Ngu oko oko, azo ayeke ga mingi mingi ti bâ ndokua ti aTémoin Jéhovah so ayeke na États-Unis na New York. A iri ndo ni so Béthel, so ayeke mbeni iri na yanga ti Hébreu so nda ni aye ti tene “da ti Nzapa.” Azo so aga alondo na ando so ayeke nduru nga na ando so ayo, ala ga ti bâ tongana nyen la a yeke sara ambeti ti e, ti hinga tongana nyen la a leke si akua ayeke tambela na lege ni nga ti bâ akamarade ti ala so ayeke sara kua kâ. Ade ti ninga ape, mbeni koli asara kue ti gue ti bâ ando ni so.

Marcellus, so ayeke mbeni Témoin ti Jéhovah so alango na Anchorage, na kodro ti Alaska (États-Unis), ayeke mbeni zo so apeut ti sara tënë mingi ape ndali ti kobela ti tension so abi lo aninga kete awe. * Lo yeke gï na yâ ti fauteuil roulant na lo yeke lakue na bezoin ti mbeni zo ti tene a-aidé lo ti sara akua ti lo. Atâa so kue, lo sara nzara mingi ti gue ti bâ Béthel. Ade ti ninga ape, ye so lo pensé dä so asi biani.

Corey, mbeni kamarade ti Marcellus so a-aidé lo ti leke voyage ni so atene: “Marcellus ayeke iri mbi lakue ti tene mbi gue lo fa na mbi ambeni ye ti sara ndali ti voyage ni. Teti so atënë so lo tene ka mingi ayeke gï, ‘en’ na ‘ên-ën’, mbi doit ti hunda na lo ambeni hunda tongaso si mbi hinga ye so lo ye mbi sara.” Lisoro ti ala ayeke ka tongaso:

“Mo ye mbi ga?”

“Ên-ën.”

“Mo ye mbi iri docteur?”

“Ên-ën.”

“A yeke ndali ti vizite so mo ye ti gue ti sara na Béthel so?”

“Ên.”

Corey atene: “Na pekoni, mbi doit ti fa na lo aye wa la mbi sara awe na aye wa la ade mbi sara ape. A nzere na mbi mingi ti bâ tongana nyen la lo yeke sara effort ti sara voyage ni so.”

Marcellus ahon ndö ti akpale nde nde so lo tingbi na ni tongaso si lo wara lege ti sara voyage ti lo ni. So lo yeke na moyen mingi ape so, lo bata pata teti ngu use tongaso si lo lingbi ti payé billet ti avion ti gue na New York so ayo na lo kilomètre 5400. Me teti so lo peut ti sara aye kue lo oko ape, lo doit ti gi ti wara mbeni zo so lo na lo ayeke voyagé tongaso si zo ni amû maboko na lo. Na pekoni lo doit ti hunda permission na docteur ti lo ti tene lo sara voyage ni. Docteur ni ayeda na lo gï alango kete kozo na lango ti voyage ti lo ni.

Na ngoi so Marcellus asi na New York, lo hunda ti tene a sara na lo vizite ti andokua ti e ti Brooklyn, ti Patterson nga na ti Wallkill. Lo bâ tongana nyen la akota machine ayeke imprimé alivre nga na abible, nga lo hinga encore ye mingi na ndö ti lege so a leke na aye si akua ti e kue atambela nzoni. Lo bâ nga mbeni ndo so a zia aye dä ti tene azo abâ so a iri ni “Bible nga na iri ti Nzapa” nga na mbeni nde so a iri ni “Mbeni bungbi ti azo ndali ti iri ti Jéhovah.” Na ndö ni, lo kiri lo wara gbâ ti akamarade. A yeke biani tâ mbeni nzoni vizite so zo apeut ti girisa ni ape!

Azo mingi so asara vizite ti Béthel atene so, ala hinga mbilimbili tënë so ala peut ti tene pëpe ti fa tâ ngia ti bê ti ala na gigi ndali ti vizite so ala sara na Béthel. Tongana a hunda Marcellus ti hinga wala vizite so lo sara na Béthel so alingbi na lê ti a-effort kue so lo sara ti ga, lo kiri tënë gï na oko lege so lo yeke sara ka na tënë, lo tene: “En! En! En!”

Ti sara vizite ti Béthel ayeke kpengba mo na afami ti mo tongana ti so asi na Marcellus. Na yâ ti dunia kue, e yeke nduru ti yamba azo kue so ayeke ga ti sara vizite ti andokua ti e. Ngbanga ti nyen mo kue mo ga mo sara vizite ni ape?