ADESUA 46
Nzuati Yeɛ Odikyɛ Eyira Wɔnwo So Na Ɛbɔ Asu Ɔ?
Sɛ ɛhyɛ Yehowa bɔ wɔ mbaeɛ nu kyɛ ekɔsõ ye ngome, na ɛkɔfa ye apɛdeɛ kolimoa wɔ w’asetena nu a, na eyira wɔnwo so ma ye. (Edwein 40:8) Ɛhene sĩ ne, ɛkɔbɔ asu. Sɛ ɛbɔ asu a, ɛmaa afoforɛ nwui kyɛ ayira wɔnwo so. Gyinaeɛ bɔ yekosi kyɛ yekoyira yɛnwo so kɔma Yehowa ne, ɔte nikyee bɔ yenwo hia tra nikyee foforɛ biala. Nzu yeɛ ɔkɔhora kɔhã wɔ maa ekosi gyinaeɛ bɔ anyeborolɛ wɔ nu, na ɔkɔhora kɔsesã wɔ asetena he ɔ?
1. Nzu yeɛ ɔkã ebie maa oyira yenwo so ɔ?
Ɔdɔ yeɛ ɔkã yɛ maa yeyira yɛnwo so yɛma Yehowa ɔ. (1 Yohane 4:10, 19) Bible ne hyɛ yɛ ngunaen kyɛ: “Fa w’ahõne mukoraati, wɔ kra mukoraati, w’adwene mukoraati, ɔne w’anwoserɛ mukoraati dɔ Yehowa wɔ Nyameɛpiri.” (Marko 12:30) Nná yɛnoa ngome yeɛ odikyɛ yɛfa yɛdɔ Nyameɛpiri ɔ, na mmom odikyɛ yɛfa yɛ nneyɛe koso yekyire kyɛ yɛdɔ ye. Kyɛbɔ ɔdɔ kã mmenia nyɔ maa begya ne, sɔ ala yeɛ odikyɛ yɛmaa ɔdɔ bɔ yele yɛma Yehowa ne kã yɛ maa yeyira yɛnwo so na yɛbɔ asu ɔ.
2. Nhyiraa beni yeɛ Yehowa fama ye Adanzefoɛ bɔ bayira bɛnwo so ne ɔ?
Sɛ ɛbɔ asu a, ɛbaboka Yehowa abusua bɔ anigye wɔnu naso. Ɛkɔwa koonwu ɔdɔ bɔ ole ma wɔ ne wɔ atẽe pẽe so, na ɛkɔhwẽ kopingye ye kɔtra kyɛbɔ epingye ye kesaalae ne. (Kenga Malaki 3:16-18.) Bɔ ɔboka so ne, Yehowa kɔɔyɛ wɔ Baba, na ekonya honhom nu aliemaamɔ bɔ bɛwɔ ewiase mukoraati bɔ bɛdɔ wɔ ne Yehowa ɔ. (Kenga Marko 10:29, 30.) Nahorɛ nu ne, odikyɛ etu agyirɛ biemɔ kora na ahora abɔ asu. Odikyɛ esua Yehowa nwo nikye, ɛdɔ ye, na enya Ɔwa nanu gyidie. Ayieleɛ koraa ne, odikyɛ eyira wɔnwo so ma Yehowa. Sɛ etu sɔ agyirɛ nemɔ na ɛbɔ asu a, ekonya anigye daa wɔ w’asetena nu. Nyameɛpiri Dwirɛ kã kyɛ: “Asubɔ . . . koso yeɛ kesaalae odé ɛmɔ ngõa ɔ.”—1 Petro 3:21.
SUA PẼE BOKASO
Nea nikyehorɛ tibɔ yenwo hia kyɛ eyira wɔnwo so ma Yehowa na ɛbɔ asu ɔ.
3. Odikyɛ yenu biala ye bɔ ɔkɔsõ ye ɔ
Wɔ tete Israel ne, na mmenia biemɔ susu kyɛ bɛkɔhora bɛkɔsõ Yehowa ne ngondombo nyameɛ Baal mukoraati. Nakoso Yehowa somane ye diyifoɛ Elia maa ɔɔtengyɛle sɔ adwene bɔ ɔttemayé bɔ né baanya ye ne. Kenga 1 Ahemvo 18:21, na susu nzɛmmisa he anwo:
-
Gyinaeɛ beni yeɛ ne odikyɛ Israelfoɛ ne si ɔ?
Tekyɛ Israelfoɛ ne, odikyɛ yɛ koso yɛye bɔ yɛkɔsõ ye ɔ. Kenga Luka 16:13, na susu nzɛmmisa hemɔ anwo:
-
Nzuati yeɛ yɛngɔhora yɛngɔsõ Yehowa ne sona, anaa nikyee foforɛ bie ngɔbonu ɔ?
-
Yɛkɔyɛ sɛɛ ne yamaa Yehowa anwu kyɛ ye yeɛ yɛkɔsõ ye ɔ?
4. Dwenedwene ɔdɔ bɔ Yehowa le ma wɔ nanwo
Yehowa ama yɛ akyɛdeɛ pẽe bɔ ɔsombo ɔ. Nzu yeɛ yɛkɔhora yɛkɔfa yɛkɔma ye ɔ? Bɔ VIDIO ne.
