ADESUA 44
Aso Afahyɛ Mukoraati Sɔ Nyameɛpiri Nye?
Yehowa pena kyɛ yɛnye gye wɔ asetena nu, na ɔtɔ mmerɛ bie a, yɛkɔhora yekoli afahyɛ biemɔ. Nakoso afahyɛ mukoraati yeɛ ɔsɔ ye nye anaa? Yɛkɔyɛ sɛɛ ne yahyire kyɛ yɛdɔ Yehowa wɔ tebea bɔ ɔte sɔ nu?
1. Nzuati yeɛ afahyɛ pẽe nala nzɔ Yehowa nye ɔ?
Sɛ ɛba nwu kyɛ afahyɛ pẽe nala oggyĩ tworɔnzɛm naso na mmom ofi abosonsom nu a, ɔkɔyɛ wɔ nwanwa. Sɔ afahyɛ nanu biemɔ gyĩ ngondombo ngyerɛkyerɛ so. Ogyĩ ahonhomnzɛm ɔne adwene bɔ mmenia le ye kyɛ yele ɔkra bie wɔ yenu bɔ onwu llé naso. Afahyɛ nanu bie fi ahonhomnzɛmlilɛ ɔne gyidiehunu bɔ yeɛ ole ngrabea nu. (Aizaya 65:11) Yehowa bɔ y’asomvoɛ kɔkɔ kyɛ: “Ɛmɔhwẽ ɛmɔ nwo . . . na nnɛmaa ɛmɔfa ɛmɔsa bɛkã nikyebiala bɔ yenwo nde ɔ.”—2 Korintofoɛ 6:17. a
2. Afahyɛ bɔ ɔfa animnyam bɔ ɔmvata ma sona ne, sɛɛ yeɛ Yehowa te ngã wɔ yenwo ɔ?
Yehowa bɔ yɛ kɔkɔ kyɛ, asane wɔ nu kyɛ yɛkɔfa yɛnwo yɛkɔto “sona dasaniɛ so.” (Kenga Yeremia 17:5.) Afofikyẽa ne bie wɔ berɛ a, bɛfa bɛhyɛ atumvoɛ anaa sogyafoɛ animnyam. Ebiemɔ hyɛ fã bɛma bɛ maen ahyɛnzodeɛ ɔne kyẽa bɔ benyane fanwodie ɔ. (1 Yohane 5:21) Ebiemɔ koso hyɛ fã ma amanyɔkue ɔne ahyehyɛdeɛ ahoroɛ. Sɛ Yehowa nwu kyɛ yɛfa animnyam bɔ ɔmvata yɛma sona, anaa ahyehyɛdeɛ bɔ bɛ nhyehyɛeɛ ne Y’atirimbɔ nyia ne a, sɛɛ yeɛ ɔkɔte ngã ɔ?
3. Subaen beni yeɛ ɔkɔmaa afahyɛ bie kɔyɛ bɔ ɔttemayé ɔ?
Bible ne dwudwo tia “nzãa bɔ bɛnõ maa ɔbo so, anigye ndrasoɛ, [ɔne] akɔnwezafoɛ fekue.” (1 Petro 4:3) Afahyɛ ne bie wɔ berɛ a, bɛbɔ bɛfa bɛnwo bewura nu ne bu bra bɔne. Sɛ yɛkɔhora yɛkɔhɔso kɔyɛ Yehowa adamvo a, odikyɛ yɛtwẽ yɛnwo koraa yefi bra tɛɛ bɔ ɔte sɔ nwo.
SUA PẼE BOKASO
Nea bɔ yɛkɔyɛ na yahora yasɔ Yehowa nye, mmerɛ bɔ yesi afofikyẽa, ɔne afahyɛ ahoroɛ nwo gyinaeɛ ne.
4. Po afahyɛ ahoroɛ bɔ ɔnhyɛ Yehowa animnyam ne
Kenga Ɛfesofoɛ 5:10, na susu nzɛmmisa hemɔ nwo:
-
Nikyee pɔtee beni yeɛ odikyɛ yesusu yenwo, mmerɛ bɔ yesi gyinaeɛ kyɛ yekoli afofikyẽa bie ne?
