ADESUA 57
Ɛyɛ Bɔne Bɔ Anyeborolɛ Wɔ Nu A, Nzu Yeɛ Ɛkɔyɛ Ɔ?
Ɔwɔ nu kyɛ ɛdɔ Yehowa paa na ɛbɔ wɔnwo mmɔden kyɛ ɛngɔyɛ nikyeebiala bɔ onguro ɔ, nakoso ɔtɔ kyẽabie a, ɛkɔhora koli mvomsoɛ. Bɔne ne bie wɔ berɛ a, enu yɛ nnõ tra ebie. (1 Korintofoɛ 6:9, 10) Sɛ ɛyɛ bɔne bɔ enu yɛ nõ a, kae kyɛ ɔdɔ bɔ Yehowa le ma wɔ ne bo pɛlle; wayɛ krado kyɛ ɔkɔfa kɔhyɛ wɔ, na waboka wɔ.
1. Nzu yeɛ odikyɛ yɛyɛ kora na Yehowa afa yɛ bɔne ahyɛ yɛ ɔ?
Sɛ bɛbɔ bɛdɔ Yehowa ne nwui kyɛ bayɛ bɔne bɔ anyeborolɛ wɔ nu a, ɔmaa bɛwora bɔ paa. Nakoso ɛbɔ bɔ Yehowa ahyɛ ye mmenia ne maa benya aworakyekye: “Sɛ wɔ bɔne tekyɛ koogyan po a, ɔkɔyɛ fufue tekyɛ nwera.” (Aizaya 1:18) Sɛ yenu yɛnwo amba a, Yehowa kɔfa yɛ bɔne kɔhyɛ yɛ koraa. Nzu yeɛ yɛkɔyɛ yɛkɔfa yekohyire kyɛ yanu yɛnwo ɔ? Sɛ yenu yɛnwo koraa na yɛyakyi nningyein tɛɛ bɔ yɛyɛ ne a, na yɛ serɛ Yehowa kyɛ ɔfa hyɛ yɛ. Na afei yabɔ mmɔden yayakyi nzusueɛ anaa subaen bɔ ɔttemayé ne, na yabɔ yɛnwo mmɔden kyɛ yɛkɔfa Yehowa mmraa bɔ yenwo te ne yabɔ yɛbra.—Kenga Aizaya 55:6, 7.
2. Sɛ yɛyɛ bɔne a, sɛɛ yeɛ Yehowa fa asafo nu mbanyi naso boka yɛ ɔ?
Sɛ yɛyɛ bɔne bɔ anyeborolɛ wɔ nu a, Yehowa kã kyire yɛ kyɛ “yɛɛbɔ asafo nu mbanyi nemɔ amaneɛ.” (Kenga Yakobo 5:14, 15.) Sɔ asafo nu mbanyi hemɔ dɔ Yehowa ne ye mmenia ne. Ɔnate kyɛ batete sɔ mbanyi hemɔ nati, bɛse kyɛbɔ bɛkɔboka yɛ maa yɛne Yehowa afĩa kosa kɔyɛ pá ɔ.—Galatiafoɛ 6:1.
Sɛ yɛyɛ bɔne bɔ enu yɛ nõ a, sɛɛ yeɛ mbanyi ne boka yɛ ɔ? Mbanyi nyɔ anaa nza kɔfa Bible ne kɔtengyɛ yɛso. Bekosa bɛkɔhyɛ yɛ ngunaen, na bafa Bible ne baboka yɛ, kyɛbɔ yengosa ngɔyɛ bɔne ne kõ ɔ. Ebie a, bekosi gyinaeɛ bekole yenwo atẽe ahoroɛ bie bɔ yɛle ye wɔ asafo nanu ne bekofi yɛsa nu, kosi kyɛ yɛnwo kɔyɛ se wɔ honhom nu, na yasa yagyina yegya so biekũ ɔ. Bɔ ɔkɔyɛ na babɔ asafo nanwo waen bafi ngɛndɛensoɛ tɛɛ nwo ne, betu ebie bɔ ɔyɛ bɔne bɔ enu yɛ nõ, nakoso onnu yenwo ne befi asafo nanu.
SUA PẼE BOKASO
Sua kyɛbɔ Yehowa boka yɛ mmerɛ bɔ yayɛ bɔne bɔ enu yɛ nõ nanwo dwirɛ pẽe, na kyire yenwo anyesɔ.
3. Sɛ yɛkã yɛ bɔne a, ɔboka yɛ
Ɔnate kyɛ bɔne biala bɔ yɛkɔyɛ ne kã Yehowa nati, ɔfata kyɛ yɛpakye nu yɛkã yɛ bɔne yekyire ye. Kenga Edwein 32:1-5, na susu nzɛmmisa he anwo:
-
Nzuati yeɛ ɔte pá ma yɛ kyɛ, yɛkɔhã yɛ bɔne yekohyire Yehowa tra kyɛ yɛkɔfa yɛkɔfia ɔ?
Bɔ ɔboka Yehowa bɔ yɛkɔhã yɛ bɔne yekohyire ye naso ne yeɛ ole kyɛ, yɛkɔpena mmokalɛ yekofi mbanyi nemɔ berɛ, ɔba sɔ a, ɔkɔmaa yɛnwo kɔtɔ yɛ. Bɔ VIDIO ne, na susu nzɛmmisa bɔ olili so he anwo.
-
Wɔ vidio nanu ne, sɛɛ yeɛ mbanyi ne bokale Canon maa osiesiele ɔne Yehowa afĩa ɔ?
