ADESUA 37
Bɔ Bible Ne Kã Fa Adwuma Ne Esikaa Nwo Ɔ
Aso adwuma ne esikaa nwo adwenedwene ahyɛ wɔ so le anaa? Ɔnate kyɛ yɛhia sɔ nningyein nemɔ nati, ɔkɔhora kɔyɛ ɔhaw kɔmayɛ kyɛ yɛkɔfa sõen bɔ odimu yɛkɔma Yehowa ɔ. Yɛkɔhora yekonya afutue wɔ Bible nanu bɔ ɔkɔhora kɔboka yɛ ɔ.
1. Nzu yeɛ Bible ne kã fa adwuma nwo ɔ?
Nyameɛpiri pena kyɛ yɛnya anigye wɔ y’adwuma nwo. Bible ne kã kyɛ “nikyee pá biala ne berɛ ma sona kyɛ . . . ye nye kɔgye y’adwuma nwo.” (Ɔsɛngafoɛ 2:24) Yehowa mva y’adwuma nni angorɛ. Yeti sɛ yesuasua ye na yɛyɛ y’adwuma yé a, yɛsɔ yenye na ɔmaa yɛ bɔbɔ y’ahõne tɔ yɛ kunu.
Adwuma nwo hia paa. Nakoso ɔnzɛkyɛ yɛmaa yenwo hia yɛ tra sõen bɔ yɛkɔfa yɛkɔma Yehowa ne. (Yohane 6:27) Ɔhyɛ yɛ bɔ kyɛ sɛ yɛfa ye yedi moa wɔ y’asetena nu a, ɔkɔmaa yɛsa kɔhã yɛ anwoɔnaen nu ahiadeɛ.
2. Ɔkɔyɛ sɛɛ na y’akare pɛ wɔ esikaa nwo?
Mmerɛ bɔ Bible ne kã kyɛ “esikaa kora bɔ yɛnwo waen” ne, ɔsa bɔ yɛ kɔkɔ kyɛ, esikaa ngome ngohora ngɔma yɛnye ngɔgye. (Ɔsɛngafoɛ 7:12) Na mmom, ɔhyɛ yɛ ngunaen kyɛ ɔnzɛkyɛ yɛmaa yɛnye boro esikaa, mmom ne “yɛma yɛnye sɔ bɔ yele ye” ɔ. (Kenga Hebrifoɛ 13:5.) Sɛ yɛmaa yɛnye sɔ bɔ yele ye a, ɔmaa yedé yɛnwo yefi adwenedwene bɔ esikaa anyeborolɛ kora fa bato yɛ so nanwo. Yɛmva kerɛ bɔ yenwo nhia mando yɛnwo so. (Anyandera 22:7) Na ɔmaa yɛpo asane bɔ kyakyatolɛ fa ba, ɔne adwuma bɔ bɛhyɛ mmenia bɔ kyɛ bɛkɔmaa bekonya bɛnwo dɛ nanwo.
3. Yɛkɔyɛ sɛɛ na yafa esikaa yali dwumaa yé?
Yehowa kunu te pá, na sɛ yɛda “ayemye ali, na yɛkyɛ nikyee” a, na yesuasua ye. (1 Timoteo 6:18) Sɛ yɛfa yɛ sikaa yɛboka asafo ne, ɔne yeliemamɔ bɔ wahia bɛ a, na yɛfa yedi dwumaa yé. Nná esikaa dodoɔ bɔ yɛfa yɛma Yehowa ne yeɛ yenye gye yenwo ɔ, na mmom kyɛ yekofi y’ahõne nu yɛkɔfa yɛkɔma ye ne. Sɛ yefi y’ahõne nu yɛkyɛ nikyee a, yɛnye kɔgye na yɛkɔsɔ Yehowa nye.—Kenga Asomafoɛ Ne Nnwumaa 20:35.
SUA PẼE BOKASO
Nea mvasoɛ bɔ wɔ adwene pá bɔ yekonya ye wɔ adwuma nwo, ɔne kyɛbɔ yɛkɔmaa yɛnye kɔsɔ bɔ yele ye naso ɔ.
4. Fa kyɛbɔ esi yɛ adwuma ne hyɛ Yehowa animnyam
Odikyɛ yɛmaa yɛne Yehowa afĩa adamvoafalɛ ne kã adwene bɔ yele ye wɔ adwuma nwo ne. Bɔ VIDIO ne, na susu nzɛmmisa bɔ olili so he anwo.
-
Wɔ vidio nanu ne, nzu yeɛ wɔnye gyele yenwo wɔ Jason subaen, ɔne kyɛbɔ osi yɛ y’adwuma nanwo ɔ?
-
Nzu yeɛ ɔyɛle fa hyirɛle kyɛ ole adwene pá wɔ y’adwuma nwo ɔ?
Kenga Kolosefoɛ 3:23, 24, na susu nzɛmmisa he anwo:
-
Nzuati yeɛ subaen bɔ yɛda yali wɔ adwuma nwo ne hia ɔ?
