Kyɛ Yehowa Adanzefoɛ ne, yɛboka yɛ bɔbɔ yɛ mmusua ɔne mmusua ahoroɛ maa bɛyɛ kõ. Yebu Nyameɛpiri kyɛ ye yeɛ ɔhyehyɛle abusua biala ɔ. (Gyenɛsis 2:​21-​24; Ɛfesofoɛ 3:​14, 15) Ɔnate Bible naso kyirekyire mmenia bɔ bɛwɔ ewiase mukoraati ne nnyinasoɛdwirɛ bɔ ɔkɔboka bɛmaa b’agyaa kogyina na enu ayɛ fɛ ɔ.

Yɛbɔ mmɔdene yɛfa Bible afutue yɛyɛ adwuma, ɔnate kyɛ ɔboka yɛ maa yɛyɛ hũɛ, yeɛ ɔne awofoɛ pá. (Anyandera 31:10-​31; Ɛfesofoɛ 5:22–​6:4; 1 Timoteo 5:8) Nworɛ bɔ ɔwɔ Bible nanu ne boka mmusua ahoroɛ pó bɔ ɔsonõ ɛsõen bɔ benu biala wɔ nu ne. (1 Petro 3:​1, 2) Susu edwirɛ bɔ ebiemɔ bɔ bɛtte Yehowa Adanzefoɛ, bɔ bɛ nwokãfoɛ bɛɛyɛle Yehowa Adanzefoɛ hãne nanwo nea:

• Nakoso, mmerɛ bɔ Ivete ɔɔyɛle Yehowa Danzeniɛ ne, ɔɔyɛle ebie bɔ ole ɔdɔ na osa le aboterɛ paa ɔ. Nzakraeɛ bɔ ɔyɛle ne maa y’agyaa ne gyinane.”​—Clauir, ofi Brazil.

• Nakoso ofi sɔ mmerɛ ne, maanwui kyɛ Bible ne yɛ waboka y’agyaa ne paa ɔ.”​—Agness, ofi Zambia.

Wɔ y’asɛnga adwuma nanu ne, yɛmaa mmenia nwui kyɛ nworɛ bɔ ɔwɔ Bible nanu ne kɔhora kɔboka bɛ maa

• Bekofi nworɛ nu bɛkɔpena agyaa nu nwokãfoɛ

• Bekonya anigye wɔ b’agyaa afoɛ bɔ olimoa nanu

• Bɛne bɛ siamɔ kɔtena asomdwee nu

• Bɛkɔnea bɛ sikanzɛm yé

• Bɛkɔyakyi aporowaasulɛ

• Bekosũa bɔnefakyɛ

• Bɛkɔtete bɛ mmaammɔ

Nahorɛ nu, ɔtɔ ɛlɛhõ bie a, ɔkora ba sɔ. Kyɛ nneasoɛ ne, adwumakue bie bɔ bɛfrɛ ye Sofres yɛle nhwehwɛmuɛ wɔ 1998 nu , na benwuni ye kyɛ, wɔ agyaa 20 biala nu ne, enu kõmaapɛ (1) yeɛ ɔhaw bɔ enu yɛse taa banu ɔ, mmerɛ bɔ agyaafoɛ nanu kõ ɔɔyɛle Yehowa Danzeniɛ ne.

Yesu hãtole berɛ kyɛ bɛbɔ bekoli yesĩ ne, odwu mmerɛ bie a, bekoyia ɔhaw wɔ b’abusua nu. (Mateo 10:32-​36) Abakɔsɛm hworɔlɛfoɛ Will Durant hyɛle ye nzorɛ kyɛ, wɔ Roman Ahennie nanu ne, “Né bɛbɔ Kristofoɛ sõmoɛ kyɛ bɛtete mmusua nu,” * na sɔ ala yeɛ ɛnnɛ koso bɛbɔ Yehowa Adanzefoɛ biemɔ sõmoɛ ɔ. Aso ɛhe kyire kyɛ Adanzefoɛ nemɔ yeɛ bɛfa ndetemũɛ ne bɛba anaa?

Mmerɛ bɔ bebuale sõmoɛ bɔ mmenia fa bɔ Yehowa Adanzefoɛ kyɛ bɛtete mmusua nu ne, Europfoɛ Kɔɔt Bɔ Ɔnea Sona Anwofadie So (European Court of Human Rights) ne fa tole dwa kyɛ, ɔte abusuafoɛ bɔ bɛtte Yehowa Adanzefoɛ ne yeɛ bɛtaa bɛfa ngondĩi bɛba ɔ, ɔnate kyɛ “ɛyɛ a, benné yenwo atẽe bɔ b’abusuaniɛ ne le ye kyɛ ɔfa yenwo wura sõen bɔ okuro nu ne ndonu, ná bengyire obuo koso bɛma sɔ nhyehyɛeɛ ne.” Kɔɔt ne toale so kyɛ: “Ɔtte Yehowa Adanzefoɛ mmusua nu ngome yeɛ sɔ ɔhaw he wɔ ɔ, na mmom, sɔ ala yeɛ ɔkɔso wɔ mmusua ahoroɛ bɔ ɔsõno benu biala ne ye gyidie nanu ɔ.” * Na yepó sɛ mmenia ne bɛ nyɛ adwene wɔ bɛ gyidie nwo a, Yehowa Adanzefoɛ bɔ mmɔdene kyɛ bɛkɔfa Bible afutue he bɛkɔyɛ adwuma, ɔkã kyɛ: “Nnɛmaa ɛmɔfa bɔne betua ebiala bɔne so kerɛ. . . . Sɛ ɔkɔyɛ yé a, ɛmɔ bue nu de, ɛmɔ ne ebiala bɛtena asomdwee nu.”​—Romanfoɛ 12:17, 18.

Adanzefoɛ nemɔ tie Bible afutue bɔ ɔkã kyɛ begya “wɔ awurade nu ngome ne,” kyire kyɛ, bekogya ebie bɔ bɛne ye gyidie te kõ ɔ. (1 Korintofoɛ 7:​39) Nyanza wɔ sɔ Bible ahyɛdeɛ he anu paa. Kyɛ nneasoɛ ne, wɔ 2010 nu ne, edwirɛ bie bɔ ɔwɔ nwomaa Journal of Marriage and Family hãne kyɛ “agyaafoɛ bɔ bɛ sõen ne bɛgyidie te kõ ne”, b’agyaa ne taa so paa. *

Nakoso, Adanzefoɛ nemɔ nhyɛ ebiala ngunaen kyɛ sɛ ohũ anaa ɔye tte Yehowa Danzeniɛ a, ɔne ye bɛtete b’agyaa nanu. Bible ne kã kyɛ: “Sɛ aliemaa brienzua bie agya braa bɔ ɔtte gyidiniɛ na sɛ braa ne pene so kyɛ ɔne ye kɔtena a, nnɛmaa oyira ye; na sɛ brasua bie koso agya biãa bɔ ɔtte gyidiniɛ, na sɛ ohũ ne pene so kyɛ ɔne ye kɔtena a, nnɛmaa oyira ye.” (1 Korintofoɛ 7:​12, 13) Yehowa Adanzefoɛ di sɔ ahyɛdeɛ he aso.