Na lango 2 ti août 2024, Ita Carlos Hortelão, so ayeke membre ti Komite ti Filiale ti Angola, afa sigingo ti Mbeti ti Nzapa ti fini dunia: Matthieu—Apocalypse nga na mbeti ti Genèse, Ruth, Esther nga na Jonas na yanga ti Ibinda. A sara lani tokua ni na ngoi ti kozo lango ti kota bungbi ti lango ota ti ngu 2024 so mama-tene ni ayeke “Fa nzoni tënë”! na gbata ti Cabinda, na Angola. Wungo ti azo kue so aga lani na kota bungbi ni ayeke 953. A kangbi Mbeti ti Nzapa ti fini dunia: Matthieu—Apocalypse na azo kue so aga lani. A zia nga na ndö ti jw.org nga na application JW Library, Mbeti ti Nzapa ti fini dunia: Matthieu—Apocalypse nga na Mbeti ti Nzapa so a sû ândö na Hébreu so azo apeut ti téléchargé ni.

Na Angola, azo 716 000 ayeke tene yanga ti Ibinda. So a yeke kozo traduction ti Bible so a sigi na ni na yanga ti Ibinda. A nzere na aita-koli nga na aita-wali 335 so ayeke tene yanga ti Ibinda so ayeke na yâ ti acongrégation 13 nga na mbeni groupe oko ti tene ala wara Bible na yanga ti kodro ti ala wani.

Na lango 9 ti août 2024, Ita Energy Matanda, so ayeke membre ti Komite ti Filiale ti Zimbabwe, afa sigingo ti Mbeti ti Nzapa ti fini dunia: Matthieu—Apocalypse na yanga ti awabuburu ti Zimbabwe na ngoi ti kota bungbi ti lango ota ti ngu 2024 so mama-tene ni ayeke “Fa nzoni tënë”! so a sara ni na gbata ti Harare, na Zimbabwe. Wungo ti azo kue so aga lani na kota bungbi ni ayeke 405. A zia ni hio na ndö ti jw.org nga na application JW Library Sign Language ti tene azo atéléchargé ni.

A sigi na mbeti ti Matthieu na yanga ti awabuburu ti Zimbabwe na ngu 2021. Depuis na temps ni so, a ngbâ ti sigi na ambeni mbeti ti Nzapa so a sû ândö na Grec. A fa so azo kutu oko tongaso ayeke sara kua na yanga ti awabuburu ti Zimbabwe, so na popo ni a yeke wara aita-koli nga na aita-wali 377 so ayeke na yâ acongrégation 11 ti langue des signes nga na agroupe 11 na yâ ti Zimbabwe kue.

Na lango 11 ti août 2024, Ita Mark Sanderson so ayeke membre ti Bebungbi, afa sigingo ti Mbeti ti Nzapa ti fini dunia so a kiri a leke yâ ti atënë ni na yanga ti Bulgarie nga na sigingo ti ambeni mbeti ti Bible, tongana Matthieu, Marc nga na Luc na ngoi ti kota bungbi so ayeke nde so mama-tene ni ayeke “Fa nzoni tënë”! na gbata ti Sofia, na Bulgarie. Wungo ti azo kue so aga lani na kota bungbi ni ayeke 5 418. A zia hio na ndö ti jw.org nga na application JW Library, ambeti ota so ti tene azo atéléchargé ni.

A sigi lani na kozo traduction ti Mbeti ti Nzapa ti fini dunia na yanga ti Bulgarie na ngu 2009. Laso, aita nduru na 3 000 ayeke na yâ ti acongrégation 57 na yâ ti Bulgarie kue.

Na lango 16 ti août 2024, Ita Bois Sylvain, so ayeke membre ti Komite ti Filiale ti Afrique de l’Ouest, afa sigingo ti mbeti ti Matthieu nga na Marc na yanga ti Aja na ngoi ti kota bungbi ti lango ota ti ngu 2024 so mama-tene ni ayeke “Fa nzoni tënë”! so a sara ni na gbata ti Djakotomey, na Bénin. Wungo ti azo kue so aga lani na kota bungbi ni ayeke 631. Na ndö ni, azo 435 asuivre diskur ti sigingo ti ambeti ni na lege ti vidéoconférence na salle d’assemblée ti gbata ti Abomey-Calavi, na Bénin. A zia ambeti ni use kue hio na ndö ti jw.org nga na application JW Library ti tene azo atéléchargé ni.

