ADESUA 22

Ɛkɔyɛ Sɛɛ Na Ahora Ahã Edwirɛ Pá Ne Bie?

BƆ

Mmerɛ bɔ esua nahorɛ bɔ ɔwɔ Bible nanu ne, ebia ɛkɔhã kyɛ, ‘Ɛhede, odikyɛ ebiala te bie!’ Amba, odikyɛ ebiala te! Nakoso, ebia esuroen kɔhã wɔ kyɛ, ɛkɔhã bɔ asua nanwo dwirɛ kohyire afoforɛ. Yede, ma yɛnea bɔ ɛkɔhora kɔyɛ na ali sɔ esuroen naso, na ahora afa anigye ahã edwirɛ pá bɔ ɔwɔ Bible nanu ne bie ahyire afoforɛ.

1. Ɛkɔyɛ sɛɛ na ahora ahã bɔ asua ne bie ahyire mmenia bɔ ɛse bɛ ɔ?

Yesu asuafoɛ ne hãne kyɛ: “Yɛngɔhora ngɔyakyi bɔ yate, na yanwui nanwo dwirɛ hãnɛ.” (Asomafoɛ Ne Nnwumaa 4:20) Ɔnate kyɛ né Bible nanu nahorɛ ne sombo ma bɛ nati, né bɛ pena kyɛ bɛyɛ bɔ bɛkɔhora biala bɛkã bie bekyire afoforɛ. Wɔ koso sɔ yeɛ ɛte ngã anaa? Yede, pena yenwo atẽe bɔ ɛkɔhora kofi obuo nu kɔhã bɔ asua nanwo dwirɛ kohyire w’abusuafoɛ, ne wɔ nnamvo.—Kenga Kolosefoɛ 4:6.

Atẽe bɔ ɛkɔfa so kɔhyɛ yebo ɔ

Sɛ ɛne w’abusuafoɛ bɔ ngɔmmɔ a, kã Bible nu dwirɛ bie bɔ ɔyɛ anigye kyire bɛ. Ɛkɔhora kɔhã kyɛ: “Nzuane nikyeebie bɔ ɔkã ahõne paa dapɛen he.”
Kã Bible nu ngunaenhyɛ dwirɛ kyire wɔ damvo bie bɔ wafokyɛ anaa oyia ɔhaw ɔ.
Sɛ w’adwumayɛfoɛ bisa wɔ bɔ ɔhɔle so dapɛen nanu a, kã bɔ esuane wɔ Bible nanu, anaa asafo nhyiamu bo ne bie nwo dwirɛ kyire bɛ.
Kyire wɔ nnamvomɔ ma bɛhɔ jw.org wɛbsait naso.
To asaa frɛ afoforɛ maa bɛɛtena wɔ Bible adesua nu bie, anaa bɛɛpena ebie bɔ ɔne bekosua nikyee wɔ jw.org so.

2. Nzuati yeɛ yenwo hia kyɛ ɛne asafo ne bonu kã nzɛmba ne ɔ?

Nná mmenia bɔ né Yesu asuafoɛ nemɔ se bɛ ngõme yeɛ bɛhãne nzɛmba ne behyirɛle bɛ ɔ. Yesu “somane bɛ nyɔ nyɔ lili ye nyunu hɔle nguro biala nu” maa bɛɛhãne nzɛmba ne. (Luka 10:1) Sɔ nhyehyɛeɛ bɔ bɛyɛle bɛfa bɛhãne nzɛmba ne bokale maa mmeni pẽe nyane yenwo atẽe bɛtele edwirɛ pá ne. Kyɛbɔ asuafoɛ nemɔ boli nu hãne nzɛmba ne koso maa bɛnye gyele paa. (Luka 10:17) Wɔ koso ɛkɔhora kɔfa kɔyɛ wɔ botaeɛ kyɛ, ɛne asafo ne kɔbo nu kɔhɔ asɛnga anaa?

SUA PẼE BOKASO

Nea kyɛbɔ ɛkɔhora koli esuroen ahoroɛ so, ná ahora anya nzɛmba ne hãnɛ nanu anigye ne bie ɔ.

3. Yehowa kɔboka wɔ

Kyɛbɔ afoforɛ kɔyɛ bɛ nikyee ne kɔhora kɔmaa esuroen kɔhã ebie bɔ ɔpena kyɛ, ɔkã nzɛmba ne bie ne.

Aso esuro kyɛ ɛkɔhã bɔ asua nanwo dwirɛ kohyire afoforɛ anaa? Nzuati ɔ, anaa nzuati yeɛ enné nni ɔ?

Bɔ VIDIO ne, na susu nzɛmmisa hemɔ anwo.

VIDIO: Mmɔle Yehowa Mbaeɛ Kyɛ Ɔma Nya Akokoduro (4:05)

Sɛɛ yeɛ Adanzefoɛ mmabunu bie hora lili esuroen so ɔ?

Kenga Aizaya 41:10, na susu nzɛmmisa he anwo:

Sɛ esuro kyɛ ɛkɔhɔ asɛnga a, sɛɛ yeɛ mbaeɛ kɔhora kɔboka wɔ ɔ?

Ɛse?

