Mbeni wali so iri ti lo ayeke Danielle, so ayeke Témoin ti Jéhovah na kodro ti Afrique du Sud, awara mbeni bozo so mbeni client agirisa na mbeni place ti kango café. Na yâ ti bozo ni mo yeke wara mbeni kotoko so nginza nga na mbeni carte ti crédit ti banque ayeke dä. Teti so lo ye ti kiri na bozo ni na wani, Danielle agi ti bâ wala lo peut ti wara mbeni adresse wala mbeni numéro ti téléphone me lo wara gï iri ti mbeni koli. Lo tara ti iri ndo na banque so koli ni abata nginza ti lo dä, tongaso si lo wara lo, me kue gbä. Me, atâa so kue lo découragé ape, lo iri ndo na ndö ti mbeni numéro ti docteur so lo wara na ndö ti mbeni reçu, so ayeke na yâ ti bozo ni. Zo so asara kua ti yambango azo na place ti kua ti docteur ni la amû appel ni na lo yeda ti mû numéro ti Danielle na koli ni.

 Li ti koli ni akpe kue ti wara appel ti place ti kua ti docteur ti lo, so a tene na lo so Danielle awara bozo ti lo na lo ye ti kiri na ni na lo. Na temps so lo ga ti mû bozo ni, lo wara Danielle na babâ ti lo. Ala ngbâ afa na lo ndani so ala sara effort ti wara lo so. Ala tene na lo so ndali ti so ala yeke aTémoin ti Jéhovah, ala gi ti sara ye alingbi na amama-ndia ti Bible. Ndani la ala sara kue ti sara ye na lege ni.—aHébreu 13:18.

 Angbonga kete na pekoni, koli ni atokua message na Danielle na babâ ti lo, ti kiri singila na ala encore ndali ti so ala kiri na lo bozo nga na kotoko ti lo. Lo tene: “Mbi kiri merci mingi so ala sara kue ti wara mbi. A nzere na mbi mingi ti wara mo na fami ti mo nga mbi yeke girisa ande ala lâ oko ape ndali ti so ala fa nzoni bê ti ala na mbi nga ala sara ye na mbi tongana akamarade. Ti fa singila ti bê ti mbi, mbi ye ti tokua na ala mbeni kete pata. Mbi hinga so ala sara sacrifice mingi ti voro Nzapa. Aye so ala sara afa biani so ala yeke anzoni zo, tongana ti so mbi bâ na sarango ye ti Danielle so afa so lo sara ye na lege ni. Merci encore, zia Nzapa airi tufa na ndö ti kua ti lo so ala yeke sara.”

 Ambeni nze kete na pekoni, babâ ti Danielle akiri awara terê na koli ni. Koli ni atene na lo so ade ti ninga ape, na temps so ni gue ti vo ye, ni wara mbeni portefeuille na sese. Na temps so lo wara wa ti portefeuille ni, so ayeke mbeni wali, lo mû ni na lo, na lo ngbâ lo fa na lo ye so apusu lo ti sara tongaso. Lo tene na lo so ade ti ninga ape, lo kue lo girisa kotoko ti lo na mbeni zo awara ni na akiri na ni na lo. Lo tene: “Tongana mo sara ye na lege ni nga mo sara ye na nzoni bê na mbeni zo, même si akpa nga kota ye ape, apeut ti pusu lo ti sara mara ni na mbeni zo na devant, ye so ayeke sara si azo kue aduti nzoni na yâ ti kodro.”