ADESUA 39
Adwene Bɔ Nyameɛpiri Le Ye Wɔ Mogya Nwo Ɔ
Mogya te nikyee bɔ yenwo hia ɔ. Ɔnne nu a, yenu biala ngɔhora ngɔtena ngõa nu. Kyɛ Ɔbɔadeɛ ne, Nyameɛpiri yeɛ ɔkɔhora kohyire yɛ kyɛbɔ yɛkɔfa mogya yekoli dwumaa ɔ. Nzu yeɛ wahã wafa mogya nwo ɔ? Aso yɛkɔhora yekoli, anaa yɛkɔhwẽ yɛkɔma ebie? Na ɛkɔyɛ sɛɛ na asi gyinaeɛ pá wɔ ɛhe anwo?
1. Adwene beni yeɛ Yehowa le ye wɔ mogya nwo ɔ?
Yehowa hãhyirele ye asomvoɛ bɔ bɛtenane ase tete ne kyɛ: “Anwoɔnaen biala ngõa yeɛ ole ye mogya.” (Levitikɔs 17:14) Wɔ Yehowa nye so ne, mogya gyi berɛ ma ngõa. Ɔnate kyɛ ngõa te krongron, na ɔte akyɛdeɛ bɔ ofi Nyameɛpiri berɛ nati, mogya koso te krongron.
2. Atẽe bɔ bɛfa so bɛfa mogya bedi dwumaa beni yeɛ Nyameɛpiri nguro ɔ?
Yehowa hãhyire y’Asomvoɛ bɔ bɛtenane ase tete ne kyɛ, nnɛmaa bedi mogya. (Kenga Gyenɛsis 9:4 ɔne Levitikɔs 17:10.) Osili sɔ mmraa he aso dua, mmerɛ bɔ akwangyerɛ kue ne hahyirele Kristofoɛ kyɛ “bɛhwẽ bɛnwo befi . . . mogya nwo ne.”—Kenga Asomafoɛ Ne Nnwumaa 15:28, 29.
Sɛ bɛkã kyɛ yɛhwẽ yɛnwo yefi mogya nwo a, okyire sɛɛ? Sɛ dɔkta kã kyire wɔ kyɛ ɛhwẽ wɔnwo fi nzãa nwo a, ɛngɔno. Nakoso ekoli aleɛ bɔ nzãa wɔ nu, anaakyɛ ɛkɔmaa bɛkɔfa kɔfa wɔ ndiĩn nu bɛkɔma wɔ anaa? Ɛngɔyɛ sɔ lle. Sɔ ala yeɛ Nyameɛpiri mmraa bɔ ɔfa mogya nwo ne koso kyire kyɛ, ɔnzɛkyɛ yedi mogya anaa yedi kaka bɔ bahũi bɔ baanhwie ye mogya baangua ɔ. Sɔ ala koso yeɛ ɔnzɛkyɛ yedi aleɛ biala bɔ mogya boka so ɔ.
Na anwonyerɛsalɛ bɔ bɛfa mogya bedi dwumaa wɔ nu ne koso ɛɛ? Anwonyerɛsalɛ bie wɔ berɛ a, ɔto Nyameɛpiri mmraa. Ebie yeɛ ole, mogya ne bɔbɔ, anaa enu nningyein titire bɔ ɔkã bonu yɛ mogya bɔ yeɛ ole—mogya nu ngõa ngaka kɔkorɛ, mogya nu ngõa ngaka fufue, mogya nu ngõa ngaka ndrandra, ɔne mogya nu nzue. Anwonyerɛsalɛ bie wɔ berɛ a, Nyameɛpiri mmraa hyɛlle da hãnne yenwo dwirɛ pɔtee. Kyɛ nneasoɛ ne, enu bie yeɛ ole mogya nu ngõa ngaka nu nningyein mmaammaa bɔ bɛkɔfa koli dwumaa wɔ anwonyerɛsalɛ nu ɔ. Bɔ ɔboka so biekũ yeɛ ole ebie bɔbɔ mogya bɔ bɛkɔfa bekoli dwumaa wɔ anwonyerɛsalɛ nu ɔ. Sɛ yesusu sɔ tebea hemɔ anwo a, odikyɛ yɛnu biala si ye gyinaeɛ. a—Galatiafoɛ 6:5.