Sɛ yekonwu mbanyi ne a, odikyɛ yɛkã edwirɛ nanu nahorɛ mukoraati yekyire bɛ, ofikyɛ bɛwɔ berɛ kyɛ bɛkɔboka yɛ. Kenga Yakobo 5:16, na susu nzɛmmisa he anwo:
-
Sɛ yɛkã nahorɛ yekyire mbanyi nemɔ a, atẽe beni aso yeɛ ɔkɔyɛ mmerɛ kɔma bɛ kyɛ bɛkɔboka yɛ ɔ?
Kã wɔ bɔne, kã nahorɛ kyire mbanyi ne, na dé Yehowa mmokalɛ tonu
4. Sɛ betu ebie befi asafo nanu a, sɛɛ yeɛ ɔboka sona ne, ɔne asafo ne ɔ?
Sɛ ebie yɛ bɔne bɔ enu yɛ nõ, na sɛ wanné Yehowa mmokalɛ waando nu a, ɔngɔhora ngɔhɔso ngɔtena asafo nanu. Sɛ ɔba sɔ na betu ye befi asafo nanu a, yɛne ye mmɔ, na yɛne ye ndwudwo po. Kenga 1 Korintofoɛ 5:6, 11 ɔne 2 Yohane 9-11, na susu nzɛmmisa he anwo:
-
Kyɛbɔ mɔle halewaa kora sɛkye paanoo ne, sɛ yɛne ɔbɔnefoɛ bɔ wannu yenwo bɔ a, sɛɛ yeɛ ɔkɔhora kɔhã asafo ne ɔ?
Bɛbɔ batu bɛ nanu pẽe asa awa asafo nanu, ɔwɔ nu kyɛ etulɛ bɔ betule bɛ ne yɛyaa de, nakoso ɔbokale bɛ maa bɛnye wale bɛnwo so. (Edwein 141:5) Bɔ VIDIO ne, na susu nzɛmmisa bɔ olili so he anwo.
-
Wɔ vidio he anu ne, sɛɛ yeɛ tulɛ bɔ betule Sonja ne bokale ye ɔ?
Nhyehyɛeɛ bɔ yeɛ ole kyɛ bɛkora betu ebie befi asafo nanu ne . . .
-
sɛɛ yeɛ ɔhyɛ Yehowa animnyam ɔ?
-
sɛɛ yeɛ okyire kyɛ Yehowa dwene yɛnwo, na ɔdɔ yɛ ɔ?
5. Sɛ yenu yɛnwo a, Yehowa fa yɛ bɔne kyɛ yɛ
Yesu fale mvadonwo hyirehyirɛle kyɛbɔ Yehowa te ngã mmerɛ bɔ ebie anu yenwo ne. Kenga Luka 15:1-7, na susu nzɛmmisa he anwo:
-
Nzu yeɛ ɛhe maa enwui fa Yehowa nwo ɔ?
Kenga Ezekiel 33:11, na susu nzɛmmisa he anwo:
-
Nikye bɔ yenwo hia beni yeɛ sɛ yɛyɛ a, okohyire kyɛ yanu yɛnwo amba ɔ?
Tekyɛ mmoaen neanɛfoɛ ne, Yehowa dwene yemoaen nanwo paa
EBIEMƆ KÃ KYƐ: “Mesuro kyɛ sɛ mekã bɔne bɔ mayɛ ne mekyire mbanyi ne a, bekotu me bekofi asafo nanu.”
-
Nzu yeɛ ɛkɔhã kohyire ebie bɔ ole sɔ adwene ne ɔ?
YEMUABƆLƐ
Sɛ yɛyɛ bɔne bɔ enu yɛ nõ, na sɛ yenu yɛnwo nahorɛ nu, na yesi yehue kyɛ yɛngɔyɛ sɔ bɔne ne kõ a, Yehowa kɔfa kɔhyɛ yɛ.
Ndimu
-
Nzuati yeɛ ɔte pá kyɛ yɛkɔpakye nu yɛkɔhã yɛbɔne yekohyire Yehowa ɔ?
-
Nzu yeɛ odikyɛ yɛyɛ kora, na Yehowa afa yɛ bɔne ahyɛ yɛ ɔ?
-
Sɛ yɛyɛ bɔne bɔ enu yɛ nõ a, nzuati yeɛ odikyɛ yɛpena mmokalɛ yefi asafo no mbanyi ne berɛ ɔ?
NEA ƐHE KOSO
Nea kyɛbɔ bĩaa bie nyane Yehowa anwumvoinnwunɛ bɔ yenwo dwirɛ wɔ Aizaya 1:18 naso mvasoɛ ɔ.
Sɛ betu ebie a, sɛɛ yeɛ ɔboka sona ne, ɔne asafo ne ɔ?
“Nikyehorɛ Tibɔ Sɛ Betu Ebie A, Okyire Ɔdɔ Ɔ” (The Watchtower, April 15, 2015)
Sua kyɛbɔ ekohyirehyire nu kohyire ebie bɔ ɔtte Yehowa Danzeniɛ maa okonwu nikyeehorɛ tibɔ yetu ebie yefi asafo nanu ɔ.
Wɔ edwirɛ “Ne Odikyɛ Mesa Mekɔ Yehowa Berɛ” nu ne, nea kyɛbɔ bĩaa bie bɔ ofili nahorɛ nanu ne tele ngã kyɛ, Yehowa asa ahwẽ ye awa yenwo ɔ.