Azo ahon million oko na ndambo so ayeke na Bénin nga na Togo ayeke tene yanga ti Aja. Ambeni traduction ni use ti Mbeti Nzapa so a sû ândö na Grec ayeke fadeso dä na yanga ti Aja. Me, ti wara ni ayeke ngangu nga atënë ti yâ ni ayeke ngangu ti tene azo so ayeke diko ni acomprendre ni. Na ndö ni, na yâ ti atraduction ni use kue, a zi iri ti Jéhovah Nzapa dä. Laso, aita nduru na 1 300 ayeke na yâ ti acongrégation 25 so ayeke tene yanga ti Aja nga mbeni groupe oko ayeke na Bénin; na a yeke wara acongrégation 12 na Togo nga na agroupe 2. A nzere na ala kue ti wara mbeni traduction so ayeke facile ti tene zo amä yâ ni nga so a kiri na iri ti Nzapa kue na place ni.

Na lango 16 ti août 2024, Ita Jeffrey Winder, so ayeke membre ti Bebungbi, afa sigingo ti Mbeti ti Nzapa ti fini dunia so a kiri a leke yâ ti atënë ni na yanga ti Kinyarwanda. Ita Winder asara lani tokua ni na ngoi ti kozo lango ti kota bungbi ti lango ota ti ngu 2024 so mama-tene ni ayeke “Fa nzoni tënë”! na Kigali, na Rwanda. Wungo ti azo kue so aga lani na kota bungbi ni ayeke 9 908. Na ndö ni, azo 1 141 asuivre kapa ni na lege ti vidéoconférence na ambeni ndo ti kota bungbi ni use. A kangbi lani Bible na azo kue so aga na kota bungbi ni. A zia a-audio ti Mbeti ti Nzapa ti fini dunia nga na format électronique ni na yanga ti Kinyarwanda hio na ndö ti jw.org nga na application JW Library ti tene azo atéléchargé ni.

Azo ahon million 13 so ayeke na Rwanda ayeke tene yanga ti Kinyarwanda. A yeke tene nga yanga ti Kinyarwanda na yâ ti ambeni kodro, na tapande, République démocratique du Congo, Tanzanie nga na Ouganda. A sigi lani na Mbeti ti Nzapa ti fini dunia kue ti kozo ni na yanga ti Kinyarwanda na ngu 2010. Laso, aita nduru na 35 500 so ayeke na yâ ti acongrégation 634 ayeke tene yanga ti Kinyarwanda na yâ ti Rwanda kue.

Na lango 16 ti août 2024, Ita David Splane, so ayeke membre ti Bebungbi, afa sigingo ti Mbeti ti Nzapa ti fini dunia so a kiri a leke yâ ti atënë ni na yanga ti Sinhala, nga azo 4 273 aga na kozo lango ti kota bungbi ti lango ota ti ngu 2024 so mama-tene ni ayeke “Fa nzoni tënë”! na Colombo, na Sri Lanka. Na ndö ni, azo 1 045 so aga na kota bungbi ti lango ota na gbata ti Chilaw, Sri Lanka, asuivre programme ni na lege ti vidéoconférence. A kangbi na azo kue so aga na kota bungbi ni na ando ni use kue Mbeti ti Nzapa ti fini dunia na yanga ti Sinhala. A zia nga hio format électronique ni na ndö ti jw.org nga na application JW Library ti tene azo atéléchargé ni.

A-Témoin ti Jéhovah akomanse lani ti traduire ambeti ti e na yanga ti Sinhala asara angu 75 tongaso awe. Laso, azo nduru na million 15 so ayeke na Sri Lanka ayeke tene yanga ti Sinhala, so na popo ni a yeke wara aita 4 808 na yâ ti acongrégation 62.

Na lango 30 ti août 2024, Ita Martin Décousus, so ayeke membre ti Komite ti Filiale ti Nouvelle-Calédonie, afa sigingo ti Mbeti ti Nzapa ti fini dunia kue na yanga ti Wallis na ngoi ti kota bungbi ti lango ota ti ngu 2024 so mama-tene ni ayeke “Fa nzoni tënë”!. A sara nga kota bungbi ni na gbata ti Nouméa, Nouvelle-Calédonie nga na yâ ti akete kodro ti Mala’e, Wallis nga na Futuna. Azo so ayeke na ando ni so aconnecté na lege ti vidéoconférence. A kangbi Mbeti ti Nzapa ti fini dunia na azo 317 kue so aga lani. A zia nga hio Bible ni na ndö ti jw.org nga na application JW Library ti tene azo atéléchargé ni.

A sigi na Mbeti ti Nzapa ti fini dunia: Matthieu—Apocalypse na yanga ti Wallis na ngu 2018. Aita 153 so ayeke tene yanga ti Wallis ayeke na yâ ti acongrégation use na Nouvelle-Calédonie, Wallis nga na Futuna. Nga, aita ni ayeke ku kungo ti sara kua na Mbeti ti Nzapa ti fini dunia ni kue ti fa na nzoni tënë na azo ahon 35 000 so ayeke tene yanga ti Wallis na yâ ti akodro ni so.