SUA PẼE BOKASO
Nea kyɛbɔ ekosi mogya bɔ bɛfa bedi dwumaa wɔ anwonyerɛsalɛ nu nwo gyinaeɛ ɔ.
3. Si anwonyerɛsalɛ nwo gyinaeɛ bɔ ɔsɔ Yehowa nye
Ɛkɔyɛ sɛɛ na ahora asi anwonyerɛsalɛ nwo gyinaeɛ bɔ ɔne Nyameɛpiri adwene wɔ mogya nwo ne yia ɔ? Bɔ VIDIO ne, na nea nikyehorɛ tibɔ yenwo hia kyɛ etu agyirɛ bɔ oliliso hemɔ ɔ.
-
Bɔ mbaeɛ pena nworɛ.—Yakobo 1:5.
-
Yɛ nhwehwɛmuɛ pena Bible nu nnyinasoɛdwirɛ ɔne kyɛbɔ ɛkɔfa kɔyɛ adwuma ɔ.—Anyandera 13:16.
-
Tie adwenekyerɛ ahoroɛ bɔ ɔwɔ nekaa bɔ ɛte ne.
-
Pena enu pɔtee bɔ ɔne wɔ gyidie nyia ɔ.
-
Nea nwui kyɛ gyinaeɛ bɔ ekosi ne ngɔma wɔ tiboa ngɔbua wɔ fɔ —Asomafoɛ Ne Nnwumaa 24:16. b
-
Nwui kyɛ—sɛ ɔba gyinaeɛ bɔ ɔfa wɔ tiboa nwo a, asafo nu mbanyi, wɔ Bible kyerɛkyerɛniɛ, ɛye anaa ehũ po—ngɔhora ngosi gyinaeɛ ngɔma wɔ.—Romanfoɛ 14:12.
-
Twerɛ gyinaeɛ bɔ asi ne to berɛ
4. Yehowa Adanzefoɛ pena anwonyerɛsalɛ bɔ ɔte pá ɔ
Ɔkɔhora kɔyɛ yé kyɛ ɛkɔfa Nyameɛpiri mmraa bɔ ɔfa mogya nwo ne kɔyɛ adwuma, na mmerɛ komaapɛ nala anya anwonyerɛsalɛ bɔ ɔte pá bɔ bɛmva mogya benni dwumaa wɔ nu ɔ? Bɔ VIDIO ne.
Kenga Tito 3:2, na susu nzɛmmisa he anwo:
-
Mmerɛ biala bɔ yɛne dɔktafoɛ kodwudwo ne, nzuati yeɛ odikyɛ yɛda obuo ne anwoberɛaseɛ ali yekyire bɛ ɔ?
|
Bɔ ɔnzɛkyɛ Kristoniɛ dé ɔ |
Bɔ odikyɛ Kristoniɛ si yenwo gyinaeɛ ɔ |
|---|---|
|
A. Mogya nu ngõa ngaka ndrandra. |
Mogya nu ngõa ngaka ndrandra nu nningyein mmaammaa |
|
B. Mogya nu ngõa ngaka fufue. |
Mogya nu ngõa ngaka fufue nu nningyein mmaammaa |
|
D. Mogya nu nzue. |
Mogya nu nzue nu nningyein mmaammaa |
|
E. Mogya nu ngõa ngaka kɔkorɛ. |
Mogya nu ngõa ngaka kɔkorɛ nu nningyein mmaammaa |
5. Mmerɛ bɔ mogya nu nningyein mmaammaa nwo dwirɛ adwɔso ɔ
Nningyein titire nna yeɛ ɔkã bonu yɛ mogya ɔ—mogya nu ngõa ngaka kɔkorɛ, mogya nu ngõa ngaka fufue, mogya nu ngõa ngaka ndrandra, ɔne mogya nu nzue. Sɔ nikyee he anu ahyehyɛ pẽe, na bɛfrɛ ye mogya nu nningyein mmaammaa. c Bɛfa sɔ nningyein mmaammaa hemɔ nu bie bɛyɛ ayire bɔ bɛfa bɛkõ betia anwonyerɛ ahoroɛ, anaakyɛ bɔ mogya tu ebie a, ɔkora maa ɔpɛ ɔ.
