Tongana terê ti mbeni zo ason ngangu, a yeke facile ti tene lo gi bê ti lo ngangu, na tongana a gbanzi lo na hôpital, gingo bê ti lo ni ayeke kiri ti ga ngangu mingi. Mbeni mbeti so a leke ni ndali ti awanganga atene so “awandara agi nda ti ye na afa so tongana a dë bê ti mbeni zo ti kobela nga a kpengba lo na lege ti tënë ti Nzapa, a yeke sara kota ye mingi na ndö ti seni ti lo.” *

Ti kaï abezoin ti amba ti ala so a gbanzi ala na hôpital, aTémoin ti Jéhovah ayeke dë bê ti amba ti ala ni na lege ti Bible nga ala yeke mû maboko na ala. A-ancien ti congrégation oko oko ayeke mû li ni ti gue ti sara vizite na azo ti congrégation ti ala so terê ti ala ason. Me ka tongana a gbanzi mbeni Témoin ti Jéhovah na hôpital, yongoro na ndo so lo lango dä? Na yâ ti akota gbata na ndö ti dunia kue, aTémoin ti Jéhovah asigi na agroupe ti azo so ayeke sara vizite na azo so terê ti ala ason. A-ancien so ayeke na yâ ti agroupe ni so ayeke gue lakue na yâ ti ahôpital ti aidé aTémoin ti Jéhovah so terê ti ala ason nga na afami ti ala so aga ti bâ ala, so alondo na ando so ayo wala so alondo même na akodro wande. Avolontaire 28000 tongaso la ayeke na yâ ti agroupe ni so wungo ni kue ayeke 1900, so ayeke na ndo ti sese kue. *

William, so ayeke mbeni oko ti aita ni so atene: “Mbi wara lege ti dë bê ti aTémoin ti Jéhovah nga na afami ti ala so ayeke aTémoin ape na lege so mbi yeke dä na terê ti ala ti sara tënë na ala nga ti mä ala. Mbi fa na ala so Jéhovah Nzapa ahinga situation ti ala ni na lo yeke pensé na ala. A nzere mingi na aita so atï kobela so nga na afami ti ala tongana a sambela ndali ti ala.”

Mingi ti aita afa singila ti bê ti ala ndali ti atënë so a tene ti dë bê ti ala na ngoi ti vizite ti aita so. Na gbe ni ge, e yeke bâ tapande ti ambeni ita ti États-Unis, so azo 7000 la asara kua na yâ ti bungbi ti azo so ayeke gue ti bâ aita so terê ti ala ason.

• Priscilla atene: “Merci so ala ga ti bâ babâ ti mbi na hôpital na peko ti so tension abi lo. So ala ga abâ lo so anzere na lo mingi! A nzere na lo mingi so a zia na sese mbeni ye tongaso. Mbi pensé so, so ala ga abâ lo fani mingi so la asara si lo wara sava ti terê hio so.”

• Ophilia, so ayeke molenge-wali ti mbeni ita so terê ti lo ason si na pekoni lo kui, atene na mbeni ita so aga na iri ti Bungbi ti aita so ayeke gue ti bâ azo ti kobela, lo tene: “Vizite ti ala andu bê ti mama ti mbi mingi! Lo hinga lani so Jéhovah la atokua ala. Merci mingi so ala bâ lege ti e na ndoye so.”

• Na ngoi so a tene na mbeni ita so a ngbâ gï na lo kete lango ti tene lo kui, li ti lo aga kirikiri. James, so ayeke mbeni membre ti Bungbi ti aita so ayeke gue ti bâ azo ti kobela, apassé mbeni ngoi na terê ti ita ni na lo fa na lo atënë ti dengo bê so ayeke na aPhilippien 4:6, 7. James atene: “Na ndade ni tongana mbi ga ti bâ lo, bango ndo ti lo achangé. Atâa tënë so awanganga atene na lo, grâce na mungo maboko ti Jéhovah, lo gi bê ti lo mingi ape, na lo la lo kiri lo encouragé mbi.”

Pauline, so koli ti lo akui na hôpital yongoro na ndo ti ala, atene: “Merci mingi na mungo maboko so ala mû na e na ngoi ti kota kpale so sewa ti e atingbi na ni so. Gï so e hinga so ala yeke ga ti duti na terê ti e juska na minuit, atâa so ala yeke sara kua na ndade ni, adë bê ti e mingi. Merci mingi so ala bâ si e kue, so e yeke 11, e wara ndo ti lango dä, nga ala ngbâ na terê ti e juska na nda ni. Mbi kiri merci na Jéhovah nga na bungbi ti lo so aleke ti tene a mû mara ti dengo bê tongaso na e.”

Nicki, Gayle nga na Robin asara lani accident na oto, na temps so ala yeke na kilomètre 300 na yanga-da ti ala. A tene tënë ni na Carlos, so ayeke mbeni oko ti aita so ayeke gue ti bâ azo ti kobela, na lo gue lo wara ala na hôpital. Carlos atene: “Mbi hunda na ala ti mû maboko na ala, na ala mû na mbi kete mbo ti Nicki ti tene mbi bâ lege ti lo na ngoi so awanganga angbâ ti soigné Nicki.” Na pekoni, Curtis, so ayeke nga mbeni membre ti Bungbi ni aga, lo na wali ti lo. Ala ngbâ na hôpital teti al’heure mingi juska asewa ti aita ni aga. Mbeni koli so ahinga sewa ni atene: “Bê ti azo ti kobela ni ota kue adë ndali ti mungo maboko so ala wara. Li ti Robin so ayeke ita ti Nicki ti wali so ayeke Témoin ti Jéhovah ape akpe kue na bango ye kue so aita so asara ti mû maboko na ala.”