ADESUA 54

Dwumaa Bɔ “Akoaa Nahorɛniɛ Ne Nworɛniɛ” Ne Di Ɔ.

BƆ

Yesu yeɛ ɔte Kristofoɛ asafo ne ti ɔ. (Ɛfesofoɛ 5:23) Ɛnnɛ, Yesu fi anwuro nate “akoaa nahorɛniɛ ne nworɛniɛ” naso yeɛ okyire ye sililɛfoɛ bɔ bɛwɔ aseɛ so n’atẽe ɔ. (Kenga Mateo 24:45.) Ɔwɔ nu kyɛ Yesu bɔbɔ yeɛ waye “akoaa” ne, na ye yeɛ wama bɛ atẽe kyɛ besisi gyinaeɛ ahoroɛ, yemukoraati sĩ ne odikyɛ akoaa ne yɛ setie ma Kristo, na ɔsõ Kristo aliemaamɔ. Nwa yeɛ ole sɔ akoaa ne? Sɛɛ yeɛ akoaa ne nea yɛ so ɔ?

1. Nwa yeɛ ole “akoaa nahorɛniɛ ne nworɛniɛ ne”?

Mmerɛ pẽe ne, Yehowa fa bienzua anaa kue kãa bie so fa akwangyerɛ ma ye mmenia. (Malaki 2:7; Hebrifoɛ 1:1) Yesu wue sĩ ne, asomafoɛ ne ne mbanyi bɔ ne bɛwɔ Yerusalem ne yeɛ na beli asafo ne nyunu ɔ. (Asomafoɛ Ne Nnwumaa 15:2) Ɛnnɛ koso, mbanyi kue kãa bɔ bɛte—Yehowa Adanzefoɛ Akwangyerɛ Kue ne—yeɛ bɛkã bɛbɔnu bɛfa ngyerɛkyerɛ bɔ ogyi Bible so bɛma, ná bekyire asɛnga adwuma n’atẽe ɔ. Sɔ kue ne yeɛ ole “akoaa nahorɛniɛ ne nworɛniɛ bɔ [Yesu] aye bɛ ne.” (Mateo 24:45a) Akwangyerɛ Kue nanufoɛ mukoraati te Kristofoɛ bɔ bapopa bɛ, bɔ bele anyelasoɛ kyɛ, bɛne Yesu kooli nikyee wɔ y’anwuro Ahennie nanu, mmerɛ bɔ bawu bafi aseɛ he aso ne.

2. Ngyerɛkyerɛ bɔ ogyĩ Bible naso beni yeɛ akoaa nahorɛniɛ ne fama ɔ?

Yesu hãne kyɛ akoaa nahorɛfoɛ ne “kɔma [bɛliemamɔ Kristofoɛ] aleɛ wɔ mmerɛ bɔ ɔsɛ nu.” (Mateo 24:45b) Kyɛbɔ aleɛ bɔ yedi boka yɛ maa yenya anwoserɛ ne akwanwosaen pá ne, honhom nu aleɛ—bɔ ɔte ngyerɛkyerɛ bɔ ofi Bible nanu ne—ɔmaa yenya anwoserɛ bɔ yɛkɔhɔ so yɛkɔfa yekoli Yehowa nahorɛ, na yayɛ adwuma bɔ Yesu afa awura yɛsa kyɛ yɛyɛ ne. (1 Timoteo 4:6) Yɛnate asafo nhyiamu ahoroɛ, manzin nhyiamu, mandam nhyiamu ahoroɛ bɔ yɛkɔ, ɔne nwomaa ne vidio ahoroɛ bɔ ogyi Bible so, bɔ ɔboka yɛ maa yenwu Nyameɛpiri apɛdeɛ, na yɛhyɛ yɛne y’afĩa abusuabɔ nanu serɛ naso yeɛ yɛsa kã honhom nu aleɛ bɔ ɔte sɔ ne ɔ.

SUA PẼE BOKASO

Nea nikyehorɛ tibɔ yehia “akoaa nahorɛniɛ ne nworɛniɛ” bɔ yeɛ ole —Akwangyerɛ Kue ne ɔ.

Akwangyerɛ Kue ne fa Bible nu ngyerɛkyerɛ, akwangyerɛ, ɔne mmokalɛ ma Yehowa Adanzefoɛ bɔ bɛwɔ ewiase mukoraati ne

3. Odikyɛ Yehowa asomvoɛ nya Ahyehyɛdeɛ

Akwangyerɛ Kue ne kyire Yehowa Adanzefoɛ adwuma n’atẽe wɔ Yesu akwangyerɛ bo. Sɔ ala yeɛ né ɔte wɔ tete Kristofoɛ ne aberɛ so ɔ. Bɔ VIDIO ne.