Sɛ ɔba mogya nu nningyein mmaammaa a, odikyɛ Kristoniɛ biala fa ye tiboa bɔ wafa Bible watete ye ne si gyinaeɛ. Ebia ebiemɔ kosi gyinaeɛ kyɛ bengolle anwonyerɛsalɛ bɔ bɛfa mogya nu nningyein mmaammaa bedi dwumaa wɔ nu ne bɛngɔtonu. Ebia ebiemɔ koso kɔte ngã kyɛ, be tiboa ma b’atẽe kyɛ bele mogya nu nningyein mmaammaa.
Sɛ esi ɛhe anwo gyinaeɛ a, susu sɔ nzɛmmisa he anwo:
-
Sɛɛ yeɛ ngɔhyirehyire nikyehorɛ tibɔ ngɔlé, anaa me ngɔllé mogya nu nningyein mmaammaa nu ngohyire me dɔkta ɔ?
EBIA EBIE KOBISA KYƐ: “Mvomsoɛ beni yeɛ ɔwɔ nu kyɛ ngole mogya ɔ?”
-
Esusu yenwo sɛ́?
YEMUABƆLƐ
Yehowa pena kyɛ yɛpo mogya bɔ bɛmva benni dwumaa wɔ atẽe pá so ɔ.
Ndimu
-
Nzuati yeɛ Yehowa bu mogya kyɛ ɔte krongron ɔ?
-
Nzu yeɛ ɔmaa yenwu kyɛ Nyameɛpiri mmraa bɔ ɔkã kyɛ, yɛhwẽ yɛnwo yefi mogya nwo ne fa mogya bɔ bɛtwẽ bɛma koso nwo ɔ?
-
Ɛkɔyɛ sɛɛ na ahora asi mogya bɔ bɛfa bedi dwumaa wɔ anwoyerɛsalɛ nu nanwo gyinaeɛ bɔ ɔte pá ɔ?
NEA ƐHE KOSO
Kora bɔ ekosi gyinaeɛ kyɛ bɛfa wɔ bɔbɔ mogya beli dwumaa wɔ anwonyerɛsalɛ nu ne, nzu yeɛ odikyɛ esusu yenwo ɔ?
“Nzɛmmisa Bɔ Ofi Kengalɛfoɛ Berɛ” (The Watchtower, October 15, 2000)
Kora bɔ ekosi gyinaeɛ kyɛ ekole mogya nu nningyein mmaammaa ne, nzu yeɛ odikyɛ edimoa susu yenwo ɔ?
“Nzɛmmisa Bɔ Ofi Kengalɛfoɛ Berɛ” (The Watchtower, June 15, 2004)
Nzu yeɛ ɔmaa dɔktaniɛ bie lɛle Nyameɛpiri adwene wɔ mogya nwo ne tole nu ɔ?
“Nnɛle Nyameɛpiri Adwene Wɔ Mogya Nwo Ne Ndole Nu” (Awake!, December 8, 2003)
Nea kyɛbɔ aliemaamɔ bɔ bɛyɛ adwuma kyɛ Dɔktafoɛ Ne Ayarefoɛ Afĩa Ngitanwodié Boayikue ne si boka beliemamɔ ɔ.
b Nea porɛ 5, “Mmerɛ Bɔ Mogya Nu Nningyein Mmaammaa Nwo Dwirɛ Adwɔso Ɔ,” ɔne Ayieleɛ Dwirɛ 3, “Anwonyerɛsalɛ Bɔ Bɛfa Mogya Bedi Dwumaa Wɔ Nu.”
c Dɔktafoɔ biemɔ frɛ nningyein titire nna bɔ ɔkã bonu yɛ mogya ne kyɛ nningyein mmaammaa. Yeti, odikyɛ ekyirekyire gyinaeɛ bɔ asi kyɛ engolle mogya anaa mogya nu ngõa ngaka kɔkorɛ, mogya nu ngõa ngaka fufue, mogya nu ngõa ngaka ndrandra, anaa mogya nu nzue nanu kyire wɔ dɔkta.
