ADESUA 38
Kyire Obuo Ma Akyɛdeɛ Bɔ Yeɛ Ole Ngõa Ne
Sɛ ele ngõa a, na ele nikyee biala. Sɛ yeyia ɔhaw po a, ɔtɔ kyẽa a yɛnye kɔhora kɔgye. Yɛkɔyɛ sɛɛ na yahyire kyɛ yebu akyɛdeɛ bɔ yeɛ ole ngõa ne? Na nzuati yeɛ yenwo hia paa kyɛ yɛyɛ sɔ ɔ?
1. Nzuati yeɛ odikyɛ yekyire obuo yɛma ngõa ɔ?
Odikyɛ yɛkyire obuo yɛma ngõa, ofikyɛ ɔte akyɛdeɛ bɔ yɛ Baba, Yehowa bɔ ole ɔdɔ ne afa ama yɛ ɔ. Ye yeɛ “ngõa fi ye berɛ ɔ”—na ye yeɛ ɔbɔle ngõa mukoraati ɔ. (Edwein 36:9) “Ye yeɛ ɔma mmenia mukoraati ngõa, nwomeɛ ɔne nikyee biala ɔ.” (Asomafoɛ Ne Nnwumaa 17:25, 28) Yehowa ma yɛ bɔ yehia na wamaa yahora yatena ngõa nu. Nakoso bɔ ɔtra yemukoraati ne, ɔbɔ yɛ ngõa nwo waen kyɛbɔ ɔkɔyɛ a, yɛnye kɔhora kɔgye ɔ.—Kenga Asomafoɛ Ne Nnwumaa 14:17.
2. Yɛkɔyɛ sɛɛ na yamaa Yehowa anwu kyɛ yebu akyɛdeɛ bɔ yeɛ ole ngõa ne?
Ofi mmerɛ bɔ ne ewura koɛ nu mukoraati ne, né Yehowa dwene wɔnwo. Honhom hãne Nyameɛpiri somvoɛ kõ bɔ bɛfrɛ ye David, maa ɔhãhyirɛle Nyameɛpiri kyɛ: “Wɔnye nwuni me mmerɛ bɔ ne nde mogyatɔ ne.” (Edwein 139:16) Wɔ ngõa sombo ma Yehowa paa. (Kenga Mateo 10:29-31.) Sɛ ebie hyɛ da kũ yenwo anaa okũ ye biengo a, ɔyɛ ye ya paa. a (Ɛzadɔs 20:13) Sɛ yɛfa yɛ ngõa yɛto asane nu, anaakyɛ yaamɔ afoforɛ ngoã nwo waen a, ɛhene koso yɛ Yehowa yá. Sɛ yɛbɔ yɛ ngõa nwo waen na yekyire obuo yɛma afoforɛ ngõa a, yɛda ye ali kyɛ yɛnye sɔ akyɛdeɛ nwanwasoɛ bɔ yeɛ ole ngõa ne.
SUA PẼE BOKASO
Nea Atẽe ahoroɛ bɔ ɛkɔhora kɔfaso kohyire kyɛ wɔnye sɔ akyɛdeɛ bɔ yeɛ ole ngõa ne.
3. Nea wɔ akwanwosaen yé
Kristofoɛ bɔ bayira bɛnwo so fa bɛ ngõa sõ Yehowa mmerɛ biala. Ɔte kyɛbɔ bɛfa bɛ nipadua bɛbɔ afɔleɛ bɛma Nyameɛpiri ne. Kenga Romanfoɛ 12:1, 2, na susu nzɛmmisa hemɔ anwo:
-
Nzu yeɛ odikyɛ ɔhyɛ wɔ ngunaen maa ɛdwene w’akwanwosaen nwo ɔ?
-
Atẽe beni yeɛ ɛkɔhora kɔfa so kɔyɛ sɔ ɔ?
4. Nea yé wɔ nningyein bɔ ɔkɔhora kɔmaa ebie kopira anaa okowu nanwo
Bible ne hyɛ yɛ ngunaen kyɛ yɛhwẽ yɛnwo yefi nningyein bɔ ɔkɔmaa yekopira nanwo. Bɔ VIDIO ne na nea nningyein biemɔ bɔ ɛkɔhora kɔyɛ kɔfa kɔbɔ wɔnwo waen ɔ.
Kenga Anyandera 22:3, na susu kyɛbɔ ɛkɔbɔ ɛne afoforɛ ngõa nwo waen . . .
-
wɔ w’awuro nu.
-
wɔ w’adwuma nu.
-
mmerɛ bɔ edi angorɛ.
-
mmerɛ bɔ ɛte kaa nu anaa ɛkã kaa ɔ.
5. Adɔma bɔ bɛwolle ye ne, kyire obuo ma ye ngõa
David hyirɛle kyɛbɔ Yehowa bu ngõa ɔne kyɛbɔ adɔma bɔ bɛwolle si nyi wɔ ye maame kunu ɔ. Kenga Edwein 139:13-17, na susu nzɛmmisa he anwo:
-
Wɔ Yehowa nye so ne, mmerɛ beni yeɛ sona ngõa hyɛ yebo ɔ, mmerɛ bɔ owura koɛ nu anaa mmerɛ bɔ bawo ye ɔ?
