ADESUA 50

Ɛkɔyɛ Sɛɛ Na W’abusua Anya Anigye?—Bue 2

BƆ

Ngwalaa te akyɛdeɛ bɔ ofi Yehowa berɛ ɔ. Ɔnea atẽe kyɛ awofoɛ kɔnea akyɛdeɛ bɔ ɔte sɔ naso yé. Yehowa afa afutue bɔ nworɛ wɔ nu ama awofoɛ bɔ ɔkɔhora kɔboka bɛ maa bɛkɔyɛ sɔ ɔ. Y’afutue ne kɔhora kɔboka ngwalaa maa bekonwu b’asɛyɛdeɛ wɔ abusua nanu, na wamaa anigye awa nu.

1. Afutue beni yeɛ Yehowa fama awofoɛ ɔ?

Yehowa pena kyɛ awofoɛ dɔ bɛ mmaamɔ, na bɛbɔ mmɔden benya mmerɛ ma bɛ. Yehowa sa pena kyɛ awofoɛ bɔ bɛ mmaamɔ nwo waen, na bɛfa Bible nu nnyinasoɛdwirɛ bɛtete bɛ. (Anyandera 1:8) Ɔkã kyire Seɛmɔ kyɛ: “Bɛhɔso bɛtete [bɛ mmaamɔ] wɔ ndeɛnsoɛ . . . ne Yehowa afutue nu.” (Kenga Ɛfesofoɛ 6:4.) Sɛ awofoɛ amva b’asɛyɛdeɛ angɔndo ebie so, na bɛ bɔbɔ bɛfa Yehowa akwangyerɛ bɛtete bɛ mmaamɔ a, ɔmaa Yehowa nye gye paa.

2. Afutue beni yeɛ Yehowa fama ngwalaa ɔ?

Yehowa kã kyire ngwalaa kyɛ: “Bɛyɛ setie bɛma b’awofoɛ.” (Kenga Kolosefoɛ 3:20.) Sɛ ngwaala yɛ setie ma b’awofoɛ, ná bebu bɛ a, bɛmaa Yehowa ne b’awofoɛ mukoraati nye gye. (Anyandera 23:22-25) Yesu yɛle nneasoɛ pá mmerɛ bɔ ne ɔte akwalaa ne. Ɔwɔ nu kyɛ né ɔte pɛ de, nakoso ɔyɛle setie mane y’awofoɛ, na né obu bɛ.—Luka 2:51, 52.

3. Kyɛ Abusua ne, ɔkɔyɛ sɛɛ na ɛmɔ ahora bapingyé Nyameɛpiri?

Sɛ ɛte awofoɛ a, kyɛbɔ esi dɔ Yehowa ne, sɔ ala yeɛ ɛpenakyɛ wɔ mmaamɔ yɛ ɔ. Ɛkɔyɛ sɛɛ na ahora aboka wɔ mmaamɔ wɔ sɔ atẽe naso? Sana ɛyɛ bɔ Bible ne kã ne: “Odikyɛ ɛfa [Yehowa dwirɛ] dua ɛwa ahõne nu, na ɛkã yenwo dwirɛ mmerɛ bɔ ɛte w’awuro nu, ɔne mmerɛ bɔ ɛnate atẽe so ɔ.” (Deuteronomi 6:7) Sɛ bɛkã kyɛ fa “dua” ɛwa ahõne nu a, okyire kyɛ ekotĩ edwirɛ bie nu mmerɛ pẽe. Sɔ ala yeɛ, odikyɛ etĩ edwirɛ bie nu kyire wɔ mmaamɔ, kyɛbɔ daa bɛkɔkae ɔ. Sɔ twerɔnzɛm he kyire kyɛ, odikyɛ ɛpena yenwo atẽe mmerɛ biala fa kã Yehowa nwo dwirɛ kyire wɔ mmaamɔ. Kyɛ abusua ne, odikyɛ dapɛen biala nune, ɛmɔye mmerɛ bie besie berɛ bɔ ɛmɔkɔfa bɛkɔsõ Yehowa ɔ. Sɛ elle ngwalaa po a, odikyɛ ɛye mmerɛ bie sie berɛ dapɛen biala bɔ ɛkɔfa kosua Nyameɛpiri Dwirɛ ɔ.

