Wɔ ewiase mukoraati ne, ɔsono ebiala ne y’adwene wɔ nzãa nwo. Ɔtɔ mmerɛ bie a, ebiemɔ ne bɛ nnamvomɔ bonu nõ nzãa, na bɛnye gye. Afoforɛ koso de, bɛnnõ nzãa koraa. Nakoso ebiemɔ kora nõ nzãa alaa maa bɛbo po. Sɛɛ yeɛ Bible ne bu nzãa ɔ?

1. Aso ɔte bɔne kyɛ ebie kɔnõ nzãa anaa?

Bible ne ndwudwo ndia nzãa nõnɛ. Mmom ne, sɛ Bible ne kã akyɛdeɛ ahoroɛ bɔ Nyameɛpiri afa ama yɛ nanwo dwirɛ a, ɔfa “nzãa bɔ ɔmaa sona nye gye wɔ y’ahõne nu” ne koso bokaso. (Edwein 104:14, 15) Mmienzua ne mmrasua nahorɛfoɛ bɔ Bible ne kã bɛnwo dwirɛ nanu biemɔ nõne nzãa.​—1 Timoteo 5:​23.

2. Afutue beni yeɛ Bible ne fama bɛbɔ bɛnõ nzãa ne ɔ?

Yehowa nye ngye yenwo kyɛ yɛkɔnõ nzãa yɛkɔboso anaa yɛkɔbo. (Galatiafoɛ 5:​21) Ye Dwirɛ ne kã kyɛ: “Nnɛkɔboka bɛbɔ bɛnõ nzãa fuu so.” (Anyandera 23:20) Sɛ yɛyɛ y’adwene kyɛ yekowura nekaabie yɛkɔnõ nzãa​—bɔ ebiala ngonwu yɛ po a​—ɔnzɛkyɛ yɛnõ maa ɔboso bɔ yɛngɔhora yɛngɔdwene yé, yɛngɔhora yɛngɔhyɛ yɛnwo so wɔ yɛ dwudwolɛ, ɔne kyɛbɔ yɛyɛ yɛ nikyee nu, anaa kyɛ ɔkɔhora kɔha yɛ akwanwosaen ɔ. Sɛ yɛngɔhora ngɔhyɛ yɛnwo so wɔ nzãa nõnɛ nwo a, yede ɔnzɛkyɛ yɛnõ ye koraa.

3. Yɛkɔyɛ sɛɛ na yahyire obuo yama gyinaeɛ bɔ afoforɛ si wɔ nzãa nwo ne?

Odikyɛ angoragora biala si ye gyinaeɛ fa nzãa nõnɛ nwo. Sɛ ebie nõ nzãa wɔ atẽe pá so a, ɔnzɛkyɛ yebu ye atɛn, na sɛ ebie koso si gyinaeɛ kyɛ ɔngɔnõ nzãa koraa a, ɔnzɛkyɛ yɛhyɛ ye maa ɔnõ. (Romanfoɛ 14:10) Sɛ yenwu kyɛ nzãa bɔ yɛkɔnõ ne kɔto afoforɛ hindidua a, yede ɔnzɛkyɛ yɛnõ ye koraa. (Kenga Romanfoɛ 14:21.) Ɔnzɛkyɛ “yɛdwene [yɛngome] yɛdeɛ nwo, na mmom odikyɛ yɛmaa yɛ biengo koso deɛ nwo hia yɛ.”​—Kenga 1 Korintofoɛ 10:23, 24.

 SUA PẼE BOKASO

4. Nea kyɛ aso ɛkɔhora kɔnõ nzãa a

Sɛɛ yeɛ né Yesu bu nzãa nõnɛ ɔ? Sɛ ekonya yenwo mmuaeɛ a, nea nzɛngyerɛneɛ bɔ olimoa yɛle ne. Kenga Yohane 2:​1-​11, na susu nzɛmmisa hemɔ anwo:

• Sɛ yɛnea nzɛngyerɛneɛ he a, nzu yeɛ yɛkora yekosua yekofi Yesu berɛ, wɔ kyɛbɔ ne obu nzãa ɔne bɛbɔ bɛnõ ne ɔ?

