Na Australie, legeoko tongana ti gbâ ti akodro, a yeke wara ambakoro mingi. Ambeni mbakoro ni ayeke na yâ ti amaison de retraite, so na yâ ni ambeni zo ayeke bâ lege ti seni ti ala nga ayeke bâ lege ti abezoin ti ala lâ oko oko.

Mingi ti ambakoro so ayeke lango na yâ ti amaison de retraite ayeke na bezoin ti tene a bâ gï lege ti ala awe ape. Na ambeni ngoi, ala yeke ennuyé terê ti ala, ala yeke bâ so ala yeke gï ala oko, nga même ala yeke bâ so ala peut ti sara mbeni ye oko ape. Yenga oko oko, aTémoin ti Jéhovah ayeke gue asara vizite na ambakoro so ayeke na yâ ti amaison de retraite use na Portland, so ayeke na gbata ti Victoria na Australie. Ala yeke gue ti dë bê ti ala nga ti mû na ala beku.

A-Témoin ti Jéhovah ti ndo ni so ayeke wara terê na ambakoro ni na ala yeke sara lisoro na ala na ndö ti atënë ti Bible; na tapande ala sara lisoro na ndö ti ambeni kpengba ye so asi na yâ ti gigi ti Jésus. Jason atene: “E diko aversê ti Bible na ambakoro ni, na pekoni e yeke sara lisoro na ala na ndö ni.” So mingi ti ambakoro ni ayeke bâ pasi na kobela so, aTémoin ti Jéhovah ni adë bê ti ala nga akpengba ala na lege so ala sara lisoro na ala na ndö ti azendo so Nzapa amû ti zi kobela nga na kuâ.

Tony, so ayeke mbeni Témoin ti Jéhovah ti ndo ni atene: “Na début ni e yeke sara lisoro ni na ala aninga penze-ngbonga 30 tongaso, me ala ye si e ninga ahon so. Fadeso, lisoro ni ayeke ninga ngbonga oko tongaso, me atâa so kue mbeni mbakoro ni ti wali atene so ni ye ti tene lisoro ni ague juska ngbonga use si.” So ambeni mbakoro ni lê ti ala abuba, ti ambeni ala yeke gï place oko na ndö ti gbogbo nga ambeni apeut même ti gbu mbeni ye ape, aTémoin ti Jéhovah ni ayeke mû maboko na ala na ngoi kue so ala yeke sara lisoro na ala, na ala sara kue si ambakoro ni amû mbage mingi na lisoro ni alingbi na ngangu ti ala.

Na ngoi ti vizite ni, aTémoin ni na ambakoro ni ayeke he ambeni bia ti mû gonda na Nzapa, na mingi ni ambakoro ni ayeke hunda ti tene ala sara encore ni aninga. Mbeni mbakoro ni so iri ti lo John * atene: “E ye abia so ala ga na ni so mingi. A mû lege na e ti hinga Nzapa nga ti ne lo.” Mbeni mbakoro-wali ni so iri ti lo Judith, so lê ti lo abuba, abata atënë ti yâ ti ambeni bia ni so lo ye ni mingi na li.

A-Témoin ti Jéhovah ni abi bê ti ala na nzoni duti ti ambakoro ni oko na oko. Brian, so ayeke mbeni volontaire so ayeke gue ka ti bâ ambakoro ni atene so tongana ambakoro ni aduti nzoni ape, aTémoin ni ayeke gue na peko ti ala ti bâ ala na yâ ti achambre ti ala. A-Témoin ni atene: “E yeke sara lisoro na ala ti bâ wala ala sentir terê ti ala tongana nyen. A yeke si ka so e yeke kiri e ga na ambeni lango nde ti bâ wala ala so terê ti ala ason so aduti tongana nyen.”

Mingi ti ambakoro so alango na yâ ti maison de retraite ni aye avizite so e sara so mingi. Peter, so ayeke ka dä yenga na yenga na ngoi ti lisoro ni atene: “Mbi yeke ku ngoi ni so kungo!” Na lango ti avizite ni, Judith ayeke tene ka na azo so ayeke bâ lege ti lo atene: “Laso mercredi-aa! Pardon ala leke mbi ti tene mbi duti prêt ndali ti étude ti Bible so e yeke sara ka na groupe so! Mbi ye ti si na retard ape!”

Ambakoro ni aye aye so ala manda mingi, na ala bâ so ala ga nduru mingi na Nzapa ahon ti kozo. Na peko ti so e sara lisoro na ndö ti mbeni oko ti atënë so Jésus atene lani, Robert atene: “Mbi comprendre versê ti Bible so ka lâ oko ape. Me fadeso mbi comprendre ni!” David ahinga fadeso ngbanga ti nyen la a yeke kota ye ti sambela, na lo tene: “Sambela a-aidé mbi ti duti na songo na Nzapa nga asara si mbi bâ Nzapa tongana tâ zo na lê ti mbi.”

A nzere tâ mingi na ambakoro ni ti hinga tënë ti anzoni ye so Bible afa so ayeke si ande na yâ ti angoi so ayeke ga. Mbeni mbakoro ni so iri ti lo ayeke Lynette atene na aTémoin ti Jéhovah ni atene: “Merci so ala ga adë bê ti e na mara ti atënë ti Bible so.” Mbeni wali ni nga nde atene: “Nzapa la atokua ala na e!”

Avizite ni anzere lani na Margaret mingi, a sara si fadeso lo yeke gue lakue na abungbi ti aTémoin ti Jéhovah na Da ti Royaume ti ndo so lo yeke dä. A yeke mbeni kota effort mingi la lo sara so ndali ti so lo yeke na nzoni seni ape. Lo tene na aTémoin ti Jéhovah ni lo tene: “Ala mû na e kue mbeni raison so e doit ti ngbâ na fini ndali ni.”

Azo so ayeke sara kua na ndo ni so aye avizite so aTémoin ti Jéhovah ni asara so. Mbeni Témoin ti Jéhovah ti ndo ni so, so iri ti lo ayeke Anna, atene: “Azo so ayeke sara kua na ndo ni so a-encouragé ambakoro ni ti duti dä na ngoi ti alisoro ni so, ndali ti so ala bâ so ambokoro ni ayeke na ngia na pekoni.” Brian so e sara tënë ti lo fade atene: “Azo so ayeke bâ lege ti ambakoro ni asara ye na e na nzoni bê nga e na ala e mä terê nzoni. Ala yeke sara ye kue so ala peut ti sara ti mû maboko na ambakoro ni.”

A nzere mingi na afami ti ambakoro ni ti bâ so asewa ti ala ni aye alisoro ni so mingi. Mbeni molenge-wali ti mbeni mbakoro ni so ayeke na ndo ni so agonda aTémoin ti Jéhovah ni, lo tene: “Ye so ala sara na mama ti mbi so ayeke pendere mingi.”