Atẽe benimɔ aso yeɛ Yehowa ala ɔdɔ ali wahyire wɔ ɔ? Kenga Edwein 104:14, 15 ɔne 1 Yohane 4:9, 10, na susu nzɛmmisa hemɔ anwo:
-
Akyɛdeɛ ahoroɛ bɔ Yehowa afa ama wɔ ne, enu beni yeɛ wɔnye sɔ paa ɔ?
-
Akyɛdeɛ ahoroɛ bɔ ɔte sɔ ne, sɛɛ yeɛ ɔmaa ɛtengã wɔ Yehowa nwo ɔ?
Sɛ yɛsa kã akyɛdeɛ bie bɔ yehia ye paa a, yɛmaa bɔ ɔfale sɔ akyɛdeɛ ne mane yɛ ne nwu kyɛ yɛnye sɔ. Kenga Deuteronomi 16:17, na susu nzɛmmisa he anwo:
-
Sɛ ɛnea nningyein bɔ Yehowa afama wɔ ne mukoraati a, nzu yeɛ odikyɛ wɔ koso ɔkã wɔ maa ɛfa ma ye ɔ?
5. Anwosohyira fa nhyiraa pẽe ba
Mmeni pẽe dédi kyɛ dumaa bɔ bekole ye, adwuma pá bɔ bekonya bɛkɔyɛ, anaa esikaa yeɛ ɔkɔmaa bɛnye kɔgye ɔ. Aso ɛnea ɔte nahorɛ? Bɔ VIDIO ne, na susu nzɛmmisa bɔ olili so he anwo.
-
Ɔwɔ nu kyɛ ne bĩaa bɔ ɔwɔ vidio nanu ne kuro bɔɔlbɔlɛ, nakoso nzuati yeɛ ɔyakyile sɔ adwuma ne ɔ?
-
Osili gyinaeɛ kyɛ ɔngɔyira yenwo so ngɔma bɔɔlbɔlɛ, na mmom okoyira yenwo so kɔma Yehowa. Esusu kyɛ osili gyinaeɛ pá anaa? Nzuati ɔ?
Kora bɔ somafoɛ Paul baayɛ Kristoniɛ ne, ne wafa yenwo wawura adwuma bɔ ɔkɔmaa okonya esikaa nu. Né wasua Yudafoɛ mmraa wafi kyirekyireniɛ bie bɔ ne wale dumaa berɛ. Nakoso ɔyakyili yemukoraati sĩlilɛ kyɛbɔ ɔkɔyɛ a, ɔkɔhora kɔɔyɛ Kristoniɛ ɔ. Aso Paul nune yenwo anaa? Kenga Filipifoɛ 3:8, na susu nzɛmmisa hemɔ anwo:
-
Nzuati yeɛ Paul hãne kyɛ, nningyein bɔ ɔyɛle kora yeɛ ɔbaayɛ Kristoniɛ ne “mukoraati te nwura” anaa bɔla ɔ?
-
Mvasoɛ beni yeɛ onyane ye ɔ?
-
Yehowa bɔ ɛsõ ye ne, nikyee foforɛ beni yeɛ ɛkɔhora kɔfa kɔtoto yenwo wɔ w’asetena nu ɔ?
Mmerɛ bɔ Paul ɔɔyɛle Kristoniɛ ne, nhyiraa bɔ onyane ye ne, ɔtra nningyein bɔ ɔfa bɔle afɔleɛ ne
EBIEMƆ KÃ KYƐ: “Mvasoɛ nne so kyɛ ɛkɔfa wɔ ngõa kɔyɛ bɔ Nyameɛpiri kuro ɔ.”
-
Esusu kyɛ, nzuati yeɛ nworɛ wɔ nu kyɛ ekoyira wɔ ngõa so kɔma Yehowa ɔ?
YEMUABƆLƐ
Ɔdɔ yeɛ ɔkã yɛ maa yeyira yɛnwo so yɛma Yehowa na yɛbɔ asu ɔ.
Ndimu
-
Nzuati yeɛ ɔfata kyɛ yɛdɔ Yehowa na yefi y’ahõne mukoraati nu yɛsõ ye ɔ?
-
Sɛɛ yeɛ Yehowa hyira ye Adanzefoɛ bɔ babɔ asu ne ɔ?
-
Aso ɛpena kyɛ eyira wɔnwo so ma Yehowa anaa?
NEA ƐHE KOSO
Nea bɔ ɔmaa ebie bɔ ɔto dwein ne ebie bɔ ɔbɔ bɔɔl hora yirale bɛnwo so bɛmane Yehowa ɔ.
Mmabunu Bisa Kyɛ—Nzu Yeɛ Ngɔfa M’asetena Ngɔyɛ Ɔ?—Gyinaeɛ Bɔ Ebiemɔ Asi Ɔ 6:54
Nea nikyee foforɛ tibɔ odikyɛ eyira wɔnwo so ɔ.
“Nzuati Yeɛ Odikyɛ Eyira Wɔnwo So Ma Yehowa Ɔ?” (The Watchtower, January 15, 2010)
Wɔ dwein nwo vidio he anu ne, nea anigye bɔ bɛbɔ beyira bɛnwo so ma Yehowa ne nya ɔ.
Wɔ edwirɛ bɔ yeɛ ole “Mmisale Menwo Afoɛ Pẽe Kyɛ, ‘Nzuati Yeɛ Yɛwɔ Wa Ɔ?’” nanu ne, hyɛ bɔ ɔhãne maame bie maa ɔneaneane nikyee bɔ yenwo hia ye wɔ y’asetena nu ne nzorɛ.