VIDIO: Kyɛbɔ Yehowa Ahyehyɛ Nningyein Wɔ Ye AsafoNanu Ɔ (6:18)

Kenga 1 Korintofoɛ 14:33, 40, na susu nzɛmmisa he anwo:

Sɛɛ yeɛ sɔ ngyekyɛmuɛ he maa yenwu kyɛ, Yehowa pena kyɛ ye Adanzefoɛ nya ahyehyɛdeɛ ɔ?

4. Akoaa nahorɛfoɛ ne yeɛ bedi y’asɛnga adwuma ne nyunu ɔ

Asɛnga adwuma ne yeɛ ne ɔte adwuma bɔ yenwo hia paa bɔ tete Kristofoɛ ne yɛle ɔ. Kenga Asomafoɛ Ne Nnwumaa 8:14, 25, na susu nzɛmmisa he anwo:

Wɔ tete Kristofoɛ ne berɛ so ne, nwamɔ yeɛ né bedi asɛnga adwuma ne nyunu ɔ?
Sɛɛ yeɛ Petro ne Yohane lɛle bɛ mvɛfoɛ asomafoɛ ne akwangyerɛ tole nu ɔ?

Asɛnga adwuma ne te adwuma bɔ yenwo hia paa bɔ Akwangyerɛ Kue ne di ye nyunu ɔ. Bɔ VIDIO ne.

VIDIO: Bɛfale B’adwene Besiele Asɛnga Adwuma Naso (1:24)

Yesu sili nikyeetibɔ asɛnga adwuma nanwo hia paa naso dua. Kenga Marko 13:10, na susu nzɛmmisa hemɔ anwo:

Nzuati yeɛ asɛnga adwuma nanwo hia Akwangyerɛ Kue ne paa ɔ?
Nzuati yeɛ yehia “akoaa nahorɛniɛ ne nworɛniɛ” ne, na wali asɛnga adwuma ne nyunu wɔ ewiase mukoraati ɔ?

5. Akoaa nahorɛfoɛ ne fa akwangyerɛ ahoroɛ ma

Akwangyerɛ Kue ne fa akwangyerɛ ahoroɛ ma Kristofoɛ bɔ bɛwɔ ewiase mukoraati ne. Sɛɛ yeɛ besi akwangyerɛ bɔ bɛfa bɛma nanwo gyinaeɛ ɔ? Nea kyɛbɔ akwangyerɛ kue bɔ bɛtenane ase tete ne sili gyinaeɛ ahoroɛ ɔ. Kenga Asomafoɛ Ne Nnwumaa 15:1, 2, na susu nzɛmmisa hemɔ nwo:

Nzu yeɛ né tete Kristofoɛ n’adwene nyia wɔ yenwo ɔ?
Nwamɔ berɛ, yeɛ Paul ne Banaba ne afoforɛ lɛle akwangyerɛ fa siesiele edwirɛ bie ɔ?

Kenga Asomafoɛ Ne Nnwumaa 15:12-18, 23-29, na susu nzɛmmisa he anwo:

Wɔ tete mmerɛ nu ne, kora bɔ akwangyerɛ kue ne kosi gyinaeɛ bie ne, sɛɛ yeɛ ne bɛpena Nyameɛpiri berɛ mmokalɛ ɔ?—Nea ngyekyɛmuɛ 12, 15, ɔne 28.

Kenga Asomafoɛ Ne Nnwumaa 15:30, 31 ɔne 16:4, 5, na susu nzɛmmisa hemɔ anwo:

Sɛɛ yeɛ tete Kristofoɛ ne yɛle bɛ nikyee wɔ akwangyerɛ bɔ akwangyerɛ kue ne famane bɛ nanwo ɔ?
Sɛɛ yeɛ Yehowa yirale setie bɔ bɛyɛle naso ɔ?

Kenga 2 Timoteo 3:16 ɔne Yakobo 1:5, na susu nzɛmmisa he anwo:

Ɛnnɛ, sɛ Akwangyerɛ Kue ne sisi gyinaeɛ ahoroɛ a, nwa berɛ yeɛ bɛkɔpena akwangyerɛ ɔ?

EBIEMƆ KÃ KYƐ: “Sɛ etie Akwangyerɛ Kue ne a, na ɛma sona yeɛ okyire w’atẽe ɔ.”

Nzu yeɛ ɔmaa ede di kyɛ, Yesu yeɛ okyire Akwangyerɛ Kue n’atẽe ɔ?

YEMUABƆLƐ

Akwangyerɛ Kue ne yeɛ ole “akoaa nahorɛniɛ ne nworɛniɛ” bɔ Kristo aye ye ne. Ɔfa akwangyerɛ ne ngyerɛkyerɛ bɔ ogyĩ Bible so ma Kristofoɛ bɔ bɛwɔ ewiase mukoraati ne.