SUA PẼE BOKASO

Nea nyanzahyɛ ahoroɛ bɔ ɔmaa anigye ne anwobanmɔ ba abusua nu ɔ.

4. Tete wɔ mmaamɔ wɔ ɔdɔ nu

Akwalaa tetelɛ lla ase koraa. Sɛɛ yeɛ Bible ne kɔhora kɔboka ɔ? Kenga Yakobo 1:19, 20, na susu nzɛmmisa hemɔ anwo:

Sɛ awofoɛ ne bɛmaamɔ bɔ ngɔmmɔ a, sɛɛ yeɛ bɛkɔhora bɛkɔla ɔdɔ ali bekohyire bɛ ɔ?
Nzuati yeɛ ɔnzɛkyɛ awofoɛ twẽ bɛ mmaamɔ so wɔ ɛyaafɛlɛ nu ɔ? a

5. Bɔ wɔ mmaamɔ nwo waen

Sɛ ɛkɔhora kɔbɔ wɔ mmaamɔ nwo waen a, odikyɛ ɛne benu biala bɔ brenzua ne brasua nnaa nwo ngɔmmɔ. Ebia ye hãnɛ kɔhora kɔyɛ se kɔma wɔ. Bɔ VIDIO ne, na susu nzɛmmisa bɔ olili so he anwo.

VIDIO: Bɔ Wɔ Mmaamɔ Nwo Nwaen Fi Bɔne Nwo (2:58)

Nzuati yeɛ ɔyɛse ma awofoɛ biemɔ kyɛ, bɛne bɛ mmaamɔ kɔbɔ brenzua ne brasua nnaa nwo ngɔmmɔ ɔ?
Atẽe benimɔ aso, yeɛ awofoɛ biemɔ ahyirehyire brenzua ne brasua nnaa nu ahyire bɛ mmaamɔ ɔ?

Kyɛbɔ bahyɛ yenwo ngɔm ne, bɔneyɛlɛ kɔhɔ ye nyunu wɔ Satan wiase he anu. Kenga 2 Timoteo 3:1, 13, na susu nzɛmmisa he anwo:

Mmenia bɔ ngyekyɛmuɛ 13 ne kã bɛnwo dwirɛ ne te bɛbɔ bɛfefe ngwalaa ɔ. Yeti, nzuati yeɛ yenwo hia kyɛ, awofoɛ ne bɛ mmaamɔ bɔ brenzua ne brasua nnaa nwo ngɔmmɔ, na bekyire bɛ kyɛbɔ bɛkɔbɔ bɛnwo waen bekofi bɛbɔ bɛfeefee ngwalaa nwo ɔ?

Ɛse?

Yehowa Adanzefoɛ ayɛ nwomaa ne vidio ahoroɛ pẽe bɔ ɔboka awofoɛ, maa benwu kyɛbɔ bɛne bɛ mmaamɔ kɔbɔ brenzua ne brasua nnaa nwo ngɔmmɔ, na babɔ bɛnwo nwaen bafi bɛbɔ bɛfeefee ngwalaa nanwo ɔ. Kyɛ nneasoɛ ne, nea:

Bɔ Wɔ Mmaamɔ Nwo Waen (vidio)
Suasua Kyirekyireniɛ Pirikua Ne, yeti 10 ɔne 32
“Ɛne Wɔ Mmaamɔ Bɔ Brenzua Ne Brasua Nnaa Nwo Ngɔmmɔ” (Awake! No. 5 2016)

6. Bu w’awofoɛ

Ngwalaa ne mmabunu kɔhora kɔfa bɛ dwudwolɛ so kohyire kyɛ bebu b’awofoɛ. Bɔ VIDIO ne, na susu nzɛmmisa bɔ olili so he anwo.

VIDIO: Ngɔyɛ Sɛɛ Na Mene M’awofoɛ Adwudwo? (2:19)

Sɛ mmabunu ne b’awofoɛ bɔ ngɔmmɔ wɔ obuo nu a, nzuati yeɛ mvasoɛ wɔ so ɔ?
Atẽe beni yeɛ mmabunu kɔhora kɔfaso ne b’awofoɛ kodwudwo wɔ nidie nu ɔ?

