ADESUA 55
Boka Asafo Bɔ Ɛwɔ Nu Ne
Wɔ ewiase mukoraati ne, mmenia million pẽe fa anigye sõ Yehowa wɔ asafo bɔ ɔbo apee pẽe nu. Bɛnye sɔ akwangyerɛ ne anwobanmɔ bɔ benyane, na bɛyere bɛnwo bɛboka asafo ne wɔ atẽe pẽe so. Sɔ yeɛ wɔ koso ɛtengã wɔ w’asafo bɔ ɛwɔ nu nanwo anaa?
1. Atẽe ahoroɛ beni yeɛ ɛkɔhora kɔfa so kɔfa wɔ mmerɛ, ne w’anwoserɛ kɔboka asafo ne ɔ?
Yenu biala kɔhora kɔboka asafo ne. Kyɛ nneasoɛ ne, ele bɛbɔ b’afoɛ ahɔ anyunu ne bɛbɔ bɛnde apɔ wɔ w’asafo nu anaa? Aso ɛkɔhora kɔɔfa bɛ kɔhɔ asafo nhyiamu? Anaakyɛ ɛkɔhora kɔboka bɛ maa bekosiesie bawuro nu, anaa ɛkɔɔtotɔ nningyein bɔ behia kɔma bɛ anaa? (Kenga Yakobo 1:27.) Yɛkɔhora koso yekotu yɛnwo yɛkɔma yekosiesie Ahennie Asa ahoroɛ so maa ɛberɛ kɔte. Nná ebiala yeɛ ɔhyɛ yɛ kyɛ yɛyɛ sɔ ɔ. Na mmom ɔdɔ bɔ yelé yɛma Nyameɛpiri ne yeliemamɔ ne, yeɛ ɔkã yɛmaa “yetu [yɛnwo] yɛma yɛboka ɔ.”—Edwein 110:3.
Bɛbɔ babɔ asu bɔ bɛte Adanzefoɛ ne kɔhora kɔboka asafo ne wɔ atẽe pẽe so. Aliemaamɔ bɔ bɛbɔ bɛnwo mmɔden paa ne kɔhora kɔsõ kyɛ asomvoɛ, na mmerɛ kɔso ne baasõ kyɛ mbanyi. Aliemaa mmienzua ne mmrasua kɔhora kɔyere bɛnwo kɔɔsõ kyɛ atẽepakyelɛfoɛ kɔfa kɔboka asɛnga adwuma ne. Ebiemɔ koso kɔhora kɔboka maa bekosisi nekaa bɔ yeyianu yɛsõ, anaakyɛ bɛkɔɔsõ wɔ asafo bɔ behia mmokalɛ wɔ berɛ nu.
2. Atẽe beni aso yeɛ yɛkɔhora yɛkɔfa anwoɔnaen nu nningyein bɔ yɛle ye ne, yɛkɔboka asafo ne ɔ?
Yɛkɔhora yɛkɔfa “nningyein biala bɔ ɔsombo bɔ [yelé ye] ne yɛkɔhyɛ Yehowa animnyam.” (Anyandera 3:9) Yɛnye gye yenwo kyɛ, yɛkɔfa yɛ sikaa ne nningyein biala bɔ yelé ye ne yɛkɔboka asafo ne, ɔne asɛnga adwuma bɔ yɛyɛ ye wɔ ewiase mukoraati ne. (Kenga 2 Korintofoɛ 9:7.) Yɛ ndoboa bɔ yɛye ne koso boka bɛbɔ atoyerɛngyɛm ato bɛne. Ebiemɔ wɔ berɛ a, daa bɛye “nikyee bie besie” bɛfa bɛye ndoboa. (Kenga 1 Korintofoɛ 16:2.) Yɛkɔhora yɛkɔye ndoboa yekogua alaka bɔ ɔwɔ nekaa bɔ yeyianu yɛsõ ne, anaakyɛ wɔ intanɛt so wɔ donate.pr418.com. Yehowa ama yɛ yenwo atẽe kyɛ yɛla ɔdɔ ali yehyire ye nate anwoɔnaen nu nningyein bɔ yelé ye naso.
SUA PẼE BOKASO
Nea atẽe ahoroɛ biemɔ bɔ ɛkɔhora kɔfa so kɔboka asafo ne ɔ.
3. Yɛkɔhora yɛkɔfa anwoɔnaen nu nningyein yɛkɔboka
Sɛ ebie fĩa y’ahõne nu kyɛ nikye a, Yehowa nye gye nwo, na sɔ yeɛ Yesu koso te nga ɔ. Wɔde nea nneɛsoɛ he, Yesu gye gyele konaniɛ bɔ né olle esikaa pẽe, nakoso na ɔbɔ yenwo mmɔden kyɛ, ɔkɔye ndoboa nanwo paa. Kenga Luka 21:1-4, na susu nzɛmmisa hemɔ anwo:
-
Aso yenwo hia kyɛ yɛye ndoboa pirikua kora ne wasɔ Yehowa nye anaa?
-
Sɛ yefĩa y’ahõne nu yɛye ndoboa a, sɛɛ yeɛ Yehowa ne Yesu te ngã ɔ?
Sɛ ɛpena kyɛ enwu bɔ yɛfa yɛ ndoboa ne yɛyɛ a, bɔ VIDIO ne. Na susu nzɛmmisa he anwo.
-
Atẽe beni aso yeɛ ndoboa bɔ yɛye ne boka asafo ahoroɛ bɔ bɛwɔ ewiase mukoraati ne ɔ?
