A fü lani mbeni triangle so ayeke violet na terê ti bongo ti ala

JOUÉ NI

Maud ayeke mbeni wali so avivre na France. Lo yeke sara kua na yâ ti mbeni ekole, na kua ti lo ayeke ti mû maboko na amolenge so mbage ti terê ti ala abuba na temps so ala yeke mû cours. Mbeni lâ, a komanse ti mû cours na a-élève ti mbeni klase na ndö ti fango aJuif so asi lani na ngoi ti Kozo bira so amû sese kue nga na acamp ti sarango pasi ti aNazi. A fü na ndö ti bongo so azo ti kanga ti acamp ni adoit ti yü, mbeni yanga ti bongo so ayeke na mbeni couleur. Couleur nga na forme ti yanga ti bongo ni amû lani lege ti hinga ngbanga ti nyen la a kanga azo ni.

Ambeni zo ti kanga ni lani ayeke na triangle ti violet na ndö ti bongo ti ala. Monsieur ti a-élève ni afa raison so a fü na ala triangle ti violet ni, lo tene: “Mbi pensé a yeke ngbanga ti so ala yeke ahomosexuel.” Na peko ti so cours ni ahunzi, Maud ague asara lisoro na monsieur ni na lo fa so aNazi afü lani triangle ti violet na ndö ti bongo ni ti fa so azo ni ayeke aTémoin ti Jéhovah. a Lo hunda na monsieur ni wala lo peut ti ga na lo ambeni mbeti na ndö ti tënë ni so. Monsieur ni ayeda nga lo hunda na Maud ti fa asango ni so na a-élève ni.

Na yâ ti mbeni klase ni nde, mbeni madame la amû cours na ndö ti oko tënë ni so; lo fa na a-élève ti lo mbeni tableau so afa molongo ti asymbole nde nde so a fü ni lani na ndö ti bongo ti azo ti kanga ni. Tableau ni afa polele so azo so ayeke yü lani triangle ti violet ayeke aTémoin ti Jéhovah. Na peko ti so cours ni ahunzi, Maud ahunda na madame ni ti ga na lo ambeni mbeti na ndö ti tënë ni so. Madame ni ayeda nga lo leke ti tene Maud afa asango ni so na a-élève ni.

Maud agbu ambeti so lo sara kua lani na ni so

Maud aleke terê ti lo lani ti sara mbeni exposé ti penze ngbonga 15 na ngoi ti cours ti so a yeke mbeni monsieur la ayeke mû ni so. Na temps ti cours ni, monsieur ni atene na lo atene: “L’heure ni kue ayeke ti mo.” Maud akomanse na fango mbeni vidéo so afa tongana nyen la aNazi asara lani pasi na aTémoin ti Jéhovah. Na temps so a fa na yâ ti vidéo ni so aNazi azi lani akete molenge ti aTémoin ti Jéhovah 800 na terê ti ababâ na amama ti ala, lo pete pause na lo diko mbaï ti ambeni molenge ni ota na milieu ni. Na temps so vidéo ni ahunzi, Maud adiko ndangba lettre so mbeni maseka-koli ti ngu 19 atokua lani na babâ na mama ti lo na ngu 1940. Iri ti lo ayeke Gerhard Steinacher, lo yeke mbeni Témoin ti Jéhovah ti Autriche. Lo sû lani lettre ni l’heure kete kozo si aNazi afâ lo. b

Maud afa asango ni so nga na yâ ti klase ti so si madame la ayeke mû cours dä so. Grâce na courage ti Maud, monsieur nga na madame so ayeke sara fadeso tënë ti aTémoin ti Jéhovah lakue na temps so ala yeke mû cours na ndö ti azo so aNazi asara lani pasi na ala na yâ ti acamp ti sarango pasi na azo.

a Na ngoi ti Use bira so amû sese kue, a kanga lani aTémoin ti Jéhovah ti Allemagne, so a hinga nga ala na iri ti Bibelforscher (wala awamandango Bible), ndali ti so ala ke ti mû mbage ti aNazi.

b A dë lani ngbanga ti kuâ na li ti Gerhard Steinacher ndali ti so lo ke ti lï na popo ti aturugu ti Nazi. Na yâ ti ndangba lettre so lo sara, lo tene: “Mbi ngbâ gï molenge senge. Gï tongana Seigneur amû na mbi ngangu si mbi lingbi ti gbu ngangu, na a yeke ye so mbi hunda la.” A fâ Gerhard na ndade ni na ndapre. Na ndö ti cimetière ti lo a sara tënë so: “Lo kui ti mû gonda na Nzapa.”