Ɛyɛ a, agyaafoɛ bɔ bagya foforɛ ne nya adwene kyɛ, anigye bɔ benya ye wɔ b’ayeforɔ kyẽa ne kɔtena berɛ daa. Na ɔte nahorɛ sɔ. Kristofoɛ bɔ begyale ahyɛ, bɔ babɔ mmɔden bafa Bible nu afutue bayɛ adwuma ne, banwui paa kyɛ sɔ dwirɛ he te nahorɛ.

1. Afutue beni yeɛ Bible ne fama huɛmɔ ɔ?

Yehowa aye hũɛ kyɛ ye yeɛ ɔyɛ abusua ne ti ɔ. (Kenga Ɛfesofoɛ 5:​23.) Yehowa nea atẽe kyɛ okosisi gyinaeɛ bɔ ɔkɔboka abusua ne ɔ. Bible ne tu hũɛmɔ fo kyɛ: “Bɛhɔso bɛlɔ bɛyemɔ.” (Ɛfesofoɛ 5:​25) Nzu yeɛ ɛhene kyire ɔ? Hũɛ bɔ ole ɔdɔ ma ɔye ne, ɔda obuo ne ayemye ali kyire ye wɔ awuro ne mmenia nu. Ɔbɔ ɔye nanwo waen fi asane biala nwo, na ɔbɔ mmɔden kyɛ ɔkɔma ye bɔ ohia wɔ anwoɔnaen ɔne ngate nu. (1 Timoteo 5:8) Bɔ yenwo hia paa ne, ɔboka ɔye maa ɔne Yehowa afĩa abusuabɔ yɛ pá. (Mateo 4:4) Kyɛ nneasoɛ, ɔkɔhora ne ɔye kɔbɔnu kɔbɔ mbaeɛ, na bakenga Bible ne. Sɛ hũɛ da ɔdɔ ali kyire ɔye a, ɔmaa ɔne Yehowa afĩa abusuabɔ nanu yɛse.​—Kenga 1 Petro 3:7.

2. Afutue beni yeɛ Bible ne fama yeɛmɔ ɔ?

Nyameɛpiri Dwirɛ kã kyɛ, yeɛ de, “onya obuo bɔ enu yɛnõ ɔma ohũ.” (Ɛfesofoɛ 5:​33) Ɔkɔyɛ sɛɛ na wayɛ sɔ? Ɔkɔhora kosusu subaen pá ahoroɛ bɔ ohũ le ye, ɔne mmɔden bɔ ɔbɔ kyɛ ɔkɔmaa ɔne ngwalaa nemɔ sa kɔha bɔ behia nanwo. Ɔkɔhora koso kohyire kyɛ obu ohũ, mmerɛ bɔ ɔfoa gyinaeɛ ahoroɛ bɔ okosisi naso, na ɔne ye adwudwo ayemye nu, na wabu ye, ɔmva yenwo kyɛ ohũ nzo Yehowa ne.

3. Nzu yeɛ agyaafoɛ kɔhora kɔyɛ kɔfa kowura bagyaa nanu serɛ ɔ?

Bible ne kã fa agyaafoɛ nwo kyɛ: “Bɛkɔyɛ anwoɔnaen kõ.” (Mateo 19:5) Ɛhe kyire kyɛ, odikyɛ bɛkõ betia nikyeebiala bɔ ɔkɔhora kɔmaa bafĩa kɔtete ɔ. Sɛ bɛkɔhora bɛkɔyɛ sɔ a, sana benya mmerɛ bɛma bɛnwo, na befi nahorɛlilɛ ne ɔdɔ nu bɛbɔ bɛ nzusueɛ ne batinga nwo ngɔmmɔ. Sɛ Yehowa la ahameɛ a,​—ɔnzɛkyɛ bɛmaa nikyee foforɛ biala nwo hia bɛ tra​—bɛ nwokafoɛ ne. Odikyɛ bɛnea bɛnwo yé kyɛ, bɛne ebie bɔ ɔtte bɛ nwokafoɛ ngɔbɔ kyɛbɔ ɔmvata ɔ.

 SUA PẼE BOKASO

4. Hũɛmɔ​—ɛmɔlɔ bɛyemɔ, na ɛmɔnea bɛ yé

5. Yeɛmɔ​—ɛmɔlɔ behũmɔ na ɛmɔbu bɛ

Bible ne hyɛ brasua bɔ wagya ngunaen kyɛ obu ohũ ɔmva yenwo kyɛ, ohũ sõ Yehowa anaakyɛ ɔnzo ye ne. Kenga 1 Petro 3:​1, 2, na susu nzɛmmisa hemɔ anwo:

• Sɛ ehũ nzo Yehowa a, aprowaa biala nne yenwo kyɛ ɔhale wɔ ngome a, ahãa waaso. Atẽe pá beni yeɛ ɛkɔhora kɔfa so kɔboka ye ɔ​—Aso ɛnea a, odikyɛ ɛfa nzɛmba ne puopua ye, anaakyɛ ɛkɔyɛ yeɛ pá na ala ayemye, ɔdɔ, ɔne obuo ali ahyire ye? Nzuati ɔ?

Hũɛmɔ ne yeɛmɔ kɔhora kɔbonu kosi gyinaeɛ ahoroɛ bɔ ɔte pá. Nakoso ɔtɔ mmerɛ bie a, yeɛ ne ohu ngɔyɛ adwene wɔ  gyinaeɛsi bie nwo. Ɔba sɔ a, ɔkɔhora kofi ɔdɔ ne obuo nu kohyire y’adwene, nakoso odikyɛ ɔkae kyɛ, ohũ yeɛ Yehowa afa awura yesa kyɛ, osi gyinaeɛ bɔ ɔte pá ma abusua ne ɔ. Odikyɛ ɔbɔ yenwo mmɔden tae ohũ sĩ wɔ gyinaeɛ bɔ wasi nanu. Ɔyɛ sɔ a, ɔkɔboka maa asomdwee kɔwa abusua nanu. Kenga 1 Petro 3:​3-5, na susu nzɛmmisa he anwo:

• Sɛ brasua bɔ w’agya da obuo ali kyire ohũ a, sɛɛ yeɛ Yehowa te ngã ɔ?

6. Ɛkɔhora koli ɔhaw bɔ ɔwɔ w’agyaa nu naso

 YEMUABƆLƐ

Sɛ hũɛ ne ɔye dodɔ bɛnwo, bekyire obuo bɛma bɛnwo, na bɛfa Bible nu nnyinasoɛdwirɛ bɛbɔ bɛbra a, bɛnye kɔhora kɔgye.

Ndimu

• Nzu yeɛ hũɛ kɔhora kɔyɛ na anigye awa agyaa nanu ɔ?

• Nzu yeɛ brasua bɔ w’agya ne kɔhora kɔyɛ na anigye awa agyaa nanu ɔ?

• Sɛ agya a, Bible nu nnyinasoɛdwirɛ beni yeɛ ɔkɔboka wɔ maa anigye kɔwa w’agyaa nanu ɔ?