Daabi. Yehowa adanzefoɛ ndwɔso ndia anwonyerɛ bie nwo pãneɛ bɔ bɛbɔ ne. Yebui kyɛ ɔte gyinaeɛ bɔ odikyɛ Kristoniɛ biala bɔbɔ deinn si ɔ. Yehowa adanzefoɛ pẽe nala yeɛ basi gyinaeɛ kyɛ bɛkɔbɔ anwonyerɛ bie nwo pãneɛ ɔ.

Yɛnye gye anwonyerɛsalɛ bɔ odi mũ nwo, na yekyire mmɔdene bɔ dɔkotafoɛ bɔ, bɛfa pɛpena anwonyerɛ ahoroɛ bɔ ɔyɛ suro pó noa ayire nanwo anisɔ. Anwofama ne adwuma serɛ bɔ dɔktafoɛ yɛ bɛfa bɛboka mmenia mmerɛ bɔ anwonyerɛ bie atu atesé ne, yɛnye gye yenwo paa.

Sɛ dɔktafoɛ fa akwangyerɛ bie to dwa a, yɛne bɛ yɛ adwene. Kyɛ nneasoɛ ne, ofi mmerɛ bɔ COVID-19 anwonyerɛ ne yele yeti ne, Yehowa Adanzefoɛ ahɔso afa amaneɛbɔ ahoroɛ bɔ ɔhyɛ mmenia ngunaen maa bɛyɛ sotie bɛma anwonyerɛ nanwo nhyehyɛeɛ mukoraati bato dwa wɔ bɛ wɛbsait jw.org so wɔ edwudwolɛ ahoroɛ pẽe nu. Ebie yeɛ ole bɔ ɔfa mvasoɛ bɔ ɔwɔ so kyɛ yengopingyé mmeni pẽe, kyɛbɔ yɛngɔhɔ nekaa bɔ babɔ dwa, kyɛbɔ yɛkɔfa yɛnwo yekosie mmerɛ bɔ yɛte ngã kyɛ y’afokyɛ ne, kyɛbɔ yekonwunzĩ yɛsa, yɛnoa ne yɛboin bɔ yɛkɔkata (face mask) ɔne afei akwangyerɛ foforɛ biala bɔ atũmvoɛ nemɔ afa ma bɔ ɔfa anwonyerɛ nanwo ne.—Romanfoɛ 13:1, 2.

Afoɛ pẽe ɛhe, yeɛ Yehowa Adanzefoɛ nwomaa ahoroɛ ne ahwẽ adwene asie nnyinasoɛdwirɛ ahoroɛ hemɔ aso ɔ:

• Anwonyerɛsalɛ nwo dwirɛ te angorangora gyinaesie.—Galatiafoɛ 6:5.

  “[Sɔ magazin he] ɔngãmvo ayireyɛlɛ anaa anwonyerɛsalɛ bie ndra foforɛ, na sɔ ala koso yeɛ ɔmma anwonyerɛsalɛ nwo afutue ɔ. Na mmom, ye botaeɛ alaa yeɛ ole kyɛ ɔkɔfa nyanzahyɛ ahoroɛ bɔ odikyɛ ebiala bɔbɔ si yenwo gyinaeɛ to dwa.”—Awake!, February 8, 1987.

  “Kyɛ ebie ne ye mmaammɔ kɔbɔ anwonyerɛ bie nwo pãneɛ anaakyɛ bɛngɔbɔ ne, ɔte angorangora gyinaesie.”—Awake!, August 22, 1965.

• Ɔnate kyɛ yebu ngõa paa nati, sɛ yɛfokyɛ a, yɛkɔ hɔspitel.—Asomafoɛ Ne Nnwumaa 17:28.

  “Sɛ Yehowa Danzeniɛ bie nde apɔ a, ɔkɔ dɔktafoɛ berɛ maa bɛnea bɔ ɔha ye ɔ. Ɔnate kyɛ yɛdɔ ngõa, na yɛ penakyɛ yɛtena ase yɛkyɛ nati, yɛyɛ bɔ yɛkɔhora biala yɛpena ayireyɛlɛ bɔ ondia bɔ Bible ne kã ne ɔ.”—The Watchtower, July 1, 1975.

  “Yehowa Adanzefoɛ fi bɛ pɛnu bedé ayireyɛlɛ ne anwonyerɛsalɛ nwo akwangyerɛ bɛto nu. Bɛ penakyɛ benya anwoserɛ ná batena ngõa nu bahyɛ. Nahorɛ nu, tekyɛ Kristoniɛ Luka bɔ ɔtenane ase wɔ afoɛ ɛyaa bɔ olimoa nanu ne, ɛnnɛ, Yehowa Adanzefoɛ biemɔ koso te dɔktafoɛ. . . . Yehowa Adanzefoɛ kyire obuo ne anisɔ bɛma mmenia bɔ bɛyɛ adwuma serɛ bɛnea ayarefoɛ wɔ hɔspitel ahoroɛ nu ne paa. Na sɔ ala yeɛ sɛ dɔktafoɛ kora nea bɛ maa bɛnwo tɔ bɛ a, bekyire yenwo anisɔ ɔ.”—The Watchtower, February 1, 2011.