-
Afofikyẽa beni yeɛ bedi ye paa wɔ nekaa bɔ ɛte ne ɔ?
-
Ɛnea a, sɔ afofikyea ahoroɛ ne sɔ Yehowa nye anaa?
Kyɛ nneasoɛ ne, asusu kyɛbɔ Nyameɛpiri te ngã wɔ awodalilɛ nwo lé? Bible ne anga ye wɔ nekaabiala kyɛ Yehowa asomvoɛ lili b’awoda, nakoso ɔkã mmenia nyɔ bie bɔ ne bɛnzo Yehowa bɔ belili b’awoda nwo dwirɛ. Kenga Gyenɛsis 40:20-22 ɔne Mateo 14:6-10. Na susu nzɛmmisa hemɔ anwo:
-
Nzu yeɛ ne odi nzɛ wɔ sɔ awoda nyɔ nanwo ɔ?
-
Sɛ ɛnea sɔ Bible nu dwirɛ he a, sɛɛ yeɛ Yehowa te ngã wɔ awoda bɔ bedi nanwo ɔ?
Ye mukoraati si ne, ebia ekobisa wɔnwo kyɛ, ‘Sɛ mefa menwo mewura awodalilɛ anaa afahyɛ bɔ oggyĩ twerɔnzɛm naso nu a, aso Yehowa nye kɔgye menwo anaa?’ Kenga Ɛzadɔs 32:1-8. Na bɔ VIDIO ne na susu nzɛmmisa bɔ olili so he anwo.
-
Nzuati yeɛ yenwo hia kyɛ yenwu bɔ Yehowa dé tonu ɔ?
-
Yɛkɔyɛ sɛɛ na yahora yayɛ sɔ?
Bɔ ɔkɔyɛ na yanwu kyɛ afahyɛ bie nzɔ Nyameɛpiri nye ɔ
-
Aso ogyi ngondombo ngyerɛkyerɛ so anaa? Sɛ ɛkɔhora konwu ye a, sana enwu nekaa bɔ ofi wale ɔ.
-
Aso ɔfa animnyam bɔ ɔmvata ma sona dasaniɛ, ahyehyedeɛ ahoroɛ, anaakyɛ maen ahyɛnzodeɛ anaa? Yehowa ngome yeɛ ɔfata animnyam bɔ ɔtra biala ɔ, na yele yenu gyidie kyɛ ɔkɔye ewiase haw mukoraati kofi berɛ.
-
Amanneɛ ahoroɛ ɔne nningyein bɔ bɛyɛ ye wɔ sɔ afahyɛ nanu ne, aso ɔne Bible mmraa yia anaa? Odikyɛ yɛkɔso yɛmaa y’abrabɔ nwo te.
5. Má afoforɛ nwu wɔ gyidie
Sɛ afoforɛ hyɛ wɔ kyɛ ɛfa wɔnwo wura afahyɛ ahoroɛ bɔ ɔnzɔ Nyameɛpiri nye nu a, ɔkɔhora kɔyɛ se kɔma wɔ kyɛ ɛkɔpo ɔ. Kyerɛkyerɛ wɔ gyidie nu wɔ obuo ne anifire atẽe so. Sɛ ɛpena kyɛ enwu kyɛbɔ ɛkɔyɛ so nwo nneasoɛ a, bɔ VIDIO ne.
Kenga Mateo 7:12, na susu nzɛmmisa hemɔ nwo:
-
Ɛkɔhora kogyina ɛhe aso kɔhã kohyire w’abusuafoɛ bɔ bɛnzo Yehowa ne kyɛ nnɛmaa bedi afofikyẽa bie anaa?
-
Nzu yeɛ ɛkɔyɛ kɔmaa w’abusuafoɛ konwu kyɛ, ɔwɔ nu kyɛ ɛne bɛ mmɔnu nni afahyɛ bie de, nakoso ɛdɔ bɛ, na ebu bɛ ɔ?
6. Yehowa pena kyɛ yɛnye gye
Yehowa pena kyɛ yɛne y’abusuafoɛ ne yɛ namvomɔ bonu gye yɛnye. Kenga Ɔsɛngafoɛ 8:15, na susu nzɛmmisa he anwo:
-
Sɛɛ yeɛ sɔ ngyekyɛmuɛ he maa yenwu kyɛ, Yehowa pena kyɛ yɛnye gye ɔ?
