Yehowa Adanzefoɛ afa Bible ngyerɛaseɛ ahoroɛ pẽe ali dwumaa wɔ bɛ sõen nu. Sɛ yele bie wɔ yedwudwolɛ nu a, yɛnye gye yenwo kyɛ yɛkɔfa New World Translation of the Holy Scriptures ne yekoli dwumaa, ɔnate kyɛ ɔfa Nyameɛpiri dumaa ne di dwumaa, enu dwirɛ ne te pɛpɛɛpɛ, na enu koso la berɛ.

• Ɔfa Nyameɛpiri dumaa ne di dwumaa. Bɛbɔ bɛyɛ Bible ahoroɛ ne biemɔ mva anidie mma sona bɔ Bible ne te ye deɛ ne. Kyɛ nneasoɛ ne, wɔ Bible ngyerɛaseɛ kõ bie nu ne, bɛbɔle mmenia kɔbo 70 bɔ bɛbokale maa bɛyɛle ne dumaa. Nakoso bɛyele bɔ Bible ne te ye deɛ​—Yehowa Nyameɛpiri​—ne dumaa befili nu koraa!

  Bɔ ɔte sorongõ wɔ ɛhe anwo ne, New World Translation ne afa Nyameɛpiri dumaa ne awura nekaa ahoroɛ pẽe bɔ né owura wɔ tete ndworɔleɛ nanu, nakoso boayikue bɔ bɛyɛle sɔ ngyerɛaseɛ nanu sona kõ pó ammɔ ye dumaa wɔ nu.

• Enu Dwirɛ Ne Te Pɛpɛɛpɛ. Ngyerɛaseɛ pẽe wɔ berɛ a, enu dwirɛ ne, ɔne tete ndworɔleɛ ne nyia. Kyɛ nneasoɛ ne, wɔ ngyerɛaseɛ kõ bie nu Mateo 7:​13 ne kenga kyɛ: “Ɛmowura anoa kãamba nu, ɔnate kyɛ atẽe bɔ ɔkɔ abɔnzam sẽe nu ne, enu baye paa, na ɛso falɛ nyɛ se”. Nakoso, tete ndworɔleɛ ne fale edwirɛ “ɛsɛkyelɛ” bɔ ɔtte “abɔnzam sẽe” yeɛ olili dwumaa ɔ. Ebia, bɛbɔ behyirele yebo ne fale “abɔnzam sẽe” lili dwumaa ɔnate kyɛ bedé bedi kyɛ bɛkɔyɛ abɔnefoɛ ayayadeɛ daa wɔ abɔnzam sẽe nu. Nakoso sɔ adwene ne, ɔne Bible ne nyia. Yeti, New World Translation ne kenga ye pɛpɛɛpɛ swa: “Ɛmowura anoa kãamba nu, ɔnate kyɛ atẽe bɔ ɔte piri na enu baye ne kɔ ɛsɛkyelɛ nu.”

• Enu la berɛ. Sɛ ngyerɛaseɛ bie te kama a, odikyɛ enu dwirɛ ne yɛ pɛpɛɛpɛ na enu koso da berɛ bɔ ndeaseɛ wɔ nu ɔ. Susu nneasoɛ he anwo nea. Wɔ Romanfoɛ 12:11 ne, Kristoniɛ somafoɛ Paul fale edwirɛ bie bɔ okyire kyɛ “honhom ne hú” lili dwumaa. Nakoso, ɔnate kyɛ sɔ dwirɛ nanu nna berɛ wɔ Brɔfo nu ɛnnɛ nati, New World Translation hyirele sɔ ngyekyɛmũɛ nabo wɔ atẽe bie aso na wamaa ndeaseɛ awa nu. Ɔkã kyɛ odikyɛ Kristofoɛ “yɛ hye wɔ honhom nu.”

Sɛ Nyameɛpiri dumaa bɔ wafa wali dwumaa, enu dwirɛ bɔ ɔte pɛpɛɛpɛ, ɔne kyɛbɔ enu la berɛ ne la ahãmeɛ, nikyee foforɛ koso da nzorɛ wɔ New World Translation nanwo: Bɛndɔ ne ye. Ɔnate ɛhe ati, mmenia miliɔn pẽe kora nya bie kenga wɔ bɛbɔbɔ bekuro dwudwolɛ nu​—ye titire ne, bɛbɔ ahãa ɔkɔyɛ se kyɛ bɛkɔhora bɛkɔtɔ Bible ne.