ADESUA 34

Yɛkɔyɛ Sɛɛ Ne Yahyire Kyɛ Yɛdɔ Yehowa?

BƆ

Ofi mmerɛ bɔ ɛhyɛle yebo suane Bible ne, aso ate ngã kyɛ apingye Nyameɛpiri anaa? Aso ɛpena kyɛ ɛkɔso hyɛ ɛne ye adamvoa falɛ nanu serɛ? Sɛ sɔ de a, kae kyɛ mmerɛ dodoɔ bɔ Yehowa nwui kyɛ ɔdɔ bɔ ele ma ye nanu yɛ se ne, ɔkɔhɔso kɔlɔ wɔ na wabɔ wɔnwo waen. Ɛkɔyɛ sɛɛ na amaa wanwu kyɛ ɛdɔ ye?

1. Yɛkɔyɛ sɛɛ na yamaa Yehowa awu kyɛ yɛdɔ ye?

Sɛ yetie Yehowa a, yɛda yali kyɛ yɛdɔ ye. (Kenga 1 Yohane 5:3.) Ɔnhyɛ ebiala kyɛ otie ye. Na mmom, ɔmaa yenu biala nya yenwo atẽe bɔ yɛkɔfa yɛkɔla ye ali kyɛ yekotie ye anaakyɛ yengotie ye. Nzuati ɔ? Ofikyɛ Yehowa pena kyɛ “yefi y’ahõne nu yɛyɛ setie yɛma ye.” (Romanfoɛ 6:17) Wɔ atẽe foforɛ so ne, ɔpena kyɛ ɛyɛ setie ma ye, ɔtte kyɛ odikyɛ ɛyɛ sɔ ti ɔ, na mmom ɔdɔ bɔ ele ma ye nati. Bayɛ adesua bue 3 ne 4 bɔ ɔwɔ nwomaa he anu ne kyɛ ɔboka wɔ maa ɛla ye ali kyɛ ɛdɔ Yehowa, mmerɛ bɔ ɛyɛ bɔ ɔsɔ yenye, na ɛpo nningyein bɔ ɔnzɔ yenye ne.

2. Nzuati yeɛ ɔkɔhora kɔyɛse kɔma yɛ kyɛ yɛkɔla ɔdɔ ali yekohyire Yehowa ɔ?

“Teneneeniɛ amaneɛnwunɛ sone.” (Edwein 34:19) Yenu biala kõ tia ye sintɔ ahoroɛ. Na yeyia sikanzɛm nu ahokyerɛ, atɛngyea, ɔne ɔhaw foforɛ koso. Sɛ yɛkɔ ɔhaw nu a, ɔngɔyɛ mmerɛ ngɔma yɛ kyɛ yɛkɔyɛ bɔ Yehowa pena fi yɛ berɛ ne. Ofikyɛ bɔne de, ye yɛlɛ nyɛ se. Nakoso sɛ efi nahorɛlilɛ nu yɛ bɔ Yehowa kã kyire wɔ ne a, ɛda yali kyɛ ɛdɔ ye tra nikyee biala. Sɛ ɛbɔ mmɔden di ye nahorɛ a, ye koso okoli wɔ nahorɛ. Na ɔngɔyakyi wɔnu llé.—Kenga Edwein 4:3.

SUA PẼE BOKASO

Nea kyɛbɔ setie bɔ ɛkɔyɛ kɔma Yehowa ne si hia ye, na sua bɔ ɔkɔboka wɔ maa ɛkɔhɔso koli nahorɛ kɔma ye nanwo nikye.

3. Edwirɛ bɔ ɔfa wɔnwo ɔ

Kyɛbɔ Bible nu nwomaa bɔ yeɛ ole Yob ne kã ne, Satan pɛle edwirɛ bie tole Yob so bɔ nna ye ngome yeɛ ɔfa yenwo ɔ, na mmom ɔfa mmenia bɔ bɛpena kyɛ bɛsõ Yehowa ne mukoraati koso nwo. Kenga Yob 1:1, 6–2:10, na susu nzɛmmisa hemɔ anwo:

Ɛnea bɔ Satan hãne ne a, nzuati yeɛ Yob tiele Yehowa ɔ?—Nea Yob 1:9-11.
Adwene beni yeɛ Satan le ma mmenia mukoraati, bɔ wɔ koso ɛbokaso ɔ?—Nea Yob 2:4.

Kenga Yob 27:5b, na susu nzɛmmisa he anwo:

Sɛɛ yeɛ Yob hyirɛle kyɛ ɔdɔ Yehowa amba ɔ?

Yob hyirɛle kyɛ ɔdɔ Yehowa mmerɛ bɔ ɔhɔle so lili nahorɛ mane ye ne

Sɛ yedi nahorɛ yɛma Yehowa a, yekyire kyɛ yɛdɔ ye

4. Ma Yehowa ahõne tɔ ye kunu

Kenga Anyandera 27:11, na susu nzɛmmisa he anwo:

Sɛ etie Yehowa na ɛda nworɛ adi a, sɛɛ yeɛ ɔte ngã ɔ? Nzuati ɔ?

5. Ɛkɔhora koli nahorɛ kɔma Yehowa

Ɔdɔ bɔ yele yɛma Yehowa ne kã yɛ maa yɛkã yenwo dwirɛ ye kyire afoforɛ. Nahorɛ bɔ yedi yɛma ye ne kã yɛ maa yɛyɛ sɔ, ɔmva yenwo kyɛ ɔnnyɛ mmerɛ mma yɛ ne. Bɔ VIDIO ne, na susu nzɛmmisa hemɔ anwo.

VIDIO: Sɛ Eyia Ɛpɔen Po A, Tra Wɔ Gyidie Nu (5:09)

Aso ɔyɛ se ma wɔ kyɛ ɛkɔhã Yehowa nwo dwirɛ kohyire afoforɛ anaa?
Wɔ vidio nanu ne, nzu yeɛ ɔbokale Grayson maa ɔhora lili esuroen so ɔ?

Sɛ yɛdɔ nikyee bɔ Yehowa kuro, na yekyi bɔ onguro a, ɔngɔyɛse ngɔma yɛ kyɛ yekoli nahorɛ yɛkɔma ye ɔ. Kenga Edwein 97:10, na susu nzɛmmisa hemɔ anwo:

Sɛ ɛnea bɔ asua ne a, nningyein benimɔ yeɛ Yehowa kuro ɔ? Na nningyein benimɔ yeɛ onguro ɔ?
Ɛkɔyɛ sɛɛ na asua kyɛ ɛkɔlɔ bɔ ɔte pá na ahyi bɔ ɔttemayé ɔ?

6. Sɛ yetie Yehowa a yenya so mvasoɛ

Sɛ etie Yehowa a, yenya so mvasoɛ daa. Kenga Aizaya 48:17, 18, na susu nzɛmmisa hemɔ anwo:

Esusu kyɛ yɛkɔhora yɛkɔfa yɛnwo yɛkɔto Yehowa so kyɛ, ye yeɛ daa ɔse bɔ ɔte pá ma yɛ anaa? Nzuati ɔ?
Ɔbaadwu bekye ne, mvasoɛ beni yeɛ anya afi nahorɛ Nyameɛpiri Yehowa, ɔne Bible ne bɔ asua naso ɔ?

EBIEMƆ KÃ KYƐ: “Kyɛbɔ ngɔbɔ me bra ne mva Nyameɛpiri nwo.”