Wɔ sɔ Bible adesua he anu ne, asua Yehowa nwo dwirɛ pẽe. Bɔ asua afa Yehowa nwo ne amaa ɔdɔ bɔ ele ma ye nanu ayɛ se, na ayira wɔnwo so ama ye abɔ asu. Sɛ ɛbɔlle asu a, ebia ɛdwene yenwo kyɛ ɛkɔyɛ sɔ ɛlɛsae ala. Nakoso sɛ ɛbɔ asu a, na eyielle. Ɛkɔhora kɔhɔso kopingye Yehowa daa. Ɛkɔyɛ ye sɛ́?

1. Nzuati yeɛ odikyɛ ɛkɔso ma ɛne Yehowa afĩa adamvoafalɛ nanu yɛ se ɔ?

Odikyɛ yɛbɔ yɛnwo mmɔden kora, na yamaa yɛne Yehowa afĩa adamvoafalɛ nanu ahɔso ayɛ se. Nzuati ɔ? “Kyɛbɔ ɔkɔyɛ a, yɛngɔhwẽ yɛnwo” yengofi yenwo llé ɔ. (Hebrifoɛ 2:1) Nzu yeɛ ɔkɔhora kɔboka yɛ maa, yɛkɔhɔ so yɛkɔsõ Yehowa nahorɛ nu ɔ? Odikyɛ yɛyere yɛnwo yɛyɛ asɛnga adwuma ne, na yɛnea atẽe foforɛ bɔ yɛkɔhora yɛkɔfa so, yɛkɔterɛ sõen bɔ yɛfa yɛma Nyameɛpiri nanu ɔ. (Kenga Filipifoɛ 3:​16.) Yehowa bɔ Yɛkɔsõ ye ne te nikyee bɔ yenwo hia tra biala wɔ asetena nu ɔ!​—Edwein 84:10.

2. Nzu biekũ yeɛ odikyɛ ɛkɔso yɛ ɔ?

Ɔwɔ nu kyɛ yɛfa Bible adesua he yɛba ayieleɛ, nakoso w’abrabɔ kyɛ Kristoniɛ ne de, ɔkɔhɔso daa. Bible ne kã kyɛ, “odikyɛ yenya subaen foforɛ.” (Ɛfesofoɛ 4:​23, 24) Mmerɛ bɔ ɛkɔso sua Nyameɛpiri Dwirɛ, na ɛkɔ asafo nhyiamu daa ne, ɔkɔmaa ekosua Yehowa ne ye subaen ahoroɛ nanwo dwirɛ pẽe. Nea atẽe bɔ ɛkɔhora kɔfa so kosuasua ye subaen ahoroɛ ne bie wɔ w’asetena nu ɔ. Kɔso yɛ nzakraeɛ ahoroɛ bɔ yenwo hia, na wamaa Yehowa nye agye.

3. Sɛɛ yeɛ Yehowa kɔboka wɔ maa ekonya ngɔsoɛ ɔ?

Bible ne kã kyɛ: “Nyameɛpiri . . . kosiesie ɛmɔ maa ɛmɔkoli mu. Ɔkɔma ɛmɔbo kotimu, ɔkɔma ɛmɔ anwoserɛ, ɔkɔma ɛmɔkogyina pindinn.” (1 Petro 5:​10) Yenu biala yia nzɔhwɛ. Nakoso Yehowa ma yɛ bɔ yehia, kyɛbɔ yɛkɔhora yekogyina ye noa ɔ. (Edwein 139:​23, 24) Wahyɛ bɔ kyɛ, ɔkɔmaa ekonya ɔpɛ ne, ɔne anwoserɛ bɔ ɛkɔfa kɔsõ ye nahorɛ nu ɔ.​—Kenga Filipifoɛ 2:​13.

 SUA PẼE BOKASO

4. Kɔso ne wɔ damvo bɔ ɛdɔ ye ne li ngitahoɛ

Mbaeɛ ne Bible adesua yeɛ waboka wɔ maa aayɛ Yehowa damvo ɔ. Nakoso sɛɛ yeɛ mbaeɛ ne Bible adesua kɔboka wɔ maa ɛkɔhwẽ kopingye ye paa ɔ?

Kenga Edwein 62:​8, na susu nzɛmmisa he anwo:

• Sɛ ɛne Yehowa afĩa adamvoafalɛ nanu kɔyɛ se a, sɛɛ yeɛ ɛkɔhora kɔtu mbɔn wɔ wɔ mbaeɛ nu ɔ?

Kenga Edwein 1:​2, na susu nzɛmmisa he anwo:

• Sɛ ɛne Yehowa afĩa adamvoafalɛ nanu kɔyɛ se a, sɛɛ yeɛ ɛkɔhora kɔmaa wɔ Bible kengalɛ kotu mbɔn ɔ?

Ɛkɔyɛ sɛɛ na ahora anya wɔ kokoanu adesua so mvasoɛ? Sɛ ekonya ɛhe anwo nyazahyɛ a, bɔ VIDIO ne, na susu nzɛmmisa hemɔ anwo.

• Nyazahyɛ bɔ ɔwɔ vidio nanu beni, yeɛ ɛkɔhora kɔfa kɔyɛ adwuma ɔ?

• Edwirɛti benimɔ yeɛ ɛpena kyɛ esua yenwo nikye ɔ?

 YEMUABƆLƐ

Kɔso wura ɛne Yehowa afĩa abusuabɔ nanu serɛ, na fa honhom nu botaeɛ sie wɔnye so. Sɛ ɛyɛ sɔ a, ekonya asetena nu anigye daa!

Ndimu

• Nzuati yeɛ ɛkɔhora konya anwotɔsoɛ kyɛ, Yehowa kɔboka wɔ maa ɛkɔsõ ye nahorɛ nu ɔ?

• Sɛɛ yeɛ ɛkɔhora kowura ɛne Yehowa afĩa adamvoafalɛ nanu serɛ ɔ?

• Sɛɛ yeɛ honhom nu botaeɛ bɔ ɛkɔfa kosiesie wɔnye so ne kɔboka wɔ maa ekonya ngɔsoɛ ɔ?