Yehowa pena kyɛ ye mmenia ne bɛ namvomɔ bɔnu gye bɛnye. Bɔ VIDIO ne, na nea kyɛbɔ ɛhe da y’ali wɔ yɛ maenmaen nhyiamu ahoroɛ bɔ yɛyɛ nabo ɔ.
Kenga Galatiafoɛ 6:10, na susu nzɛmmisa hemɔ anwo:
-
Aso odikyɛ yɛfa yɛnwo yewura afofikyẽa bɔ wale dumaa nu kyɛbɔ ɔkɔyɛ a, “yɛkɔsɔ mmenia nye” anaa?
-
Enu beni yeɛ ɔkɔmaa wɔnye kɔgye ɔ—kyɛ ɛkɔhyɛ nikye ɔnate afofikyẽa ti, anaakyɛ ekofi w’ahõne nu kɔhyɛ nikyee mmerɛ bɔ ɔtte afofikyẽa ɔ?
-
Ɔtɔ mmerɛ bie a, Adanzefoɛ nanu biemɔ ne bɛmaamɔ bɔ nu gye bɛnye na bɛkyɛ bɛ nikye. Sɛ ele mmaa a, nikyee titire beni paa yeɛ ɛkɔhora kɔyɛ kɔma bɛ ɔ?
EBIEMƆ KÃ KYƐ: “Nekaa bɔ afahyɛ bie fi wale de, yenwo nhia. ɔmaa ɛkora ne w’abusua ne wɔ nnamvomɔ bonu gye bɛnye”
-
Nzu yeɛ ɛkɔhã ɔ?
YEMUABƆLƐ
Yehowa pena kyɛ yɛne y’abusua ne yɛ nnamvo bonu gye yɛnye. Nakoso ɔpena kyɛ yɛtwẽ yɛnwo yefi afahyɛ ahoroɛ bɔ ɔnzɔ yenye ne mukoraati nwo.
Ndimu
-
Nzɛmmisa beni yeɛ yɛkɔhora yekobisa yɛnwo, na yanwu kyɛ aso afahyɛ bie sɔ Yehowa nye anaa?
-
Yɛkɔyɛ sɛɛ na yaboka y’abusuafoɛ ne yɛ nnamvo maa bate nikyehorɛ tibɔ yɛmva yɛnwo yenwura afahyɛ bie nu nabo?
-
Nzu yeɛ ɔmaa yenwu kyɛ Yehowa pena kyɛ yɛgye yɛnye ɔ?
NEA ƐHE KOSO
Nea afahyɛ pɔtẽe biemɔ bɔ Kristofoɛ mva bɛnwo bɛnwura nu ɔ.
“Nzuati Yeɛ Yehowa Adanzefoɛ Nni Afahyɛ Ahoroɛ Biemɔ Ɔ?” (Edwirɛ bɔ ɔwɔ intanɛt so)
Nea nikyee nna tibɔ yegyi so yɛkã kyɛ, Nyameɛpiri nye ngye awodalilɛ nwo ɔ.
“Nzuati Yeɛ Yehowa Adanzefoɛ Nni Awoda Ɔ?” (Edwirɛ bɔ ɔwɔ intanɛt so)
Wɔ vidio he anu ne, nea kyɛbɔ sɛ bedi afahyɛ bie a, ngwalaa bɔ bɛdɔ Yehowa ne kɔhora kɔyɛ bɔ okuro ɔ.
Kristofoɛ million pẽe asi gyinaeɛ kyɛ bengoli Bronya. Sɛɛ yeɛ bɛte ngã wɔ bɛ gyinaeɛsi nanwo ɔ?
“Benyane Nikyeebie Bɔ Ɔsombo Ɔ” (The Watchtower, December 1, 2012)
a Nea Ayieleɛ Dwirɛ 5 ne, na nea kyɛbɔ ekoli tebea bɔ ɔfa afofikyẽa nwo dwumaa, mmerɛ bɔ yenwo dwirɛ adwɔso ne.