Yehowa mmraa bɔ ɔfa mane tete Israel ne bɔle ngwalaa bɔ bɛwolle bɛ ɔne bɛ maame mɔ nwo waen. Kenga Ɛzadɔs 21:22, 23, na susu nzɛmmisa hemɔ anwo:
-
Sɛɛ yeɛ ne Yehowa bu ebie bɔ waanhyɛ da kyɛ okũ akwalaa bɔ bɛwolle ye ɔ?
-
Na sɛ ebie hyɛ da yɛ sɔ a, sɛɛ yeɛ ɔkɔte ngã ɔ? b
-
Kyɛbɔ Nyameɛpiri si nwui ne, sɛɛ yeɛ ɔmaa ɛte ngã ɔ?
Ebia brasua bɔ obu ngõa po kɔhora kɔte ngã kyɛ, nwonzɛen bɔ ɔkɔye kogua ne yeɛ ɔkɔbɔ yenwo waen ɔ. Kenga Aizaya 41:10, na susu nzɛmmisa he anwo:
-
Sɛ bɛhyɛ brasua bie kyɛ ɔye nwonzɛen gua a, nwa yeɛ odikyɛ ɔmaa ɔboka ye ɔ? Nzuati ɔ?
EBIEMƆ KÃ KYƐ: “Brasua le yenwo atẽe kyɛ ɔye nwonzɛen gua—ɔte ye bɔbɔ ye nipadua.”
-
Nzu yeɛ ɔmaa edédi kyɛ, Yehowa bu adɔma bɔ bɛwolle ye, ɔne ye maame ngõa ɔ?
YEMUABƆLƐ
Bible ne kyirekyire yɛ kyɛ yɛlɔ, ye hyire obuo, na yɛbɔ Yehowa akyɛdeɛ bɔ yeɛ ole ngõa nanwo waen. Odikyɛ yɛbɔ yɛ bɔbɔ yɛ ngõa ne afoforɛ koso deɛ nwo waen.
Ndimu
-
Nzuati yeɛ sona ngõa nwo hia Yehowa ɔ?
-
Sɛ ebie hyɛ da kũ sona a, sɛɛ yeɛ Yehowa tengã ɔ?
-
Akyɛdeɛ bɔ yeɛ ole ngõa ne, nzu yeɛ ɔmaa wɔnye gye yenwo ɔ?
NEA ƐHE KOSO
Sɛɛ yeɛ yɛkɔhora yɛkɔla Yehowa ase wɔ akyɛdeɛ bɔ yeɛ ole ngõa nanwo ɔ?
Pena nzɛmmisa he anwo mmuaeɛ: Aso Nyameɛpiri kɔfa brasua bɔ waye nwonzɛen agua ne bɔne kɔhyɛ ye anaa?
“Nzu Yeɛ Bible Ne Kã Fa Nwonzɛen Bɔ Beye Begua Nwo Ɔ?” (Edwirɛ bɔ ɔwɔ intanɛt so)
Sua kyɛbɔ odikyɛ yɛmaa adwene bɔ Nyameɛpiri le ye wɔ ngõa nwo ne kã nningyein bɔ yɛfa yɛ gyegye yɛnye ɔ.
“‘Angorɛlilɛ Bɔ Ɔyɛ Suro’—Aso Odikyɛ Ɛfa Wɔnwo Wura Nu?” (Awake!, October 8, 2000)
Na sɛ ebie nya adwene kyɛ ohũ yenwo ɛɛ? Nea kyɛbɔ Bible ne kɔhora kɔboka ye ɔ.
a Yehowa dwene bɛbɔ b’ahõne abubu nanwo paa. (Edwein 34:18) Sɛ aworaborɛ hyɛ yɛso maa ɔyɛ yɛ kyɛ yehũ yɛnwo a, ɔte yɛ bo, na ɔpena kyɛ ɔboka yɛ. Sɛ ɛpena kyɛ enwu kyɛbɔ ɔkora boka ebie bɔ ɔpena kyɛ okũ yenwo a, kenga edwirɛ bɔ yenwa “Me Pena Kyɛ Mekũ Menwo—Aso Bible Ne Kɔhora Kɔboka Me Mmerɛ Bɔ Manya Sɔ Adwene Ne?” ekonwu ye wɔ Nea Ɛhe Koso bue berɛ bɔ ɔwɔ adesua he anu ne.
b Bɛbɔ baye nwonzɛen bagua ne, ɔnzɛkyɛ bɛmaa adwenedwene hyɛ bɛso —Yehowa kɔhora kɔfa kɔhyɛ bɛ. Sɛ ɛpena ngyerɛkyiremuɛ pẽe a, nea nwomaa bɔ yenwa “Nzu Yeɛ Bible Ne Kã Fa Nwonzɛen Bɔ Bɛye Begua Nwo Ɔ?” bɔ ɔwɔ Nea Ɛhe Koso bue berɛ wɔ nwomaa he anu ne.
