ADESUA 36
Di Nahorɛ Wɔ Nikyee Biala Nu
Ebiala kuro adamvoa bɔ odi nahorɛ ɔ. Yehowa nea atẽe kyɛ ye namvoa koso koli ye nahorɛ. Nakoso ɛhe lla ase koraa, ofikyɛ mmenia bɔ bɛwɔ ewiase nanu biemɔ nni nahorɛ. Mvasoɛ beni yeɛ ɔwɔ nahorɛ bɔ yekoli wɔ nikyee biala nu naso ɔ?
1. Nzuati yeɛ yenwo hia paa kyɛ edi nahorɛ ɔ?
Sɛ yedi afoforɛ nahorɛ a, yɛmaa Yehowa nwu kyɛ yɛdɔ ye na yebu ye. Susu ɛhe anwo nea: Kyɛbɔ yɛdwene ne nikyee biala bɔ yɛyɛ ne, Yehowa se yemukoraati. (Hebrifoɛ 4:13) Sɛ yesi gyinaeɛ kyɛ yekoli nahorɛ a, onwui na yenye sɔ. Ye Dwirɛ ne kã kyɛ: “Yehowa kyi ngondombofoɛ, nakoso atreneefoɛ yeɛ bɛte ye nnamvo paa ɔ.”—Anyandera 3:32.
2. Yɛkɔyɛ sɛɛ ne yali nahorɛ wɔ yɛ daabiala asetena nu ɔ?
Yehowa pena kyɛ “yɛkã nahorɛ yekyire yɛnwo ne yɛnwo.” (Zekaria 8:16, 17) Nzu yeɛ ɛhe kyire ɔ? Sɛ́ yedwudwo yekyire yɛ mmusuafoɛ, yɛ adwumayɛfoɛ, yɛliemaamɔ Kristofoɛ, anaa awaen mbanyi a, yɛmbɛ anoanu anaa yɛngã edwirɛ bɔ ɔtte nahorɛ ɔ. Bɛbɔ bedi nahorɛ ne, benwia anaa bɛmmu mmenia bɛmvaso. (Kenga Anyandera 24:28 ɔne Ɛfesofoɛ 4:28.) Na betua bɛ toɔ koso. (Romanfoɛ 13:5-7) Wɔ atẽe foforɛ biala so ne, yɛfa “nahorɛlilɛ yɛbɔ yɛ bra wɔ nikyee biala nu.”—Hebrifoɛ 13:18.
3. Mvasoɛ beni yeɛ ɔwɔ nahorɛlilɛ so ɔ?
Sɛ afoforɛ nwu kyɛ yedi nahorɛ a, bɛdé yɛ di. Yɛboka maa ebiala bɔ ɔwɔ asafo nanu ne nye gye, na ɔbayɛ tekyɛ abusua bɔ anigye wɔ nu ɔ. Ɔmaa yenya tiboa pá. Nahorɛ bɔ yekoli ne koso “maa yɛ Agyengwa, Nyameɛpiri ngyerɛkyerɛ nanwo ba nyam,” na ɔtwẽ bɛbɔ bɛnne asafo nanu maa bɛba sõ Yehowa.—Tito 2:10.
SUA PẼE BOKASO
Nea kyɛbɔ nahorɛlilɛ kɔhora kɔhã ɛne Yehowa abusuabɔ ne, na sua kyɛbɔ ekoli nahorɛ wɔ w’asetena mukoraati nu ɔ.
4. Nahorɛlilɛ hyɛ Yehowa animnyam
Kenga Edwein 44:21 ɔne Malaki 3:16, na susu nzɛmmisa hemɔ anwo:
-
Nzuati yeɛ esusu kyɛ nworɛ nne nu kyɛ yɛkɔpɛ ngondombo ɔ?
-
Sɛ yɛkã nahorɛ mmerɛ bɔ ɔyɛse ma yɛ po a, sɛɛ yeɛ Yehowa te ngã ɔ?
Sɛ ngwalaa kã nahorɛ a, bɛmaa b’awofoɛ nye gye. Sɔ ala yeɛ sɛ yɛkã nahorɛ a, ɔmaa Yehowa nye gye ɔ
5. Di nahorɛ mmerɛ mukoraati
Mmani pẽe susu kyɛ nna mmerɛ mukoraati yeɛ nahorɛlilɛ nwo hia ɔ. Nakoso nea nikyehorɛ tibɔ yenwo hia kyɛ yedi nahorɛ mmerɛ mukoraati ɔ. Bɔ VIDIO ne.
Kenga Hebrifoɛ 13:18, na susu kyɛbɔ yɛkɔhora yekoli nahorɛ wɔ . . .
-
y’abusua nu.
-
adwuma anaa sukuu nu.
-
tebea foforɛ nu.
6. Yenya mvasoɛ yefi nahorɛ bɔ yekoli naso
Ahyɛaseɛ ne, ebia nahorɛlilɛ kɔmaa yekoyia ɔhaw. Nakoso ayieleɛ koraa ne, yenya so mvasoɛ. Kenga Edwein 34:12-16, na susu nzɛmmisa he anwo:
-
Sɛɛ yeɛ nahorɛlilɛ kɔmaa ekonya anigye wɔ w’asetena nu ɔ?
-
Hũemɔ ne yeɛmɔ bɔ bedi nahorɛ ne, benya anigye wɔ b’agyaa nu
-
Adwumayɛfoɛ bɔ bedi nahorɛ ne, b’adwuma wuramɔ nya benu anwotɔsoɛ
-
Mmenia bɔ bedi nahorɛ ne, benya dumaa pá wɔ awaen mbanyi nemɔ nyunu
EBIEMƆ KÃ KYƐ: “Sɛ ɛpɛ ngondombo bɔ ɔte kãa a, ɔnzɛkye hwee.”
-
Nzu yeɛ ɔmaa edédi kyɛ Yehowa kyi ngondombo biala ɔ?
YEMUABƆLƐ
Yehowa pena kyɛ ye nnamvomɔ di nahorɛ wɔ bɛ dwudwolɛ ne bɛ nneyɛe mukoraati nu.
Ndimu
-
Nningyein beni anu yeɛ yɛkɔhora yɛkoli nahorɛ ɔ?
-
Nzuati yeɛ esusu kyɛ nworɛ nne nu kyɛ yɛkɔpɛ ngondombo ɔ?
-
Nzuati yeɛ ɛpena kyɛ edi nahorɛ mmerɛ biala ɔ?
NEA ƐHE KOSO
Sɛɛ yeɛ awofoɛ kɔhora kohyirehyire bɛ mmamɔ maa bɛkɔhã nahorɛ ɔ?
Sɛ yedi yɛ bɔhyɛ so a, mvasoɛ beni yeɛ ofi nu ba ɔ?
Nea nikyehorɛ tibɔ sɛ bɛnmva toɔ benni dwumaa yé po a, odikyɛ yɛtua ɔ.
“Toɔ—Odikyɛ Yetua Anaa?” (The Watchtower, September 1, 2011)
Nzu yeɛ ɔhyɛle bĩaa bie bɔ ne onni nahorɛ ngunaen, maa ɔsesãne ɔɔyɛle nahorɛlilɛfoɛ ɔ?
“Mmanwuni Kyɛ Yehowa Te Anwuvoinwunɛniɛ, Na Ɔfa Bɔne Kyɛ” (The Watchtower, May 1, 2015)
