Ewue fa yalɛ ne aworaborɛ ba. Ɛhene ati yeɛ Bible frɛ ewue kyɛ ɔte pɔfoɛ ne. (1 Korintofoɛ 15:​26) Wɔ Adesua 27 nanu ne, yesuane kyɛ Yehowa kɔye sɔ pɔfoɛ ne kofi berɛ. Nakoso nzu yeɛ ɔkɔto bɛbɔ bawuwu dada ne ɔ? Wɔ adesua he anu ne, yekosua pẽe kɔfa bɔhyɛ foforɛ bɔ ɔyɛ nwanwa bɔ Yehowa ahyɛ nanwo​—okotingye mmenia apepesrala pẽe maa bekosa bɛkɔtena ase daa wɔ anigye nu. Kyɛbɔ ɔte biala okotingye bɛ! Sɛ enea a, ɔkɔhora kɔyɛ yé? Aso okotingye bɛ maa bɛkɔɔtena anwuro anaa aseɛ he aso?

1. Nzu yeɛ Yehowa pena kyɛ ɔyɛ ma y’adɔfoɛ bɔ bawuwu ne ɔ?

Yehowa nye agyina kyɛ ɔkɔfa bɛbɔ bawuwu ne kɔwa ngõa nu biekũ. Né Yob bɔ ye gyidie yɛ se ne dédi kyɛ sɛ owu a, Nyameɛpiri wora ngofi ye lle. Ɔhã hyirɛle Nyameɛpiri kyɛ: “Ɛkɔfrɛ, na ngole wɔso [wɔ ewue Kumaa nu].”​—Kenga Yob 14:​13-​15.

2. Yɛkɔyɛ sɛɛ ne yanwu kyɛ awufoɛ kodwɔso?

Mmerɛ bɔ ne Yesu wɔ aseɛ he aso ne, Nyameɛpiri mane ye tumi bɔ ɔkɔfa kotingye mmenia ɔ. Yesu tingyele abayaa bie bɔ ne wali afoɛ 12, ɔne kunaniɛ bie awa brenzua maa bɛwale ngõa nu. (Marko 5:​41, 42; Luka 7:​12-​15) Nziɛen, Yesu damvo Lazarus wule. Ɔwɔ nu kyɛ né Lazarus awu bɔ basie ye maa wali ɛlɛ nna de, koso Yesu maa ɔwale ngõa nu biekũ. Mmerɛ bɔ Yesu bɔle Nyameɛpiri mbaeɛ yiele ne, ɔtiane nu hãne kyɛ: “Lazarus, fité bra!” Na “brenzua bɔ ne wawu ne fité wale”​—bɔ ne ole ngõa ɔ! (Yohane 11:​43, 44) Wɔde pɛ yenwo mvoni nea kyɛbɔ Lazarus abusuafoɛ ne ye nnamvomɔ nye si gyele ɔ!

3. Anyelasoɛ beni yeɛ ɔwɔ berɛ ma w’dɔfoɛ bɔ bawuwu ne ɔ?

Bible ne ahyɛ bɔ kyɛ: “Awufoɛ kodwɔso.” (Asomafoɛ Ne Nnwumaa 24:​15) Bɛbɔ Yesu tingyele bɛ tete ne, baangɔ anwuro. (Yohane 3:​13) Benye gyele kyɛ betingyele bɛ maa bɛɛtena aseɛ so biekũ ɔ. Ɔngɔhyɛ, Yesu kotingye mmenia apepesrala pẽe bɔ bawuwu ne maa bɛkɔɔtena ase daa wɔ paradise aseɛ so. Ɔhãne kyɛ “bɛbɔ bɛwɔ ngaeɛ kumaa nu mukoraati”​—bɔ ebia sona wora afi bɛ, nakoso bɛwɔ nyameɛpiri ngaeɛ nu ne​—okotingye bɛ kɔwa ngõa nu.​—Yohane 5:​28, 29.

 SUA PẼE BOKASO

4. Yesu hyirɛle kyɛ ɔkɔhora kotingye awufoɛ

Sua bɔ Yesu yɛ mane ye damvo Lazarus nwo dwirɛ pẽe. Kenga Yohane 11:​14, 38-​44, na susu nzɛmmisa hemɔ anwo:

• Nzu yeɛ ɔmaa yenwu kyɛ Lazarus wuli amba ɔ? ​—Nea ngyekyemuɛ 39.

• Sɛ Lazarus hɔle anwuro a, esusu kyɛ ahãa Yesu kotingye ye kɔwa aseɛ he aso anaa?

Bɔ VIDIO ne.

5. Bekotingye mmeni pẽe!

Kenga Edwein 37:​29, na susu nzɛmmisa he anwo:

• Niswa yeɛ mmenia apepesrala pẽe bɔ bekotingye bɛ ne kɔtena ɔ?

Nná mmenia bɔ bɛsõne Yehowa ne ngome yeɛ Yesu kotingye bɛ ɔ. Kenga Asomafoɛ Ne Nnwumaa 24:​15, na susu nzɛmmisa he anwo:

• Nwa yeɛ ɛpena kyɛ betingye ye ɔ?

• Sɛɛ yeɛ ewue dwɔsole nwo anyelasoɛ ne kyekyele Filisity awufoɛ wora, na ɔmaa benyane akokoduro ɔ?

 YEMUABƆLƐ

Bible ne hyɛ bɔ kyɛ mmenia apepesrala pẽe bɔ bawuwu ne kotingye. Yehowa pena kyɛ besa bɛtena ase biekũ, ná wama Yesu tumi bɔ ɔkɔfa kotingye bɛ ɔ.

Ndimu

• Sɛɛ yeɛ Yehowa ne Yesu te ngã, wɔ awufoɛ bɔ bɛkɔfa bɛ kɔwa ngõa nu nanwo ɔ?

• Niswa yeɛ mmenia apepesrala pẽe bɔ bekotingye bɛ ne kɔtena ɔ​—anwuro anaa aseɛ he aso? Nzuati yeɛ ɛkã sɔ ɔ?

• Nzu yeɛ ɔmaa edédi kyɛ, w’adɔfoɛ bɔ bawuwu ne kɔwa ngõa nu biekũ ɔ?