Mmerɛ bɔ ne ebiemɔ nnya bɛɛyɛle Yehowa adanzefoɛ ne, né bɛte ngã kyɛ bɛngɔhora bɛngɔhã edwirɛ pá ne bie llé. Yɛfa Sergey kyɛ nneasoɛ, né ɔte ngã kyɛ yeso llé mvasoɛ, na ne ɔyɛ se ma ye kyɛ ɔne afoforɛ kodwudwo. Nakoso mmerɛ bɔ ɔhyɛle yebo suane Bible ne, ɔhãne kyɛ: “Ɔmva yenwo kyɛ ne me fɛre nikyee ne, nhyɛle yebo ngãne bɔ ne mesua nanwo dwirɛ ngyerɛle afoforɛ. Bɔ ɔyɛle me nwanwa yeɛ ole kyɛ, Bible nanu dwirɛ bɔ ngã ngyerɛle afoforɛ ne maa anwotɔsoɛ bɔ nné ye nanu yɛle se. Na gyidie foforɛ bɔ nyane ye nanu koso yɛle se.”

4. Da obuo ali

Sɛ ɛkã nzɛmba ne a, nná bɔ ɛkɔhã ngome yeɛ odikyɛ esusu yenwo ɔ, na mmom odikyɛ ɛnea kyɛbɔ ɛkɔhã ye koso. Kenga 2 Timoteo 2:24 ɔne 1 Petro 3:15, na susu nzɛmmisa bɔ olili so he anwo:

Sɛɛ yeɛ ɛkɔhora kɔfa sɔ twerɔnzɛm hemɔ kɔyɛ adwuma, mmerɛ bɔ ɛkã Bible nanu dwirɛ kyire afoforɛ ne?
Sɛ abusuafoɛ ne wɔ nnamvo biemɔ ne wɔ aanyɛ adwene a, nzu yeɛ odikyɛ ɛyɛ ɔ? Na nzu yeɛ ɔnzɛkyɛ ɛyɛ ɔ?
Nzuati yeɛ odikyɛ ɛfa nzɛmmisa bɔ okenya adwene di dwumaa, tra kyɛ ɛkɔhyɛ afoforɛ maa bekolé bɔ ɛkã ne koli ɔ?

5. Sɛ yɛka nzɛmba ne a, ɔmaa yɛnye gye

Yehowa fale adwuma wurale Yesu sa kyɛ ɔhã nzɛmba ne. Sɛɛ yeɛ Yesu buli sɔ adwuma ne ɔ? Kenga Yohane 4:34, na susu nzɛmmisa hemɔ anwo:

Sɛ yedi aleɛ bɔ ɔte kama a, ɔmaa yenya anwoserɛ na yɛnye gye. Nzuati yeɛ Yesu fale Nyameɛpiri apɛdeɛ bɔ ɔkɔyɛ—bɔ nzɛmba ne hãnɛ koso bokaso—totole aleɛ bɔ yedi nanwo ɔ?
Sɛ yɛkã nzɛmba ne yekyire afoforɛ a, anigye beni yeɛ ɛnea yekonya ye ɔ?

Nyanzahyɛ

Sɛ ɛkɔ dapɛen afĩa nhyiamu nabo a, nea atẽe bɔ ɛkɔhora kɔfa so kɔhã nzɛmba ne ɔ.
Bɔ mmɔden fa wɔnwo wura asuafoɛ dwumadié bɔ ɔkɔ so wɔ dapɛen afĩa nhyiamu nabo nanu. Asuafoɛ dwumadié ne kɔboka wɔ maa ekosiesie wɔnwo kɔhã bɔ esua nanwo dwirɛ kohyire afoforɛ.
Fa bɔ “Ebiemɔ kã” anaa “Ebia Ebie Kobisa Kyɛ” bue berɛ bɔ ɔwɔ sɔ nwomaa he anu ne yɛ adwuma, na nea kyɛbɔ ɛkɔye nzɛmmisa ahoroɛ ɔne edwirɛ biemɔ noa ɔ.

EBIA EBIE KOBISA KYƐ: “Nikyee foforɛ beni yeɛ ɔfa ɛmɔnwo ɔ?”

Sɛɛ yeɛ ɛkɔhora kɔfa yenwo atẽe bɔ ɔte sɔ ne, kɔhã bɔ asua afi Bible nanu ne bie kohyire ye ɔ?

YEMUABƆLƐ

Sɛ ɛkã edwirɛ pá ne bie kyire afoforɛ a ɔmaa wɔnye gye, na ye yɛlɛ nyɛ se kyɛbɔ wɔ adwene yɛ wɔ ne.

Ndimu

Nzuati yeɛ odikyɛ ɛkã edwirɛ pá ne bie kyire afoforɛ ɔ?
Sɛɛ yeɛ ɛkɔhora kɔfa obuo atẽe so kɔyɛ ɛhe ɔ?
Ɛkɔyɛ sɛɛ na ahora ali esuroen biala bɔ ɔkɔhora kɔhã wɔ wɔ́ edwirɛ pá bɔ ɛkɔhã naso?

Yafa adesua ne yadwu:

Botaeɛ

Pena ebie bɔ ɛkɔhora kɔhã edwirɛ pá ne bie kohyire ye ɔ. Na susu edwirɛ bɔ ɛkɔhã, kyɛbɔ ɛkɔhã ye, ɔne mmerɛ bɔ ɛkɔhã nanwo.

Anaakyɛ:

Wɔ botaeɛ foforɛ