Yanmei ayeke mbeni wali so ayeke Témoin ti Jéhovah na mbage ti Asie. Mbeni lâ, lo aidé mbeni wali ti tene lo fâ lege na lo; iri ti wali ni ayeke Mingjie a na lo yeke zo so lê ti lo abuba. Mingjie atene na lo: “Merci mingi, zia Nzapa asara tufa na ndö ti mo.” Na pekoni, Yanmei angbâ ahunda na Mingjie wala lo ye ti tene lo na lo asara lisoro na ndö ti Bible. Ambeni ngoi na pekoni, Mingjie atene so na temps ni so lani, lâ na lâ lo yeke sambela ti tene Nzapa ague na lo na mbage ti tâ bungbi ti vorongo Nzapa. Me ngbanga ti nyen la lo hunda ye ni so na Nzapa?

 Mingjie atene so na ngu 2008, mbeni kamarade ti lo so lo kue lê ti lo abuba atisa lani lo ti gue na mbeni eglize so ayeke mû maboko na azo so mbeni mbage ti terê ti ala abuba, na lo yeda ti gue. Na peko ti so Mingjie ahunzi ti mä fango tënë ti Nzapa ti prêtre ti eglize ni awe, lo gue lo hunda na lo ti fa na lo mbeti wa la si lo wara atënë ti lo ni so dä. Prêtre ni atene na lo so ni mû ni na yâ ti Bible, so ayeke Tënë ti yanga ti Nzapa. Mingjie angbâ awara nzara ti dikongo Bible. Na pekoni, Mingjie asara kue lo wara mbeni Bible ti braille na yanga ti Chinois, so a sara ni na volume 32 na lo diko ni kue na yâ ti nze omene tongaso. Na temps so Mingjie ayeke diko Bible ni, lo ga ti bâ so tënë ti Trinité so a yeke fa ni na yâ ti eglize so lo yeke gue dä ayeke tënë ti wataka, nga lo bâ so Nzapa ayeke na iri; iri ni ayeke Jéhovah.

 Na mbage, bê ti Mingjie ason na terê ti azo ti eglize ni. Lo ga ti bâ so azo ti eglize ni ayeke sara ye alingbi na ye so lo diko na yâ ti Bible ape. Na tapande, ala yeke mû akobe so atö laso amû na azo so lê ti ala angbâ nzoni, me ti azo so lê ti ala abuba, a yeke mû na ala atanga ti kobe. Sioni sarango ye ni so azia vundu mingi na bê ti Mingjie, tongaso lo komanse ti gi mbeni eglize nde wa la ayeke nduru na lo so lo lingbi ti gue dä. Ndani la lo sambela Nzapa ti aidé lo ti wara tâ bungbi ti vorongo Nzapa.

 Ndali ti so Yanmei asara ye na nzoni bê na mbage ti lo, Mingjie ayeda ti tene ala manda Bible. Na pekoni, Mingjie ague na mbeni bungbi so aTémoin ti Jéhovah asara ni. Mingjie atene: “Mbi yeke girisa lâ oko ape kozo bungbi ni so mbi sara lani so. Aita-koli na aita-wali aga abara mbi na ngia. Ye so andu bê ti mbi lani mingi. Atâa so mbi yeke zo so lê ti mbi abuba, mbi bâ so azo asara kangbi na popo ti mba ape, ala ndoye terê.”

 Mingjie angbâ ti manda ye, na lo sara kue ti manke abungbi ape. Mingjie aye tâ mingi ti he abia ti Royaume atâa so a yeke lani ngangu na lo ndali ti so mbeti ti bia ni ayeke lani pëpe na yanga ti braille ti Chinois. Tongaso grâce na mungo maboko ti congrégation, Mingjie lo wani lo sara mbeti ti bia ti lo. Ti hunzi ti sara abia ni kue so wungo ni ayeke 151, lo mû l’heure 22! Na nze ti avril 2018, Mingjie akomanse ti fa tënë ti Nzapa, na pekoni nze na nze lo yeke fa tënë l’heure 30 tongaso.

 Ti aidé Mingjie ti leke terê ti lo ndali ti ahundango tënë so a yeke hunda ka na azo so aye ti wara batême, Yanmei asara enregistrement ti ahundango tënë ni nga na aversê ni so ayeke na yâ ti buku Bungbi so a leke ni ti sara ye so Jéhovah aye. Na nze ti juillet ngu 2018, Mingjie awara batême. Lo tene: “Ndoye so aita-koli na aita-wali na ngoi ti kota bungbi ni so afa na mbage ti mbi andu bê ti mbi mingi. Mbi toto na ngu ti lê ndali ti so mbi yeke fadeso na yâ ti tâ bungbi ti vorongo Nzapa awe.” (Jean 13:34, 35). Fadeso, Mingjie ayeke fa tënë nze na nze teti al’heure mingi, ndali ti so lo ye ti fa na amba ti lo mara ndoye so a fa na mbage ti lo.