4. Yɛkɔhora yɛkotu yɛnwo yɛkɔma yɛkɔboka
Wɔ tete mmerɛ nu ne, mmenia bɔ ne bele ɔpɛ kyɛ bɛkɔsõ Yehowa ne bokale, maa besiesiele nekaa bɔ ne bɛsõ ne. Ofikyɛ nná ɔte esikaa ngome yeɛ ne behia ɔ, na mmom b’anwoserɛ. Kenga 2 Beresosɛm 34:9-11, na susu nzɛmmisa he anwo:
-
Nzu yeɛ Israelniɛ biala yɛ fabokale maa besiesiele Yehowa awuro anaa nekaa bɔ bɛsõ ne ɔ?
Sɛ ɛpena kyɛ enwu kyɛbɔ Yehowa Adanzefoɛ di tetefoɛ ne nneasoɛ sĩ a, bɔ VIDIO ne. Na susu nzɛmmisa bɔ olili so he anwo.
-
Nzuati yeɛ yenwo hia kyɛ yɛmaa y’Ahennie Asa so te, na yesiesie nekaa bɔ wasɛkye ne ɔ?
-
Atẽe ahoroɛ beni yeɛ ɛkɔhora kɔfa so kɔboka ɔ?
5. Aliemaamɔ mmrenzua kɔhora kɔbɔ bɛnwo mmɔden, na bafata bama asɛyɛdeɛ ahoroɛ
Bible ne hyɛ Kristofoɛ mmrenzua ngunaen kyɛ, bɛyere bɛnwo bɛfata bɛma asɛyɛdeɛ ahoroɛ, na bahora baboka asafo ne. Sɛ ɛpena yenwo nneasoɛ a, bɔ VIDIO ne. Na ye nzɛmmisa bɔ ɔtoaso ne noa.
-
Wɔ vidio nanu ne, nzu yeɛ Ryan yere yenwo yɛle fa bokale asafo ne paa ɔ?
Bible ne maa yenwu bɔ odikyɛ aliemaamɔ mmrenzua yɛ, na bahora bafata kyɛ asafo nu asomvoɛ anaa asafo nu mbanyi ɔ. Kenga 1 Timoteo 3:1-13, Na susu nzɛmmisa hemɔ anwo:
-
Nzu yeɛ bɛpena befi aliemaamɔ bɔ bɛpena kyɛ, bɛsõ kyɛ asafo nu asomvoɛ anaa mbanyi ne berɛ ɔ?
-
Nzu yeɛ bɛpena befi b’abusuafoɛ berɛ ɔ? —Nea ngyekyɛmuɛ 4 ɔne 11.
-
Sɛ aliemaamɔ mmrenzua bɔ mmɔden dwu sɔ asɛyɛdeɛ hemɔ nwo a, sɛɛ yeɛ asafo nanufoɛ mukoraati nya so mvasoɛ ɔ?
EBIA EBIE KOBISA KYƐ: “Yehowa Adanzefoɛ yɛ sɛɛ yeɛ benya esikaa bɛyɛ b’adwuma ne ɔ?”
-
Ɛkɔye yenoa sɛɛ?
YEMUABƆLƐ
Yehowa nye sɔ mmɔden bɔ yɛbɔ kyɛ yɛkɔfa yɛ mmerɛ, y’anwoserɛ, ɔne yɛ anwoɔnaen nu nningyein yɛkɔboka asafo ne paa.
Ndimu
-
Yɛkɔyɛ sɛɛ ne yafa yɛ mmerɛ, ɔne y’anwoserɛ yaboka asafo ne?
-
Yɛkɔyɛ sɛɛ ne yafa anwoɔnaen nu nningyein bɔ yɛle ye ne yaboka asafo ne?
-
Atẽe ahoroɛ beni yeɛ ɛkɔhora kɔfa so kɔboka asafo ne ɔ?
NEA ƐHE KOSO
Nea nikyehorɛ tibɔ Nyameɛpiri nnea atẽe kyɛ, y’asomvoa kotua ndotosoɛ buru ɔ.
“Nzu Yeɛ Bible Ne Kã Fa Ndotosoɛ Buru Nwo Ɔ?” (Edwirɛ bɔ ɔwɔ intanɛt so)
Adwuma bie wɔ berɛ a, Bible maa yenwu kyɛ mmrienzua bɔ babɔ asu ne yeɛ odikyɛ bɛyɛ ɔ. Nakoso sɛ ɔkɔba kyɛ brasua yeɛ odikyɛ ɔyɛ sɔ adwuma ne a, nzu yeɛ ɔkɔyɛ ɔ.
“Sɛnea Tiyɛ Nhyehyɛe No Yɛ Adwuma Wɔ Asafo No Mu” (Ɔwɛn-Aban, February 2021)
Nea afɔleɛ bɔ Adanzefoɛ mmrenzua biemɔ nate akokoduro so bɔle, na bɛfale nwomaa bɛɛmane beliemamɔ ɔ.
Atẽe bɔ yɛfa so yɛye ndoboa yɛyɛ y’adwuma ne, nea kyɛbɔ ɔte sorongo wɔ nyamesom ahyehyɛdeɛ bɔ baha nanwo ɔ.
“Atẽe Beni Yeɛ Yehowa Adanzefoɛ Faso Benya Esikaa Bɛyɛ B’adwuma Ne Ɔ?” (Edwirɛ bɔ ɔwɔ intanɛt so)