• Ɔnate kyɛ Yesu andwudwo andia nzãa nõnɛ nati, sɛɛ yeɛ odikyɛ Kristofoɛ bu ebie bɔ ɔnõ nzãa ɔ?

Afei, ɔmva yenwo kyɛ Kristoniɛ kɔhora kɔnõ nzãa ne, ɛhene ngyere kyɛ odikyɛ ɔnõ ye daa. Kenga Anyandera 22:3, na susu ɛhemɔ nwo nea kyɛ sɛ ɛnõ nzãa a, nzu yeɛ ɔkofi nu kɔwa ɔ:

• Mmerɛ bɔ ɛkã kaa, anaa ɛfa ngaen bie di dwumaa ne.

• Mmerɛ bɔ ɛwonzɛ ɔ.

• Mmerɛ bɔ dɔkta ahã hyirɛ wɔ kyɛ, nnɛmaa ɛnõ nzã ne.

• Mmerɛ bɔ ɛngora nhyɛ wɔnwo so wɔ nzãa pembe bɔ ɛkɔnõ nwo ne.

• Mmerɛ bɔ mmraa mma w’atẽe kyɛ ɛkɔnõ nzãa ne.

• Mmerɛ bɔ ɛne ebie bɔ né ɔyɛse ma ye kyɛ ɔkɔyakyi nzãa nõnɛ wɔ berɛ ɔ.

Aso odikyɛ ɛfa nzãa di dwumaa wɔ w’ayeforɔ bo anaa mmerɛ bɔ ɛne afoforɛ ayia nu bɛgye bɛnye ne anaa? Sɛ ɛpena kyɛ enwu bɔ ɔkɔhora kɔboka wɔ maa ekosisi gyinaeɛ a, bɔ VIDIO ne.

Kenga Romanfoɛ 13:13 ɔne 1 Korintofoɛ 10:31, 32. Sɛ ɛkenga tworɔnzɛm nanu biala yia a, susu nzɛmmisa he anwo:

• Sɛ ɛfa sɔ nnyinasoɛdwirɛ he yɛ adwuma a, sɛɛ yeɛ ɔkɔboka wɔ maa ekosi gyinaeɛ bɔ ɔkɔsɔ Yehowa nye ɔ?

 5. Nwu nzãa pembe bɔ odikyɛ ɛnõ ɔ

Sɛ esi gyinaeɛ kyɛ ɛkɔnõ nzãa a, ma ɛhe tena w’adwene nu: Ɔwɔ nu kyɛ Yehowa ndwudwo ndia nzãa nõnɛ de, nakoso odwudwo tia kyɛ yɛkɔnõ maa ɔkɔboso. Nzuati ɔ? Kenga Hosea 4:​11, 18, na susu nzɛmmisa he anwo:

• Sɛ ebie nõ nzãa maa ɔbo so a, nzu yeɛ okosi ɔ?

Yɛkɔyɛ sɛɛ na yannõ nzãa maa waammo so? Odikyɛ yɛkare pɛ na yenwu nzãa pembe bɔ odikyɛ yɛnõ ɔ. Kenga Anyandera 11:2, na susu nzɛmmisa he anwo:

• Nzuati yeɛ nyanza wɔ nu kyɛ, ekonwu nzãa pembe bɔ odikyɛ ɛnõ ɔ?

6. Di nzãa bolɛ so

 YEMUABƆLƐ

Yehowa fale nzãa mane yɛ kyɛbɔ ɔkɔyɛ a, yɛnye kɔgye ɔ, nakoso ɔmbena kyɛ yɛnõ ye fuu na yɛbo.

Ndimu

• Nzu yeɛ Bible ne kã fa nzãa nwo ɔ?

• Asane beni yeɛ ɔwɔ nzãa bɔ yɛkɔnõ ye fuu nanu ɔ?

• Yɛkɔyɛ sɛɛ ne yahyire obuo yama gyinaeɛ bɔ afoforɛ si wɔ nzãa nõnɛ nwo ne?