:

• Aso ndeaseɛ wɔ nu kyɛ yekotie bɛbɔ beli asafo ne nyunu ne, na yɛbrɛ yɛnwo ase yɛma bɛ kyɛbɔ Bible ne kyire ne anaa? Nzuati ɔ? anaa nzuati yeɛ enné nni ɔ?

Kenga Luka 16:​10, na susu nzɛmmisa he anwo:

• Nzuati yeɛ yenwo hia kyɛ yetie asafo nu mbanyi wɔ nningyein maamaa pó nu ɔ?

 YEMUABƆLƐ

Yesu te asafo ne ti. Yefi anigye nu yetie asafo nu mbanyi bɔ bewura Yesu bo ne, ofikyɛ bɛfa b’abrabɔ bɛyɛ nneasoɛ bɛma yɛ.

Ndimu

• Nwa yeɛ ɔte asafo ne ti ɔ?

• Sɛɛ yeɛ mbanyi nemɔ boka asafo ne ɔ?

• Asɛyɛdeɛ beni yeɛ Yehowa somvoɛ biala le ye ɔ?