Kenga Anyandera 1:8, na susu nzɛmmisa he anwo:

Sɛ abaabunu bie awofoɛ fa akwangyerɛ maye a, sɛɛ yeɛ odikyɛ obu sɔ akwangyerɛ ne ɔ?

7. Ɛne w’abusua bonu bɛsõ Yehowa

Yehowa Adanzefoɛ mmusua ye mmerɛ pɔtee bie sie berɛ dapɛen biala bɛbonu bɛsua Bible ne. Sɛɛ yeɛ sɔ adesua ne te ɔ? Bɔ VIDIO ne, na susu nzɛmmisa bɔ olili so he anwo.

VIDIO: Abusua Sõen—Ɔhaw Ahoroɛ Bɔ Ɔwɔ Nu, Ɔne Mvasoɛ Bɔ Enya Fi So Ɔ (8:04)

Atẽe beni aso yeɛ abusua bie kɔhora kɔyɛ Abusua Sõen bɔ ɔkɔhɔ so daa nwo nhyehyɛeɛ ɔ?
Nzu yeɛ abusua bie kɔhora kɔyɛ, na wamaa b’abusua sõen ayɛ anigye?—Nea foto bɔ ɔwɔ adesua he nyunu ne.
Nzu yeɛ wayɛ ɔhaw wama ɛmɔ kyɛ ɛmɔkɔbonu bekosua nikyee ɔ?

Wɔ tete Israel ne, na Yehowa nea atẽe kyɛ mmusua ahoroɛ ne kosua twerɔnzɛm ne daa. Kenga Deuteronomi 6:6, 7, na susu nzɛmmisa he anwo:

Ɛkɔyɛ sɛɛ na afa sɔ nnyinasoɛdwirɛ he ayɛ adwuma?

Abusua sõen nwo nyanzahyɛ:

Ɛmɔsiesie ɛmɔnwo bɛma asafo nhyiamu ahoroɛ.
Ɛmɔpena Bible nu dwirɛ bie bɔ abusua ne nye kɔgye yenwo, na ɛmɔ susu yenwo.
Sɛ ele ngwalaa mmaammaa a, kɔhwẽ nningyein bɔ bayɛ bama ngwalaa bɔ ɔwɔ jw.org so ne bie.
Sɛ ele mmabunu a, ɛne bɛ susu nwomaa bɔ ɔkã mmabunu nwo dwirɛ bɔ ɔwɔ jw.org so nanwo.
Ɛne wɔ mmaa nemɔ yɛ Bible nu dwirɛ bie nwo drama.
Ɛmɔ bonu bɛnea vidio bɔ ɔwɔ jw.org so ne bie na ɛmɔ susu yenwo.

EBIEMƆ KÃ KYƐ: “Bible nanu yɛse ma ngwalaa kyɛ bɛkɔte yebo ɔ.”

Nzu yeɛ ɛkɔhã ɔ?

YEMUABƆLƐ

Yehowa pena kyɛ awofoɛ dɔ bɛ mmaamɔ, bɛ tete bɛ, na bɛbɔ bɛnwo waen; ɔpena kyɛ ngwalaa bu b’awofoɛ na bɛ yɛ setie bɛma bɛ; na ɔpenakyɛ mmusua bonu sõ ye.

Ndimu

Awofoɛ kɔyɛ sɛɛ na batete bɛ mmaamɔ, na babɔ bɛnwo waen?
Ngwalaa kɔyɛ sɛɛ na bali b’awofoɛ ni?
Mvasoɛ beni yeɛ ɔwɔ so kyɛ, abusua bie kɔye mmerɛ bie kosie berɛ dapɛen biala kɔfa kɔyɛ abusua sõen ɔ?

Yafa adesua ne yadwu:

Botaeɛ

Bisa aliemaamɔ bɔ bɛwɔ asafo nanu ne, na bɛma wɔ nyanzahyɛ bɔ ɛkɔhora kosusu yenwo wɔ w’abusua sõen bo ɔ.

Anaakyɛ:

Wɔ botaeɛ foforɛ