Adwuma nwo hia paa. Nakoso ɔnzɛkyɛ yɛma atẽe maa yenwo hia yɛ tra sõen bɔ yɛkɔfa yɛkɔma Yehowa ne
5. Sɛ yɛmaa yɛnye sɔ bɔ yele ye a, yenya so mvasoɛ
Mmani pẽe bɔ mmɔden kyɛ bekonya bɛnwo tam. Nakoso bɔ Bible ne hyɛ yɛ ngunaen kyɛ yɛyɛ ne te sorongo koraa. Kenga 1 Timoteo 6:6-8, na susu nzɛmmisa he anwo:
-
Nzu yeɛ Bible ne hyɛ yɛ ngunaen kyɛ yɛyɛ ɔ?
Sɛ yelle esikaa pẽe po a, yɛnye kɔhora kɔgye. Bɔ VIDIO ne, na susu nzɛmmisa bɔ olili so he anwo.
-
Ɔmva yenwo kyɛ ne abusua he lle esikaa pẽe ne, nzu yeɛ ɔmaa bɛnye gyele ɔ?
Na sɛ yele esikaa na yɛpena pẽe yɛboka so koso ɛɛ? Yesu yɛle asane bɔ ɔwɔ ɛhe anu nwo mvandonwo. Kenga Luka 12:15-21, na susu nzɛmmisa he anwo:
-
Nzu yeɛ asua afi Yesu mvandonwo nanu ɔ? —Nea ngyekyɛmuɛ 15.
Kenga na fa toto Anyandera 10:22 ɔne 1 Timoteo 6:10 nwo. na susu nzɛmmisa hemɔ anwo:
-
Sɛ ɛnea ɛhe a, nzu yeɛ yenwo hia paa ɔ? Kyɛ yɛne Yehowa kɔfa adamvoa anaakyɛ yekonya esikaa pẽe? Nzuati ɔ?
-
Sɛ ɛma wɔnye boro esikaa pẽe a, ɔhaw beni yeɛ ofi nu ba ɔ?
6. Yehowa kɔma yɛsa kɔhã bɔ yehia ɔ
Adwuma ne esikaa nwo haw kɔhora kɔsɔ gyidie bɔ yele ye wɔ Yehowa nu ne kɔnea. Bɔ VIDIO ne na nea kyɛbɔ yɛkɔhora yekogyina sɔ nzɔhwɛ ne noa ɔ, na susu nzɛmmisa bɔ olili so he anwo.
-
Wɔ vidio nanu ne, ɔhaw beni yeɛ aliemaa ne yiale ɔ?
-
Nzu yeɛ ɔyɛle fa gyinane ɔhaw ne noa ɔ?
Kenga Mateo 6:25-34, na susu nzɛmmisa he anwo:
-
Nzu yeɛ Yehowa ahyɛ bɔ kyɛ ɔkɔyɛ kɔma bɛbɔ bɛfa ye bedimoa ne ɔ?
EBIEMƆ KÃ KYƐ: “Odikyɛ meyɛ adwuma serɛ na mahora manea m’abusua. Mengɔhora mengɔhɔ asafo nhyiamu dapɛen biala.”
-
Twerɔnzɛm beni yeɛ ɔhyɛ wɔ ngunaen kyɛ, Yehowa sõen bɔ ɛkɔfa kolimoa ne yeɛ ɔte pá paa ɔ?
YEMUABƆLƐ
Adwuma ne esikaa nwo hia, nakoso ɔnzɛkyɛ osi sõen bɔ yɛfa yɛma Yehowa ne atẽe.
Ndimu
-
Nzu yeɛ ɔkɔhora kɔboka wɔ maa ɛkɔkari pɛ wɔ adwuma nwo ɔ?
-
Sɛ ɛma wɔnye sɔ bɔ ele ye a, mvasoɛ beni yeɛ ekonya ɔ?
-
Ɛkɔyɛ sɛɛ na ahyire kyɛ ele Yehowa bɔhyɛ bɔ yeɛ ole kyɛ, ɔkɔma ye mmenia sa kɔhã bɔ behia nanu anwotɔsoɛ?
NEA ƐHE KOSO
Nea kyɛ sɛ Bible ne kã kyɛ esikaa te bɔne a.
“Aso Esikaa Te Bɔne Mukoraati Ndin?” (Edwirɛ bɔ ɔwɔ intanɛt so)
Nea kyɛbɔ sɛ ɛkyɛ nikyee a, ɔsɔ Nyameɛpiri nye ɔ.
“Nzu Yeɛ Bible Ne Kã Fa Nikyee Hyɛlɛ Nwo Ɔ?” (Edwirɛ bɔ ɔwɔ intanɛt so)
Aso mvomsoɛ biala nne kyakyatolɛ nwo anaa?
Nea bɔ ɔhyɛle ebie bɔ né ɔto kyakya ɔne ebie bɔ ne owia ngunaen maa bɛsesãne bɛ subaen ɔ.
“Né M’ahõne Wɔ Pɔngɔ Akansie Nu Paa” (The Watchtower, November 1, 2011)
