Na ngu 2017, ambeni Témoin ti Jéhovah 12 amû mbeni bateau na yanga ti ngu ti Mosquito (Miskito) na Nicaragua ti sara mbeni voyage. Iri ti bateau ti ala ni ayeke Sturi Yamni. Mbeni oko ti aita ni so iri ti lo ayeke Stephen atene: “Objectif ti e ayeke ti encouragé kete groupe ti aita so alango ayo mingi na gbata ni nga ti aidé ala ti fa nzoni tënë na yâ ti territoire ti ala so akono mingi.”

 Aita 12 so akomanse voyage ti ala na Laguna de Perlas na ala hon na lê ti ngu ti Río Grande ti Matagalpa so asara akilomètre 200. Ala hinga ape so iri ti bateau ti ala ni, na yanga ti Miskito aye ti tene “Nzoni tënë”, ayeke ga ande mbeni tënë so ayeke nde mingi ndali ti azo so ayeke sara kodro na terê ti ngu ni. Na peko ti so ala sara voyage teti al’heure 12, sân ti compté bï so ala luti na lege; fadeso ala si na ndo so ala ye ti si dä, na kete kodro ti La Cruz de Río Grande. Na temps so ala si, amba ti ala aTémoin ti Jéhovah omene ti ndo ni ayamba ala nzoni mingi.

 Na bï ni so mbeni ye ti ngangu asi. Mbeni ngangu pupu asara si kota ngu-nzapa apika na li ti ngu ti Río Grande ti Matagalpa asuku ngangu. Ambeni l’heure kete na pekoni, ngu ni asuku amû ndo, na angbâ gï ti suku sukungo teti alango use. Ngu asuku amû Da ti Royaume nga na mingi ti ada so ayeke na yâ ti kete kodro ti La Cruz ni. Aita so aga gango so a-aidé azo ti ndo ni ti sigi na yâ ti ada ti ala. Mingi ti ala asara lango use na yâ ti mbeni da ti étage ti mbeni ita-wali so ayeke Témoin ti Jéhovah.

 Na lango ota ni, mokonzi-gbata ti La Cruz ni ague abâ aTémoin ni ti tene ala aidé azo ti kodro ni. Oko bateau so angbâ ngangu ti hon na lê ti ngu ni so asuku ngangu so ayeke gï bateau ti Sturi Yamni. Mokonzi-gbata ni ahunda na aTémoin ti Jéhovah ni ti yô ambeni koli 10 tongaso ti tene ala gue a-aidé azo so ayeke na yâ ti akpale na mbeni mbage ti kete kodro ni. A nzere na aTémoin ti Jéhovah ni ti mû maboko na ala.

 Na ndade ni, aTémoin ota nga na équipe ti secours ni asara mbeni voyage. Ita Stephen akiri atene: “Ti hon na lê ti ngu ni na temps ni so ayeke lani ngangu mingi. Akota keke so pupu akungbi ni ayeke hon na lê ti ngu ni, nga kota pupu ni asara si ngu ni ayeke sua ngangu mingi.” Atâa akpale so kue, bateau ni asi na yâ ti akete kodro ni ota kue.

 A-Témoin ota so aprofité na ngoi ni so ti dë bê ti azo ti kodro ni. Ala mû nga na azo ni mbeni Zingo na lango! ti ngu 2017 na Français, so mama-tene ni ayeke “Catastrophes : des mesures qui sauvent des vies.”

 Azo ti kete kodro ni so ayeke lango na yanga ti ngu ni akiri merci mingi na mungo maboko ti aTémoin ti Jéhovah ni nga na atënë ti Bible so akpengba ala. Ambeni zo ti kete kodro ni atene: “Ala yeke nduru ti aidé na angoi ti ngangu.” Ambeni nde nga atene: “Ala yeke na tâ ndoye na mbage ti amba ti ala.” Na peko ti so azo ni abâ a-effort so aTémoin ti Jéhovah asara ti aidé amba ti ala aTémoin nga na ambeni zo nde, a sara si mingi ti ala ayeke nduru ti yeda na atënë ti Bible so adë bê ti zo.