Nnamvoa bɔ bepingyé yɛ paa ne, bɛboka yɛso mmerɛ bɔ yɛnye agye ne, na bewura yɛ serɛ mmerɛ bɔ nningyein ngɔyé ne. Nakoso Bible ne bɔ yɛ kɔkɔ kyɛ, nná ebiala yeɛ ɔte adamvoa pá ɔ. Ɛkɔyɛ sɛɛ na ahora afa nnamvoa pá? Susu nzɛmmisa bɔ olili so he anwo.

1. Ngɛndɛensoɛ beni yeɛ wɔ nnamvomɔ kɔhora konya ye wɔ wɔ́ so ɔ?

Yɛtaa yesuasua mmenia bɔ yɛne bɛ bɔ ne. Sɔ mmenia nemɔ kɔhora kɔyɛ bɛbɔ belé subaen pá anaa bɛbɔ bɛ subaen ttemayé​—sɛ yɛne bɛ bɔ wɔ intanɛt so pó a, yɛkɔhora yekosuasua bɛ. Bible ne kã kyɛ, “bɔ ɔne mmenia bɔ bɛse nworɛ nate ne konwu nworɛ, nakoso bɔ ɔne ngwasiafoɛ [bɛbɔ bɛnnɔ Yehowa] nate ne, okonwu amaneɛ.” (Anyandera 13:20) Nnamvoa bɔ bɛdɔ Yehowa na bɛsõ ye ne, bɛkɔhora bɛkɔboka wɔ maa ekopingyé ye, na asisi gyinaeɛ pá. Nakoso bɛbɔ bɛnne asafo nanu bɔ yɛkɔfa bɛ nnamvoa ne, bɛkɔhora kɔmaa yɛkɔhwẽ yɛnwo yekofi Yehowa nwo. Ɛhene ati yeɛ Bible ne hyɛ yɛ ngunaen kyɛ yɛfa yɛ nnamvoa nyanza nu ne! Sɛ yɛ nnamvoa yeɛ ole bɛbɔ bɛdɔ Nyameɛpiri a, yɛne bɛ mukoraati konya so mvasoɛ. Na ɔkɔmaa ‘yɛkɔhɔso yɛkɔhyehyɛ yɛnwo ngunaen na yabokaboka yɛnwo.’​—1 Tɛsalonikafoɛ 5:​11.

2. Sɛɛ yeɛ wɔ nnamvoa bɔ ɛkɔfa bɛ ne kɔhã Yehowa ɔ?

Sɛ Yehowa fa nnavoa a, ɔnea yé. “Bɛbɔ bɛtengyɛ ne yeɛ bɛte Ye nnamvoa paa ɔ.” (Anyandera 3:​32) Sɛ yɛfa nnamvoa bɔ bɛnnɔ Yehowa a, sɛɛ yeɛ ɔkɔte ngã ɔ? Ɔkɔyɛ ye yá paa! (Kenga Yakobo 4:4.) Nakoso, sɛ yɛpo abiengoɛ tɛɛ, na yɛtwẽ yepingye Yehowa ɔne bɛbɔ bɛdɔ ye ne a, ɔkɔmaa yenye kɔgye na yayɛ ye damvo.​—Edwein 15:​1-4.

 SUA PẼE BOKASO

4. Mmenia bɔ ɔsono kyɛbɔ bɛte ne kɔhora kɔɔyɛ yɛ nnamvo

Bible ne kã David ne Yonatan, mmrenzua nyɔ bɔ bɛtenane ase wɔ tete Israel nanwo dwirɛ. Né bɛte sorongo wɔ afoɛ bɔ ebiala ali, ɔne bɛ tebea ahoroɛ nu; nakoso bɛfale adamvoa bɔ enu yɛse paa ɔ. Kenga 1 Samuel 18:1, na susu nzɛmmisa he anwo:

• Nzuati yeɛ nná mmerɛ mukoraati, yeɛ odikyɛ mmenia bɔ yɛkɔfa bɛ nnamvoa ne yɛ bɛbɔ yɛne bɛ bɔ tipɛen, anaa bɛbɔ yɛne bɛfi nekaa kõ ɔ?

Kenga Romanfoɛ 1:​11, 12, na susu nzɛmmisa he anwo:

• Sɛɛ yeɛ nnamvoa bɔ bɛdɔ Yehowa ne kɔhora kɔhyehyɛ bɛnwo ngunaen ɔ?

Wɔ vidio he anu ne, nea kyɛbɔ aliemaa bienzua bie nyane nnamvoa fili nekaa bɔ ne ɔnnea atẽe ɔ. Bɔ VIDIO ne, na susu nzɛmmisa hemɔ anwo.

• Wɔ vidio nanu ne, nzuati yeɛ ne Akil awofoɛ dwenedwene nnamvoa bɔ ɔkɔfa bɛ wɔ sukuu nu nanwo ɔ?

• Ahyɛaseɛ ne, nningyein beni yeɛ ne yenye gye yenwo wɔ ye nnamvo nemɔ nwo ɔ?

• Ɔyɛle sɛɛ yeɛ ɔhora lili angonam bɔ ne wayɛ naso ɔ?

5. Kyɛbɔ ekonya nnamvoa pá ɔ

 YEMUABƆLƐ

Sɛ yɛfa yɛ nnamvoa nyanza nu a, ɔmaa Yehowa nye gye, na yenya so mvasoɛ.

Ndimu

• Nzuati yeɛ Yehowa dwene adamvoa bɔ yɛkɔfa nanwo ɔ?

• Nnamvoa benimɔ yeɛ odikyɛ yɛpo ɔ?

• Ɛkɔyɛ sɛɛ na ahora ne mmeni pá afa adamvoa bɔ enu yɛ se ɔ?